ທ່ານ ບັນດິດ ສາດສະດາຈານ ບໍ່ວຽງຄໍາ ວົງດາລາ, ກຳມະການສູນກາງພັກ, ລັດຖະມົນຕີ ກະຊວງ ເຕັກໂນໂລຊີ ແລະ ການສື່ສານ ກ່າວຄໍາເຫັນ ເນື່ອງໃນວັນໂທລະຄົມມະນາຄົມ ສາກົນ ຄົບຮອບ 157 ປີ (17 ພຶດສະພາ 1865 - 17 ພຶດສະພາ 2022)

17/05/2022

ທ່ານ ບັນດິດ ສາດສະດາຈານ ບໍ່ວຽງຄໍາ ວົງດາລາ, ກຳມະການສູນກາງພັກ,  ລັດຖະມົນຕີ ກະຊວງ ເຕັກໂນໂລຊີ ແລະ ການສື່ສານ ກ່າວຄໍາເຫັນ ເນື່ອງໃນວັນໂທລະຄົມມະນາຄົມ ສາກົນ ຄົບຮອບ 157 ປີ (17 ພຶດສະພາ 1865 - 17 ພຶດສະພາ 2022)

  • ຂໍຮຽນ: ບັນດາ​ທ່ານ​ ຜູ້ນຳພັກ-ລັດ ທີ່​ເຄົາລົບ ແລະ ​ນັບ​ຖື​ຢ່າງ​ສູງ!
  • ບັນດາ​ທ່ານ ພະນັກງານ, ທະຫານ, ຕໍາຫຼວດ ແລະ ປະຊາຊົນລາວ ບັນດາເຜົ່າ ທີ່ນັບຖື ແລະ ຮັກແພງ.

 

       ວັນທີ 17 ພຶດສະພາ ແມ່ນ ວັນໂທລະຄົມມະນາຄົມສາກົນ ແລະ ທັງເປັນວັນໂທລະຄົມມະນາຄົມ ແລະ ຂໍ້ມູນຂ່າວສານໂລກ, ເພື່ອເປັນການ ລະນຶກເຖິງ ວັນສ້າງຕັ້ງສະຫະພາບໂທລະຄົມມະນາຄົມສາກົນ ແລະ ການລົງນາມໃນສົນທິສັນຍາໂທລະສານສາກົນ ຄັ້ງທໍາອິດໃນປີ 1865. ສະນັ້ນ ໃນແຕ່ລະປີໃດ, ສປປ ລາວ ແລະ ບັນດາປະເທດສະມາຊິກຂອງສະຫະພາບໂທລະຄົມມະນາຄົມສາກົນ ໄດ້ພ້ອມກັນສະເຫລີມສະຫລອງວັນດັ່ງກ່າວຢ່າງເປັນຂະບວນການໃນທົ່ວໂລກ.

       ໃນປີ 2022 ນີ້ ສະຫະພາບໂທລະຄົມມະນາຄົມສາກົນ ໄດ້ກຳນົດການສະເຫຼີມສະຫຼອງພາຍໃຕ້ຄຳຂວັນ ວ່າ: ເຕັກໂນໂລຊີດິຈິຕອນ ເພື່ອຜູ້ອາວຸໂສ ແລະ ສຸຂະພາບທີ່ດີ “Digital technologies for older persons and healthy ageing”. ອົງການອະນາໄມໂລກ (WHO) ຄາດຄະເນວ່າ ຮອດປີ 2050 ຈະມີຜູ້ອາວຸໂສກວ່າ 65 ປີ ໃນທົ່ວໂລກປະມານ 1.5 ຕື້ຄົນ, ຊຶ່ງຈະກາຍເປັນ ສັດຕະວັດທີ່ສຳຄັນແຫ່ງການປ່ຽນແປງຂອງພົນລະເມືອງ. ການທີ່ມີອາຍຸຍືນ ແມ່ນຜົນສໍາເລັດທີ່ໂດດເດັ່ນແຫ່ງການພັດທະນາເຕັກໂນໂລຊີ, ນະວັດຕະກໍາ ແລະ ວິທະຍາສາດທາງການແພດລະດັບສູງ, ສະນັ້ນ ຈຶ່ງມີຄວາມຈຳເປັນ ນຳໃຊ້ເຕັກໂນໂລຊີ ດິຈິຕອນ, ໃນການພັດທະນາ ເສດຖະກິດ-ສັງຄົມ ໃນຫຼາຍດ້ານ ເຊັ່ນ: ສ້າງຕົວເມືອງອັດສະລິຍະເພື່ອເບິ່ງແຍງຜູ້ອາວຸໂສ, ສ້າງຄວາມສະດວກໃນທຸລະກໍາການເງິນ-ການທະນາຄານດ້ວຍເຕັກໂນໂລຊີດິຈິຕອນ ໃຫ້ແກ່ຜູ້ອາວຸໂສ ແລະ ເປັນເຄື່ອງມືຊ່ວຍ ການເບິ່ງແຍງຜູ້ອາວຸໂສຫຼາຍລ້ານຄົນແທນຄອບຄົວໃນເວລາທີ່ຈໍາເປັນ.

         ໃນໄລຍະ 157 ປີ ຜ່ານມາ ການພັດທະນາ ເຕັກໂນໂລຊີ ໂທລະຄົມມະນາຄົມ ໄດ້ຂະຫຍາຍຕົວຢ່າງໄວວາ ແລະ ໄດ້ກາຍເປັນປັດໄຈທີ່ຂາດບໍ່ໄດ້ໃນການດໍາລົງຊີວິດ. ໃນການລະບາດພະຍາດ ໂຄວິດ-19 ໃນອານາຄົດນີ້ ວຽກງານໂທລະຄົມມະນາຄົມ ຍັງຈະສຶບຕໍ່ພັດທະນາຢ່າງເລິກເຊິ່ງ ເພື່ອຕອບສະໜອງ ຄວາມຮຽກຮ້ອງຕ້ອງການຂອງການດໍາລົງຊີວິດ ແລະ ພັດທະນາ ເສດຖະກິດ-ສັງຄົມ ອີກດ້ວຍ.

       ຢູ່ ສປປ ລາວ ໃນນາມເປັນສະມາຊິກ ສະຫະພາບໂທລະຄົມມະນາຄົມສາກົນ ໄດ້ຈັດຕັ້ງສະເຫຼີມສະຫຼອງ ວັນໂທລະຄົມມະນາຄົມສາກົນ ພາຍໃຕ້ວິໄສທັດການພັດທະນາເສດທະກິດດິຈິຕອນ ຮອດປີ 2040 ຄື: “ນໍາໃຊ້ເຕັກໂນໂລຊີດິຈິຕອນ ເປັນເຄື່ອງມືສໍາຄັນໃນການຂັບເຄື່ອນທຸກຂະແໜງການ ເພື່ອສ້າງເສດຖະກິດດິຈິຕອນ  ແນ່ໃສ່ປະ ກອບສ່ວນເຂົ້າໃນການສ້າງເສດຖະກິດຂອງປະເທດເຮົາໃຫ້ມີການຂະຫຍາຍຕົວຢ່າງເຂັ້ມແຂງ, ໝັ້ນທ່ຽງ ແລະ ຍືນຍົງ”. ພ້ອມນັ້ນ ສປປ ລາວ ໄດ້ກຳນົດເອົາ ວັນທີ 13 ມີນາ 1965 ເປັນວັນສ້າງຕັ້ງ ວັນໂທລະຄົມມະນາຄົມແຫ່ງຊາດ ຕາມມາດຕາ 53 ຂອງກົດໝາຍ ວ່າດ້ວຍການໂທລະຄົມມະນາຄົມ.

          ບັນດາທ່ານ ທີ່ນັບຖື,

        ປັດຈຸບັນນີ້ ວຽກງານໂທລະຄົມມະນາຄົມ ຂອງ ສປປ ລາວ ໄດ້ມີການເຄື່ອນໄຫວ ແລະ ພັດທະນາຂຶ້ນຢ່າງຕັ້ງໜ້າ ພາຍໃຕ້ຄວາມຮັບຜິດຊອບ ຂອງອົງການດັດສົມໂທລະຄົມມະນາຄົມ ຊຶ່ງເປັນຫົວໜ່ວຍວິຊາການທຽບເທົ່າກົມ ທີ່ຂຶ້ນກັບ ກະຊວງເຕັກໂນໂລຊີ ແລະ ການສື່ສານ. ໃນປີຊຸມຜ່ານມາໄດ້ສໍາເລັດການປັບປຸງກົດໝາຍ ວ່າດ້ວຍການໂທລະຄົມມະນາຄົມ ແລະ ສ້າງນິຕິກຳລຸ່ມກົດໝາຍ ຫຼາຍສະບັບເພື່ອຄຸ້ມຄອງ ແລະ ດັດສົມວຽກໂທລະຄົມມະນາຄົມໃຫ້ແທດທັນກັບການນໍາໃຊ້ເຕັກໂນໂລຊີ ໃນຍຸກ ອຸດສາຫະກຳ 4.0 ຢູ່ໃນປະເທດເຮົາ. ຮອດທ້າຍປີ 2021 ພື້ນທີ່ການໃຫ້ບໍລິການໂທລະຄົມມະນາຄົມ ລະບົບ 2G ຄວບຄຸມໄດ້ 95%, 3G ຄວບຄຸມໄດ້ 81%, 4G ຄວບຄຸມໄດ້ 53% ຂອງບ້ານທັງໝົດໃນທົ່ວປະເທດ (ລວມທັງ ໃນເຂດບ້ານເປົ້າໝາຍບ້ານ 3 ສ້າງ). ມີຈຳນວນຜູ້ນໍາໃຊ້ໂທລະສັບຕັ້ງໂຕະ ແລະ ມືຖືໃນລະບົບແລ້ວ 6 ລ້ານກວ່າເລກໝາຍ ຫຼື 91 ເລກໝາຍຕໍ່ປະຊາກອນ 100 ຄົນ, ຜູ້ນໍາໃຊ້ອິນເຕີເນັດ (ລະບົບມີສາຍ ແລະ ບໍ່ມີສາຍ) ທັງໝົດ 3 ລ້ານກວ່າບັນຊີ, ມີອັດຕາການຊົມໃຊ້ອິນເຕີເນັດ 51% ຂອງປະຊາກອນ, ມີລະບົບຄຸ້ມຄອງການຂຶ້ນທະບຽນເລກໝາຍໂທລະສັບມືຖື ທີ່ທັນສະໄໝ;

        ປັດຈຸບັນນີ້ ມີຜູ້ໃຫ້ບໍລິການໂທລະຄົມມະນາຄົມ ຈຳນວນ 5 ບໍລິສັດ ແລະ ຜູ້ໃຫ້ບໍລິການອິນເຕີເນັດ ປະເພດ 1 ຈຳນວນ 7 ບໍລິສັດ, ປະເພດ 2 ຈຳນວນ 7 ບໍລິສັດ, ປະເພດ 3 ຈໍານວນ 17 ບໍລິສັດ, ຊຶ່ງສາມາດສ້າງລາຍຮັບເຂົ້າງົບປະມານແຫ່ງຊາດ ໄດ້ທັງໝົດ 756 ຕື້ກວ່າກີບ (ໃນນີ້ ຍັງບໍ່ໄດ້ລວມເງິນປັນຜົນຈາກບັນດາບໍລິສັດໂທລະຄົມຕ່າງໆ), ໃນນີ້ປະກອບມີລາຍຮັບຈາກການນຳໃຊ້ຊັບພະຍາກອນໂທລະຄົມມະນາຄົມ ຈຳນວນ 82 ຕື້ກວ່າ ກີບ ແລະ ການມອບພັນທະອາກອນ ຂອງ ບັນດາຫົວໜ່ວຍທຸລະກິດ ຈຳນວນ 672 ກວ່າຕື້ກີບ;

       ໃນໄລຍະທີ່ມີການແຜ່ລະບາດ ຂອງພະຍາດໂຄວິດ-19, ປີ 2021 ກະຊວງ ເຕັກໂນໂລຊີ ແລະ ການສື່ສານ ໄດ້ປະກອບສ່ວນຊ່ວຍເຫຼືອສັງຄົມ ເພື່ອຄວບຄຸມ, ແກ້ໄຂ, ຕ້ານ ແລະ ສະກັດກັ້ນ ການແຜ່ລະບາດ ຂອງພະຍາດໂຄວິດ-19 ດ້ວຍການອະນຸຍາດເລກໝາຍໂທລະສັບພິເສດ 163, 164, 165, 166 ໂດຍບໍ່ໄດ້ເກັບຄ່າທຳນຽມ ແລະ ຄ່າບໍລິການ ທີ່ມີມູນຄ່າ 100 ລ້ານກີບຕໍ່ປີ ແລະ ໃຫ້ປະຊາຊົນໂທເຂົ້າໂດຍບໍ່ໄດ້ເສຍຄ່າບໍລິການ. ພ້ອມດຽວກັນນັ້ນ, ກໍໄດ້ອອກນະໂຍບາຍພິເສດ ເພື່ອຫຼຸດຄ່າບໍລິການໂທລະຄົມມະນາຄົມ ແລະ ອິນເຕີເນັດ ແລະ ຊຸກຍູ້ບັນດາຫົວໜ່ວຍທຸລະກິດໂທລະຄົມມະນາຄົມ ສະໜອງການບໍລິການ ແກ່ພາກລັດໂດຍບໍ່ໄດ້ເກັບຄ່າບໍລິການ. ສຳລັບຜູ້ອາວຸໂສ ຢູ່ ສປປ ລາວ ກໍໄດ້ນຳໃຊ້ ແອັບພລິເຄເຊິນ ລາວສູ້ສູ້ ເພື່ອລົງທະບຽນຈອງການຊັກວັກຊິນລ່ວງໜ້າ ໃນການຕ້ານການແຜ່ລະບາດຂອງພະຍາດໂຄວິດ-19 ເພື່ອຫຼີກລ່ຽງ ບໍ່ໃຫ້ຜູ້ອາວຸໂສໄປຕໍ່ແຖວ ຫຼື ລໍຖ້າເປັນເວລາດົນນານ.

          ບັນດາທ່ານ ທີ່ນັບຖື ແລະ ຮັກແພງ,

       ການສະເຫຼີມສະຫຼອງ ວັນໂທລະຄົມມະນາຄົມ ສາກົນດັ່ງກ່າວນີ້ ຍັງເປັນການ ສ້າງຈິດສຳນຶກ ແລະ ຄວາມຮັບຮູ້ ໃຫ້ແກ່ທຸກຄົນໃນສັງຄົມ ເປັນຕົ້ນແມ່ນ ຜູ້ສ້າງລະບຽບການ ແລະ ຄຸ້ມຄອງໂທລະຄົມມະນາຄົມ, ຜູ້ປະກອບການ, ຜູ້ຄ້າຂາຍອອນລາຍ ແລະ ຜູ້ຊົມໃຊ້ທັງຫຼາຍ ໃຫ້ເຂົ້າໃຈຢ່າງເລິກເຊິ່ງ ເຖິງບົດບາດ ແລະ ຄວາມສຳຄັນຂອງວຽກງານໂທລະຄົມມະນາຄົມ ຕໍ່ການພັດທະນາເສດຖະກິດ-ສັງຄົມ, ພ້ອມກັນນັ້ນ ກໍເພື່ອພັດທະນາວຽກງານໂທລະຄົມມະນາຄົມ ໃຫ້ຊຸກຍູ້ສົ່ງເສີມການຄ້າແບບອອນລາຍ, ການຜະລິດອຸດສາຫະກຳ ໃນຍຸກດິຈິຕອນ ແລະ ການຖ່າຍທອດເຕັກໂນໂລຊີດິຈິຕອນທີ່ກ້າວໜ້າຂອງໂລກເຂົ້າມາໃນປະເທດເຮົາ  ເພື່ອປະກອບສ່ວນການຈັດຕັ້ງຜັນຂະຫຍາຍ ແຜນພັດທະນາເສດຖະກິດດິຈິຕອນ ຂອງ ປະເທດເຮົາໃຫ້ປະກົດຜົນເປັນຈິງ. 

      ໃນໂອກາດແຫ່ງການສະເຫຼີມສະຫຼອງ ວັນໂທລະຄົມມະນາຄົມສາກົນ ທີ່ມີຄວາມໝາຍສຳຄັນເລິກເຊິ່ງຄົບຮອບ 157 ປີນີ້, ຂ້າພະເຈົ້າ ຂໍຮຽກຮ້ອງມາຍັງ ບັນດາທ່ານທັງຫຼາຍ ຈົ່ງນໍາໃຊ້ໂທລະຄົມມະນາຄົມໃຫ້ມີຜົນປະໂຫຍດສູງສຸດໃນທຸກໆຂົງເຂດວຽກງານ ແລະ ທົ່ວທຸກຂະແໜງການ ທັງພາກລັດ ແລະ ພາກເອກະຊົນ ເພື່ອຫັນການຜະລິດ ແລະ ການບໍລິການເຂົ້າສູ່ລວງເລິກ,​ ຍົກສູງ ສະມັດຕະພາບການຜະລິດ ແລະ ຄຸນນະພາບຂອງຜະລິດຕະພັນ, ຫັນເປັນທັນສະໄໝ ແລະ ນຳໃຊ້ເຕັກໂນໂລຊີດິຈິຕອນ ເພື່ອຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ແລະ ປະຕິບັດວາລະແຫ່ງຊາດ ໃນການແກ້ໄຂບັນຫາ ເສດຖະກິດ-ການເງິນ ແລະ ບັນຫາຢາເສບຕິດ ໃຫ້ປະກົດຜົນເປັນຈິງ.

         ນະໂອກາດອັນສະຫງ່າລາສີນີ້, ຂ້າພະເຈົ້າ ຂໍອວຍພອນໄຊອັນປະເສີດມາຍັງ ບັນດາທ່ານຜູ້ນໍາພັກ-ລັດ, ບັນດາທ່ານ ພະນັກງານ-ລັດຖະກອນ, ທະຫານ, ຕຳຫຼວດ, ນັກປະດິດສ້າງ, ​ນັກວິທະຍາສາດ,​ ນັກຮຽນຮູ້ປັນຍາຊົນ ຕະຫຼອດເຖິງບັນດາຜູ້ປະກອບການທຸລະກິດ ແລະ ປະຊາຊົນລາວບັນດາເຜົ່າ ຈົ່ງມີສຸຂະພາບແຂງແຮງ, ປັດສະຈາກພະຍາດໂຄວິດ 19, ສຸມທຸກເຫື່ອແຮງ ແລະ ສະຕິປັນຍາ ເຂົ້າໃນການປະຕິບັດ 2 ໜ້າທີ່ຍຸດທະສາດ ປົກປັກຮັກສາ ແລະ ສ້າງສາພັດທະນາປະເທດຊາດ,​ ຊຸກຍູ້ສົ່ງເສີມການຄົ້ນຄວ້າພັດທະນາວຽກງານໂທລະຄົມມະນາຄົມ ຂອງປະເທດເຮົາໃຫ້ກ້າວໜ້າ ແລະ ຍົກລະດັບຂຶ້ນຢ່າງບໍ່ຢຸດຢັ້ງ ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຕາມທິດສີຂຽວຍືນຍົງ ເຮັດໃຫ້ປະຊາຊົນເຮົາມີຄວາມຮັ່ງມີຜາສຸກ, ປະເທດຊາດມັ່ງຄັ່ງເຂັ້ມແຂງ,​ ສັງຄົມມີຄວາມສາມັກຄີປອງດອງ, ປະຊາທິປະໄຕ, ​ຍຸຕິທຳ ແລະ ສີວິໄລ.

          ສາມາດດາວໂຫລດເອກະສານ ແລະ ວີດີໂອການສະເຫຼີມສະຫຼອງ ວັນໂທລະຄົມມະນາຄົມສາກົນໄດ້ທີ່: https://g-drive.gov.la/index.php/s/E7tAMKW5nAeA8fK

 

  ຂໍຂອບໃຈ.

 

 

ຊົມເຊີຍວັນໂທລະຄົມມະນາຄົມ 157 ປີ
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 17
ສະຖິຕິຂະແໜງ ເຕັກໂນໂລຊີ ແລະ ການສື່ສານ ປີ 2020
ລະ​ບົບ​ຂື້ນ​ທະ​ບຽນ​ປະ​ຊຸມ