ທ່ານລັດຖະມົນຕີກະຊວງ ຕສ ໄດ້ຮັບຫຼຽນໄຊ ມິດຕະພາບຈາກສະຫະພັນລັດເຊຍ.

02/12/2021

ທ່ານລັດຖະມົນຕີກະຊວງ ຕສ ໄດ້ຮັບຫຼຽນໄຊ ມິດຕະພາບຈາກສະຫະພັນລັດເຊຍ.

        ໃນວັນທີ 1 ທັນວາ 2021 ຜ່ານມານີ້, ທີ່ສະຖານເອກອັກຄະລັດຖະທູດແຫ່ງສະຫະພັນລັດເຊຍ ປະຈໍາ ສປປ ລາວ ທ່ານ ບັນດິດ ສຈ ບໍ່ວຽງຄໍາ ວົງດາລາ ລັດຖະມົນຕີກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ຮັບຫຼຽນໄຊ ມິດຕະພາບ ຈາກສະຫະພັນລັດເຊຍ, ຕາງໜ້າປະດັບຫຼຽນໄຊໂດຍ ທ່ານ ວະລາດິເມຍ ເອ. ກາລີນີ (Vladimir A.KALININ) ເອກອັກຄະລັດຖະທູດວິສາມັນ ຜູ້ມີອໍານາດເຕັມ ແຫ່ງສະຫະພັນລັດເຊຍ ປະຈໍາ ສປປ ລາວ.

      ທ່ານ ວະລາດິເມຍ ເອ. ກາລີນີ ໄດ້ກ່າວວ່າ: ການຍ້ອງຍໍອັນສູງສົ່ງ ກໍ່ຄືການປະດັບຫຼຽນໄຊນີ້ ແມ່ນຜົນງານອັນດີເດັ່ນພິເສດ ໃນການເສີມສ້າງມິດຕະພາບການຮ່ວມມື, ຄວາມເຂົ້າໃຈຊຶ່ງກັນ ແລະ ກັນ ລະຫວ່າງປະຊາຊົນສອງຊາດ ລາວ-ລັດເຊຍ. ຊຶ່ງຫຼຽນໄຊດັ່ງກ່າວນີ້, ຈະເປັນຫຼັກຖານອ້າງອີງ, ປະກອບສ່ວນເຂົ້າໃນການພັດທະນາ ຄູ່ຮ່ວມມືຍຸດທະສາດ ແລະ ການຮັດແໜ້ນສາຍພົວພັນມິດຕະພາບລະຫວ່າງສອງປະເທດ. ໃນຫຼາຍປີຜ່ານມານີ້, ການຮ່ວມມືທາງດ້ານການສືກສາ ໄດ້ຮັບການພັດທະນາຢ່າງຕັ້ງໜ້າ ແລະ ເພີ່ມຂຶ້ນຢ່າງຕໍ່ເນື່ອງ ເຊັ່ນ: ລັດເຊຍໄດ້ໃຫ້ທືນແກ່ ສປປ ລາວ ໄປສຶກສາຕໍ່ ໃນຂັ້ນມະຫາວິທະຍາໄລ 92 ທຶນ ໃນສົກປີ 2020-2021. ພ້ອມນີ້, ໄດ້ມີການແລກປ່ຽນດ້ານການສືກສາ ແລະ ວິທະຍາສາດ ລະຫວ່າງມະຫາວິທະຍາໄລລາວ ກັບສະຖາບັນການສຶກສາຊັ້ນສູງຂອງລັດເຊຍ ແລະ ຍັງມີຫຼາຍຜົນງານປະກອບສ່ວນຊ່ວຍເຫຼືອອີກຫຼາຍດ້ານ ທີ່ນັບມື້ນັບເພີ່ມຂຶ້ນ ແລະ ຂະຫຍາຍຕົວຢ່າງບໍ່ຢຸດຢັ້ງ ບົນພື້ນຖານຄວາມສະເໝີພາບ, ຄວາມໃວ້ເນື້ອເຊື້ອໃຈ, ເປີດກວ້າງ, ເປີດເຜີຍ ແລະ ມີຜົນປະໂຫຍດຊຶ່ງກັນ ແລະ ກັນ.

           ໃນໂອກາດນີ້, ທ່ານ ບັນດິດ ສຈ. ບໍ່ວຽງຄໍາ ວົງດາລາ ໄດ້ສະແດງຄວາມຂອບໃຈຕໍ່ທ່ານ ວະລາດິເມຍ ເອ. ກາລີນີ ທີ່ໄດ້ຕາງໜ້າປະດັບຫຼຽນໄຊ ແລະ ຈະສືບຕໍ່ສົ່ງເສີມ ການຮ່ວມມືທາງດ້ານວຽກງານເຕັກໂນໂລຊີ ແລະ ການສື່ສານ ລະຫວ່າງ ລັດເຊຍ-ລາວ ແລະ ລະຫວ່າງອາຊຽນ (ASEAN) - ລັດເຊຍ ໃຫ້ນັບມື້ແໜ້ນແຟ້ນ ແລະ ເພີ່ມຂຶ້ນເລື້ອຍໆ.

            ຂ່າວ: ພະແນກປະຊາສໍາພັນ, ຫ້ອງການກະຊວງ.

 

ສະຖິຕິຂະແໜງ ເຕັກໂນໂລຊີ ແລະ ການສື່ສານ ປີ2019
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 17
ລະ​ບົບ​ຂື້ນ​ທະ​ບຽນ​ປະ​ຊຸມ