ຮອງລັດຖະມົນຕີກະຊວງ ຕສ ເຂົ້າຮ່ວມກອງປະຊຸມລັດຖະມົນຕີ ໄອຊີທີ 2021 ຜ່ານລະບົບກອງປະຊຸມທາງໄກ.

02/12/2021

ຮອງລັດຖະມົນຕີກະຊວງ ຕສ  ເຂົ້າຮ່ວມກອງປະຊຸມລັດຖະມົນຕີ ໄອຊີທີ 2021 ຜ່ານລະບົບກອງປະຊຸມທາງໄກ.

     ໃນວັນທີ 01 ທັນວາ 2021 ນີ້, ທ່ານ ບຸນສະເຫລີມໄຊ ເຄນນາວົງ ຮອງລັດຖະມົນຕີ ກະຊວງ ເຕັກໂນໂລຊີ ແລະ ການສື່ສານ (ກຕສ) ພ້ອມ​ດ້ວຍ​ຄະນະ ໄດ້ເຂົ້າຮ່ວມກອງປະຊຸມລັດຖະມົນຕີ ໄອຊີທີ 2021 (2021 ICT Ministerial Meeting) ທີ່ ເຊອຸນ ສ.ເກົາຫຼີ, ຜ່ານລະບົບກອງປະຊຸມທາງໄກ. ມີບັນດາລັດຖະມົນຕີ/ຮອງລັດົຖະມົນຕີທາງດ້ານ ໄອຊີທີ ຂອງ 10 ປະເທດຄູ່ຮ່ວມມືເສດຖະກິດ ຄື: : ສປປ ລາວ, ສສ ຫວຽດນາມ, ກຳປູເຈຍ, ອິນໂດເນເຊຍ, ມາເລເຊຍ, ສິງກະໂປ, ອາແຊັກໄບຊັນ, ກາຊັກສະຖານ, ມົງໂກລີ ແລະ ອຸສະແບກິດສະຖານເຂົ້າຮ່ວມ.

    ໃນໂອກາດນີ້, ທ່ານຮອງລັດຖະມົນຕີ ໄດ້ປະກອບຄຳເຫັນໃນຫົວຂໍ້: “ການເຊື່ອມໂຍງດ້ານອິນເຕີເນັດຄວາມໄວສູງ ຫຼື ບຣອດແບນ (Broadband Connectivity)”, ຊຶ່ງທ່ານໄດ້ກ່າວວ່າ: ໃນປະຈຸບັນ ສປປ ລາວ ໄດ້ໃຫ້ຄວາມສຳຄັນຂອງການນຳໃຊ້ເຕັກໂນໂລຊີດີຈີຕອນ ເຂົ້າໃນການຫັນເປັນອຸດສາຫະກຳ ແລະ ທັນສະໄໝ ເປັນຕົ້ນ: ການປັບປຸງຄຸນນະພາບການບໍລິການ ແລະ ບໍລິຫານຂອງລັດຖະບານ. ຊຶ່ງໃນ​ເດືອນພະຈິກ 2021 ຜ່ານມານີ້, ກອງປະຊຸມສະໄໝສາມັນເທື່ອທີ 2 ຂອງສະພາ​ແຫ່ງ​ຊາດ ຊຸດທີ IX ​ນີ້, ​ໄດ້ຮັບຮອງເອົາວິໄສທັດ 20 ປີ (2021-2040), ຍຸດທະສາດ 10 ປີ (2021-2030) ແລະ ແຜນ​ພັດທະນາ ​ເສດຖະກິດ​ດິຈິຕອນ​ແຫ່ງຊາດ 5 ປີ (2021-2025) ຂອງ ສປປ ​ລາວ. ພ້ອມດຽວກັນນີ້, ໄດ້​​ປັບ​ປຸງ​ໂຄງ​ລ່າງ ICT ຢ່າງ​ຕໍ່​ເນື່ອງ ເພື່ອຊ່ວຍຕອບສະຫນອງຄວາມຕ້ອງການທີ່ເພີ່ມຂຶ້ນຂອງພົນລະເມືອງ ແລະ ການພັດທະນາເສດຖະກິດໃນປະຈຸບັນ ໂດຍສະເພາະໃນໄລຍະການດໍາລົງຊີວິດແບບໃໝ່ New Normal. ປະຈຸບັນ ສປປ ລາວ ມີເຄືອຂ່າຍມືຖື ກວມເອົາຫຼາຍກວ່າ 95% ຂອງຈໍານວນບ້ານທັງໝົດທົ່ວປະເທດ ແລະ ການນໍາໃຊ້ອິນເຕີເນັດຫຼາຍກ່ວາ 50% ຂອງເຄືອຂ່າຍ ເຖິງແມ່ນວ່າການເຂົ້າເຖິງບຣອດແບນມືຖືໄດ້ເພີ່ມຂຶ້ນ, ແຕ່ໃນຊົນນະບົດ ແລະ ເຂດຫ່າງໄກສອກຫຼີກບາງບ່ອນ ແມ່ນຍັງບໍ່ໄດ້ຮັບການບໍລິການທີ່ທົ່ວເຖີງ. ສະນັ້ນ, ຕໍ່ກັບບັນຫາດັ່ງກ່າວ ກະຊວງ ຕສ ຈຶ່ງໄດ້ກຳນົດ 3 ມາດຕະການຫຼັກຄື: (1)ການສ້າງຕັ້ງກອງທຶນພັດທະນາໂທລະຄົມມະນາຄົມ ແລະ ການຫັນເປັນດິຈິຕອນ; (2)ເພີ່ມທະວີການຮ່ວມມືກັບຜູ້ປະກອບການ ແລະ ພາກເອກະຊົນໃຫ້ຫຼາຍຂຶ້ນ, (3)ສືບຕໍ່ຮ່ວມ​ມື​ກັບ​ເພື່ອນ​ມິດ​ໃນ​ພາກ​ພື້ນ-​ສາ​ກົນ​ ເພື່ອປຶກສາຫາລື, ແລກປ່ຽນຄວາມຄິດເຫັນ ກ່ຽວກັັບ​ເຕັກ​ໂນ​ໂລ​ຊີ​ໃໝ່ໆ ​ແລະ​ ຊອກ​ຫາ, ຍາດແຍ່ງ​ການ​ຊ່ວຍ​ເຫຼືອ​ໃນ​ເງື່ອນ​ໄຂ​ຕ່າງໆທີ່ເໝາະສົມ.

       ກອງປະຊຸມໃນຄັ້ງນີ້ ເປັນໂອກາດອັນດີ ໃຫ້ແກ່ ສປປ ລາວ ກໍຄືກະຊວງ ຕສ ໃນການແລກບົດຮຽນ ແລະ ປະສົບການກັບບັນດາປະເທດທີ່ເຂົ້າຮ່ວມ ຕໍ່ກັບການນຳໃຊ້ເຕັກໂນໂລຊີດິຈິຕອນ ແລະ ບັນດານະໂຍບາຍ ທາງດ້ານໂທລະຄົມມະນາຄົມ ແລະ ໄອຊີທີ ເພື່ອເປັນເຄື່ອງມືໃນການຮັບມືການແຜ່ລະບາດ ແລະ ຮັບປະກັນໃຫ້ແກ່ການຟື້ນຟູເສດຖະກິດພາຍຫຼັງ COVID-19, ທັງເປັນການຜັນຂະຫຍາຍທິດທາງຂອງລັດຖະບານ ໃນການເສີມຂະຫຍາຍສາຍພົວພັນ ກັບບັນດາປະເທດຄູ່ຮ່ວມມື, ບັນດາປະເທດອາຊຽນ ລວມທັງອົງການຈັດຕັ້ງສາກົນຕ່າງໆ ເພື່ອຍາດແຍ່ງເອົາການຮ່ວມມື ຊ່ວຍເຫຼືອ ແລກປ່ຽນບົດຮຽນເຊິ່ງກັນ ແລະ ກັນ.

         ໃນຕອນທ້າຍ ກອງປະຊຸມ ທ່ານ ຮອງລັດຖະມົນຕີ ກະຊວງ ຕສ ໄດ້ສະແດງຄວາມຂອບໃຈ ຕໍ່ທ່ານ ລັດຖະມົນຕີ ກະຊວງວິທະຍາສາດ ແລະ ໄອຊີທີ ສາທາລະນະລັດ ເກົາຫຼີ ທີ່ໄດ້ໃຫ້ຄຳໝັ້ນສັນຍາປະກອບສ່ວນເຂົ້າໃນການພັດທະນາພາກພື້ນ ໂດຍຜ່ານຜົນປະໂຫຍດຕົວຈິງຂອງເຕັກໂນໂລຊີດີຈີຕອນ ແລະ ຊົມເຊີຍ ຕໍ່ການຊ່ວຍເຫລືອໄລຍະຜ່ານມາ, ການຮ່ວມມືໃນຂອບສອງຝ່າຍ ທີ່ໄດ້ລົງນາມບົດບັນທຶກຄວາມເຂົ້າໃຈ ລະຫວ່າງ ກະຊວງ ຕສ ແລະ ກະ​ຊວງ ວິ​ທະ​ຍາ​ສາດ ແລະ ໄອ​ຊີ​ທີ (MSIT) ສ. ເກົາຫລີ ໃນໄລຍະ 2019-2022 ແລະ ຈະສືບຕໍ່ແບບອັດຕະໂນມັດ ເພີ່ມຕື່ມອີກ 2 ປີ.

          ຂ່າວໂດຍ : ພະແນກອົງການຈັດຕັ້ງສາກົນ ແລະ ສອງຝ່າຍ, ຫ້ອງການກະຊວງ, ກະຊວງ ຕສ.

          ກວດແກ້: ພະແນກປະຊາສໍາພັນ.

 

ຊົມເຊີຍວັນໂທລະຄົມມະນາຄົມ 157 ປີ
ສະຖິຕິຂະແໜງ ເຕັກໂນໂລຊີ ແລະ ການສື່ສານ ປີ2021
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບຫຼ້າສຸດ
ວາ​ລະ​ສານ ໄອ​ຊີ​ທີ 17
ລະ​ບົບ​ຂື້ນ​ທະ​ບຽນ​ປະ​ຊຸມ