ລັດຖະມົນຕີ ກຕສ ພົບປະ-ໂອ້ລົມພະນັກງານພະແນກ ເຕັກໂນໂລຊີ ແລະ ການສື່ສານແຂວງ ຈຳປາສັກ

09/05/2022

ລັດຖະມົນຕີ ກຕສ ພົບປະ-ໂອ້ລົມພະນັກງານພະແນກ ເຕັກໂນໂລຊີ ແລະ ການສື່ສານແຂວງ ຈຳປາສັກ

       ໃນໂອກາດທີ່ຄະນະພັກ-ຄະນະນຳ ກະຊວງເຕັກໂນໂລຊີ ແລະ ການສື່ສານ ໄດ້ລົງເຄື່ອນໄຫວວຽກງານຢູ່ແຂວງ ຈຳປາສັກ ລະຫວ່າງວັນທີ 3-7 ພຶດສະພາ 2022 ນີ້, ທ່ານ ບັນດິດ ສຈ. ບໍ່ວຽງຄຳ ວົງດາລາ, ກຳມະການສູນກາງພັກ, ລັດຖະມົນຕີກະຊວງເຕັກໂນໂລຊີ ແລະ ການສື່ສານ ພ້ອມດ້ວຍຄະນະ ໄດ້ໄປຢ້ຽມຢາມພະແນກເຕັກໂນໂລຊີ ແລະ ການສື່ສານ  ແຂວງ ຈຳປາສັກ ໃນຕອນເຊົ້າວັນທີ 5 ພຶດສະພາ 2022 ໂດຍໃຫ້ການຕ້ອນຮັບຂອງທ່ານ ທຽນໄຊ ສະຖາພອນ, ຮັກສາການຫົວໜ້າພະແນກເຕັກໂນໂລຊີ ແລະ ການສື່ສານ ແຂວງ ຈຳປາສັກ ພ້ອມດ້ວຍຄະນະ ແລະ ພະນັກງານພາຍພະແນກ.

      ໃນໂອກາດດັ່ງກ່າວ, ທ່ານ ທຽນໄຊ ສະຖາພອນ ໄດ້ລາຍງານໂດຍຫຍໍ້ກ່ຽວກັບສະພາບການເຄື່ອນໄຫວວຽກງານໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ ໃຫ້ແກ່ທ່ານລັດຖະມົນຕີ ແລະ ຄະນະຮັບຊາບ ໂດຍສະເພາະແມ່ນວຽກງານທີ່ເປັນຜົນສຳເລັດຂອງການຈັດຕັ້ງປະຕິບັດໃນໄລຍະຜ່ານມາ ກໍມີຫຼາຍດ້ານ ເຊັ່ນ: ໄດ້ຜັນຂະຫຍາຍນິຕິກໍາ ໂດຍຈັດຕັ້ງເຜີຍແຜ່ຄໍາແນະນໍາຂອງເຈົ້າແຂວງຈຳປາສັກກ່ຽວກັບການຄຸ້ມຄອງ ການອອກອະນຸຍາດໃຫ້ບໍລິການອິນເຕີເນັດກາເຟ ສະບັບເລກທີ 06/ຈຂ.ຈສ, ລົງວັນທີ 22 ທັນວາ 2021 ແລະ ຂໍ້ຕົກລົງວ່າດ້ວຍການແຕ່ງຕັ້ງຄະນະກໍາມະການຄຸ້ມຄອງຂໍ້ມູນຂ່າວສານຜ່ານອິນເຕີເນັດ ຂັ້ນແຂວງ ເລກທີ 1305/ຈຂ.ຈສ, ລົງວັນທີ 07 ທັນວາ 2021 ໄດ້ຈໍານວນ 10 ກົມກອງ, 9 ຕົວເມືອງ 1 ນະຄອນ ແລະ 4 ບໍລິສັດ ໂທລະຄົມມະນາຄົມ ສາຂາແຂວງຈໍາປາສັກ; ໄດ້ຂະຫຍາຍການນໍາໃຊ້ລະບົບກອງປະຊຸມທາງໄກ ໄດ້ 21 ກົມກອງ, ຈັດຝຶກອົບຮົມການນໍາໃຊ້ລະບົບອີເມວ ຂອງພາກລັດ ໄດ້ 6 ກົມກອງ ແລະ ຈັດຝຶກອົບຮົມການນໍາໃຊ້ລະບົບສື່ສານພາກລັດ (G-Chat), ການນໍາໃຊ້ລະບົບການແຊເອກະສານເອເລັກໂຕຣນິກ (G-Share)ໄດ້ 45 ກົມກອງ, ສ້າງລາຍຊື່ອີເມວຂອງພາກລັດໄດ້ທັງໝົດ 309 ບັນຊີ, ເກັບກໍາຂໍ້ມູນລະບົບຫ້ອງການທັນສະໄໝ e-Office ຈຳນວນ 31 ບັນຊີ ເພື່ອເປີດນຳໃຊ້ ຢູ່ຫ້ອງວ່າການແຂວງຈໍາປາສັກ,  ຄຽງຄູ່ກັນກໍໄດ້ເກັບກໍາຂໍ້ມູນເພື່ອເປີດນໍາໃຊ້ U-Office ໄດ້ 8 ກົມກອງ, ຈັດສັນລະຫັດໂປຣແກຣມລາວເອັນຕີໄວຣັສໃຫ້ແກ່ 12  ກົມກອງ ແລະ ເມືອງ ຈໍານວນທັງໝົດ 947 ລະຫັດ; ສ້າງປື້ມຄູ່ມືການນຳໃຊ້ລະບົບ Google Drive ເຜີຍແຜ່ໃຫ້ກົມກອງຕ່າງໆ ອ້ອມຂ້ງແຂວງ. ໄດ້ຜັນຂະຫຍາຍແຈ້ງການແນະນໍາຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຂັ້ນແຂວງ ສະບັບເລກທີ 04/ຈຂ.ຈສ, ລົງວັນທີ 9 ສິງຫາ 2021 ເຄື່ອນໄຫວຊຸກຍູ້ ການນໍາໃຊ້ການບໍລິການ “ລາວສູ້ໆ” ໄດ້ຈໍານວນ 25 ຫົວໜ່ວຍ ທີ່ສັງຄົມເຂົ້າໄປໃຊ້ບໍລິການເປັນປະຈໍາ, ນອກຈາກນັ້ນ ຍັງໄດ້ອອກຄໍາແນະນໍາ ກ່ຽວກັບການນໍາໃຊ້ການບໍລິການ ລາວສູ້ສູ້ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19. ສໍາເລັດການເປີດນໍາໃຊ້ VC Cloud ຈໍານວນ 52 User  ພະແນກການອ້ອມຂ້າງແຂວງ ຈໍານວນ 42 User, 9 ຕົວເມືອງ 1 ນະຄອນ ຈໍານວນ 10 User ແລະ ອື່ນໆ ພ້ອມດຽວກັນ, ກໍຍັງໄດ້ມີບາງຂໍ້ສະເໜີ ເປັນຕົ້ນແມ່ນ ຄົ້ນຄ້ວາ, ສັບຊ້ອນພະນັກງານຄືນໃໝ່ ເພື່ອໃຫ້ຖືກຕ້ອງກັບບັນດາໜ້າວຽກ, ສອດຄ່ອງກັບລະດັບຄວາມຮູ້, ຄວາມສາມາດຕົວຈິງ ຂອງພະນັກງານ ເພື່ອຮັບປະກັນການຈັດຕັ້ງປະຕິບັດວຽກງານ, ປະສານສົມທົບກັບບັນດາສູນ, ກົມວິຊາການຂອງກະຊວງ ເຕັກໂນໂລຊີ ແລະ ການສື່ສານ ເພື່ອຈັດຝຶກອົບຮົບສ້າງຄວາມເຂັ້ມແຂງດ້ານວິຊາການໃຫ້ແກ່ພະນັກງານ, ເວົ້າລວມແມ່ນສ້າງຄວາມເຂັ້ມແຂງແກ່ກົມກອງໃນການຈັດຕັ້ງປະຕິບັດວຽກງານເຕັກໂນໂລຊີ ແລະ ການສື່ສານ ໃຫ້ມີຄວາມເຂັ້ມແຂງດ້ານວິຊາການຫຼາຍຂື້ນເປັນກ້າວໆ ເພື່ອກຽມຄວາມພ້ອມໃນການຫັນໄປສູ່ເສດຖະກິດດີຈິຕ້ອນ ທີ່ຂັ້ນເທິງວາງອອກ.

     ໃນໂອກາດດຽວກັນ, ບັນດາທ່ານຫົວໜ້າຫ້ອງການ, ກົມ, ສູນ ຈາກກະຊວງເຕັກໂນໂລຊີ ແລະ ການສື່ສານ ກໍໄດ້ປະກອບຄໍາຄິດເຫັນຢ່າງກົງໄປກົງມາກ່ຽວກັບການຈັດຕັ້ງປະຕິບັດວຽກງານ ຂອງພະແນກເຕັກໂນໂລຊີ ແລະ ການສື່ສານ ເພື່ອໃຫ້ສອດຄ່ອງກັບພາລະບົດບາດໜ້າທີ່, ຄົ້ນຄວ້າແກ້ໄຂບັນຫາຂໍ້ຄົງຄ້າງ ແລະ ແຜນຈັດຕັ້ງປະຕິບັດວຽກງານໃນຕໍ່ໜ້າ, ຊອກໃຫ້ເຫັນທ່າແຮງຂອງແຂວງເພື່ອໝູນໃຊ້ວຽກງານເຕັກໂນໂລຊີ ແລະ ການສື່ສານ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງແຂວງ ໃຫ້ມີຄວາມເຂັ້ມແຂງ.

     ໃນຕອນທ້າຍ, ທ່ານລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານຂອງພະແນກທີ່ຍາດມາໄດ້ໃນໄລຍະຜ່ານມາ, ພ້ອມທັງໄດ້ຊີ້ນໍາໃຫ້ພະແນກເອົາໃຈໃສ່ເຄື່ອນໄຫວວຽກງານຕາມພາລະບົດບາດຂອງຕົນ ອັນສໍາຄັນແມ່ນຕ້ອງເອົາໃຈໃສ່ປັບປຸງທາງດ້ານບຸກຄະລາກອນ, ປັບປຸງແບບແຜນວິທີການເຮັດວຽກ, ປຸກລະດົມຂົນຂວາຍທາງດ້ານແນວຄິດ, ຈິນຕະນາການ ເພື່ອຈັດຕັ້ງປະຕິບັດໜ້າທີ່ວຽກງານ ໂດຍສະເພາະແມ່ນຕ້ອງກໍາໄດ້ແຜນພັດທະນາເສດຖະກິດ-ສັງຄົມ ຂອງແຂວງ ເພື່ອນໍາເອົາວຽກງານເຕັກໂນໂລຊີ ແລະ ການສື່ສານ ປະກອບສ່ວນເຂົ້າຊ່ວຍໃນການພັດທະນາວຽກງານໃນທຸກໆຂະແໜງການຂອງແຂວງໃຫ້ມີຄວາມເຂັ້ມແຂງ ແລະ ມີປະສິດທິພາບ ແລະ ປະສິດທິຜົນສູງກວ່າເກົ່າ.

         ພາບ+ຂ່າວ: ຫ້ອງການ, ພະແນກປະຊາສໍາພັນ

 

ຊົມເຊີຍວັນໂທລະຄົມມະນາຄົມ 157 ປີ
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 17
ສະຖິຕິຂະແໜງ ເຕັກໂນໂລຊີ ແລະ ການສື່ສານ ປີ 2020
ລະ​ບົບ​ຂື້ນ​ທະ​ບຽນ​ປະ​ຊຸມ