ກອງປະຊຸມ ສະພາປະຊາຄົມເສດຖະກິດອາຊຽນ ຮ່ວມກັບ ຄະນະລັດຖະມົນຕີດິຈິຕອນອາຊຽນ ຄັ້ງທຳອິດ.

19/10/2021

ກອງປະຊຸມ ສະພາປະຊາຄົມເສດຖະກິດອາຊຽນ ຮ່ວມກັບ ຄະນະລັດຖະມົນຕີດິຈິຕອນອາຊຽນ ຄັ້ງທຳອິດ.

     ໃນວັນທີ 18 ຕຸລາ 2021 ນີ້, ທ່ານ ບຸນສະເຫຼີມໄຊ ເຄນນາວົງ,​ ຮອງລັດຖະມົນຕີ ກະຊວງ ເຕັກໂນໂລຊີ ແລະ ການສື່ສານ (ກຕສ) ໄດ້ນໍາພາຄະນະເຂົ້າຮ່ວມ ກອງ​ປະ​ຊຸມ​ສະພາປະຊາຄົມເສດຖະກິດອາຊຽນ ຮ່ວມກັບ ຄະນະລັດຖະມົນຕີ ດິຈິຕອນ ອາຊຽນ (The Interface Meeting between the AEC Council and the ASEAN Digital Ministers) ຜ່ານລະບົບກອງປະຊຸມທາງໄກ. ຊື່ງກອງປະຊຸມດັ່ງກ່າວນີ້ ເປັນວາລະພິເສດໜຶ່ງ ຂອງ ກອງປະຊຸມສະພາປະຊາຄົມເສດຖະກິດອາຊຽນ ຄັ້ງທີ 20 (The 20th ASEAN Economic Community Council  (AEC) Meeting). ໂດຍການເປັນເຈົ້າພາບຂອງ ປະເທດບຣູໄນ.  ມີບັນດາ ລັດຖະມົນຕີ ເສດຖະກິດ ອາຊຽນ, ລັດຖະມົນຕີດິຈິຕອນອາຊຽນ, ເລຂາທິການໃຫຍ່ອາຊຽນ, ເຈົ້າໜ້າທີ່ອາວຸໂສດ້ານເສດຖະກິດ, ເຈົ້າໜ້າທີ່ ອາວຸໂສ ດິຈິຕອນ ອາຊຽນ ແລະ ຄະນະຮັບຜິດຊອບ ຈາກ 10 ປະເທດສະມາຊິກອາຊຽນ ເຂົ້າ​ຮ່ວ​ມ.

      ການຈັດກອງປະຊຸມໃນຄັ້ງນີ້, ແມ່ນເພື່ອປຶກສາຫາລື ບັນຫາສຳຄັນໃນການມີສ່ວນຮ່ວມຂອງວຽກງານ ດິຈິຕອນ ໃນການຫັນເປັນທັນສະໄໝ ໂດຍສະເພາະ ແມ່ນວຽກງານເສດຖະກິດ ໃຫ້ສາມາດຂັບເຄື່ອນໄປໄດ້, ເຖິງ ຈະພົບຄວາມຫຍຸ້ງຍາກຈາກການແຜ່ລະບາດ​ຂອງພະຍາດ COVID-19 ໃນປະຈຸບັນ. ຊຶ່ງເນື້ອໃນທີ່ໄດ້ນໍາມາ ປຶກສາຫາລືກັນ ປະກອບມີ: (1)ການຫັນເປັນດິຈິຕອນຂອງອາຊຽນ: ຮ່າງຖະແຫຼງການຜູ້ນໍາ ວ່າດ້ວຍການຫັນເປັນ ດິຈິຕອນຂອງອາຊຽນ, ແຜນງານ Bandar Seri Begawan, ແຜນແມ່ບົດດິ​ຈິ​ຕອນອາ​ຊຽນ 2025 (ADM2025); (2)ແລກປ່ຽນທັດສະນະກ່ຽວກັບ ຂະບວນການສົ່ງເສີມ ແລະ ການເຮັດວຽກຮ່ວມກັນ ລະຫວ່າງ ບັນດາຂະແໜງການຕ່າງໆ ທີ່ຢູ່ພາຍໃຕ້ເສົາຄໍ້າປະຊາຄົມເສດຖະກິດ ໃນການຂັບເຄື່ອນ ການຫັນເປັນດິຈິຕອນຂອງ ອາຊຽນ; (3)ການຮັບຮອງເອົາຮ່າງຖະແຫຼງການຜູ້ນໍາ ວ່າດ້ວຍການຫັນເປັນດິຈິຕອນຂອງອາຊຽນ (Leaders’ Statement on Advancing the Digital Transformation of ASEAN).

        ໃນໂອກາດນີ້, ກອງປະຊຸມໄດ້ຕົກລົງຮັບຮອງເອົາຖະແຫຼງການຜູ້ນໍາອາຊຽນ ວ່າດ້ວຍ ການຫັນເປັນດິ ຈິຕອນ ຂອງອາຊຽນ ເພື່ອນຳເອົາໄປລາຍງານ ໃຫ້ແກ່ ກອງປະຊຸມສຸດຍອດອາຊຽນ ຄັ້ງທີ 38 ແລະ 39 ພິຈາລະນາ ໂດຍຈະຈັດຂຶ້ນໃນລະຫວ່າງວັນທີ 26-28 ຕຸລາ 2021 ທີ່ຈະມາເຖິງນີ້ ທີ່ ປະເທດບຮູ​ໄນ. ພ້ອມນີ້, ໃນກອງປະຊຸມ ເລຂາທິການໃຫຍ່ອາຊຽນ ແລະ ບັນດາ ລັດ​ຖະ​ມົນ​ຕີເສດຖະກິດ ອາຊຽນ ໄດ້ສະແດງຄວາມຊົມເຊີຍ ຕໍ່ບັນດາ ລັດ​ຖະ​ມົນ​ຕີດິຈິຕອນອາຊຽນ ທີ່ໄດ້ຊີ້ນຳໃນການຮ່າງເນື້ອໃນເອກະສານ ຮ່າງຖະແຫຼງການຜູ້ນຳ ວ່າດ້ວຍການຫັນເປັນ ດິຈິຕອນອາຊຽນ ແລະ ຊົມເຊີຍຕໍ່ລັດ​ຖະ​ມົນ​ຕີດິຈິຕອນ ອາຊຽນ ທີ່ເຫັນໄດ້ເຖິງຄວາມສຳຄັນຂອງວຽການຫັນເປັນ ດິຈິຕອນ ໃນພາກພື້ນ. ຊຶ່ງເນື້ອໃນດັ່ງກ່າວ ໄດ້ຕິດພັນກັບວຽກງານທຸກເສົ້າຄໍ້າໃນອາຊຽນ ແລະ ເຫັນໄດ້ວ່າຂະ     ແໜງການ ດິຈິຕອນ ເປັນບັນຫາສຳຄັນໜຶ່ງໃນການຊ່ວຍສະໜັບສະໜຸນ ໃຫ້ຂະແໜງການຕ່າງໆ ສາມາດບັນລຸຕາມຈຸດປະສົງ ແລະ ເປົ້າໝາຍທີ່ໄດ້ວາງໄວ້.

       ພ້ອມດຽວກັນນີ້, ກອງປະຊຸມໄດ້ເປັນເອກະພາບກັນ ສືບຕໍ່ຮ່ວມມືກັນ ແລະ ມີສ່ວນຮ່ວມໃນທຸກພາກ ສ່ວນ, ທຸກຂະແໜງການໃນພາກພື້ນຂອງອາຊຽນ ຊຶ່ງໄດ້ເປັນປັດໃຈພື້ນຖານໜຶ່ງ ໃນການຊ່ວຍຂັບເຄື່ອນ ວຽກງານທີ່ໄດ້ຮັບຮອງກັນໃນຄັ້ງນິ້ ໃຫ້ບັນລຸຕາມເປົ້າໝາຍ ຂອງຖະແຫຼງການຜູ້ນໍາອາຊຽນໃນຄັ້ງນີ້.  

           ຂ່າວ​ໂດຍ:   ພະ​ແນກ​ອາ​ຊຽນ, ກົມ​ແຜນ​ການ ແລະ ການ​ຮ່ວມ​ມື.

           ພາບ-ກວດ​ແກ້:  ຫ້ອງ​ການ​ກະ​ຊວງ.

 

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2019
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 17
ລະ​ບົບ​ຂື້ນ​ທະ​ບຽນ​ປະ​ຊຸມ