ລັດຖະມົນຕີ ກະຊວງ ຕສ ເຂົ້າຮ່ວມກອງປະຊຸມໂຕະມົນ ລະດັບລັດຖະມົນຕີ ຂອງອົງການ ITU

13/10/2021

ລັດຖະມົນຕີ ກະຊວງ ຕສ ເຂົ້າຮ່ວມກອງປະຊຸມໂຕະມົນ ລະດັບລັດຖະມົນຕີ ຂອງອົງການ ITU

        ທ່ານ ສຈ. ບັນດິດ ບໍ່ວຽງຄຳ ວົງດາລາ, ລັດຖະມົນຕີ ກະຊວງ ​ເຕັກໂນໂລຊີ ​ແລະ ການ​ສື່ສານ (ກຕສ) ພ້ອມ​ດ້ວຍ​ຄະນະ​ໄດ້​ເຂົ້າ​ຮ່ວມກອງ​ປະຊຸມ​ໂຕະ​ມົນ ລ​ະ​ດັບ​ລັດ​ຖະ​ມົນ​ຕີ ຂອງ​ສະ​ຫະ​ພາບ​ໂທ​ລະ​ຄົມ​ມະ​ນາ​ຄົມ​ສາ​ກົນ (ITU) ໃນ​ລະຫວ່າງວັນ​ທີ 12-14 ຕຸ​ລາ 2021 ນີ້, ຜ່ານລະ​ບົບ​ກອງປະຊຸມທາງ​ໄກ, ໃນ​ງານໄອ​ທີ​ຢູດິ​ຈິ​ຕອນໂລກ 2021 (ITU Digital World 2021)​. ຊຶ່ງ​ງານ​ດັ່ງ​ກ່າວ​ແມ່ນ​ຈັດ​ຂຶ້ນ​ໂດຍ ອົງ​ການ ITU ຮ່ວມ​ກັບ ກະ​ຊວງ ຖະ​ແຫຼ່ງ​ຂ່າວ ແລະ ການ​ສື່​ສານ ສ​ສ.ຫວຽດ​ນາມ. ທີ່ເຈນີວາ, ປະເທດສະວິດເຊີແລນ.

          ໃນປີນີ້ ITU Digital World ​ໄດ້ຈັດ​ຂຶ້ນ ພ້ອມທັງເປັນການສະເຫຼີມສະຫຼອງການຈັດງານ ITU Telecom ຄົບຮອບ 50 ປີ ພາຍ​ໃຕ້​ຫົວ​ຂໍ້ “ການ​ສ້າງ​ໂລກ​ດິ​ຈິ​ຕອນດ້ວຍ​ກັນ” ​ເພື່ອປຶກສາຫາລືວຽກງານໄອຊີທີ, ການວາງນະໂຍບາຍ, ກົນລະຍຸດການຂັບເຄື່ອນດິຈິຕອນ ທີ່ຈະຮ່ວມກັນສ້າງການເຊື່ອມຕໍ່ ແລະ ເຕັກໂນໂລຊີດິຈິຕອນ. ພ້ອມດຽວກັນນີ້, ຍັງມີ​ງານ​ວາງ​ສະ​ແດງ ITU Virtual Exhibition ທີ່​ເຊີນ​ເອົາ​ບັນ​ດາ ພາກ​ລັດ, ພາກ​ເອ​ກະ​ຊົນ ແລະ ​ຜູ້​ປະ​ກອບ​ການ​ທາງ​ດ້ານ​ໄອ​ຊີ​ທີ ລະ​ດັບ​ສາ​ກົນ ເຂົ້າ​ຮ່ວມ​ເປີດ​ບູດ​ ວາງ​ສະ​ແດງບັນ​ດາຜະ​ລິດ​ຕະ​ພັນ​ຂອງ​ຕົນ ​ໂດຍຜ່ານ​ລະ​ບົບ​ອອນ​ໄລ ​ເພື່ອ​ເປີດ​ໂອ​ກາດໃນການ​ສ້າງ​ຄູ່​ຮ່ວມ​ມື, ​ລົງທຶນ​, ​ແລກປ່ຽນ​ບົດຮຽນຊຶ່ງກັນ ແລະ ກັນລະຫວ່າງ​ພາກ​ພຶ້ນ -ສາກົນ.

        ໃນ​​ໂອກ​າດນີ້, ທ່ານ ສຈ. ບັນດິດ ບໍ່ວຽງຄຳ ວົງດາລາ ​ໄດ້​ປະ​ກອບ​ຄຳ​ເຫັນ​ໃນ​ຫົວ​ຂໍ້: “ການຫຼຸດຕົ້ນທຶນການເຂົ້າເຖິງການເຊື່ອມຕໍ່ທີ່ມີລາຄາຖືກ, ມັນສາມາດເລັ່ງການຫັນເປັນດິຈິຕອນໄດ້ ຫຼື ບໍ່”  ຂອງ ສ​ປ​ປ ລາວ ພ້ອມ​ທັງ​​ສົ​ນ​ທະ​ນາ​ແລກ​ປ່ຽນ​ຄຳ​ຄິດ​ເຫັນ ຕໍ່ກັບທັດສະນະດ້ານການກຳນົດລາຄາ, ການເຂົ້າເຖິງຂໍ້ມູນສຳລັບທ້ອງຖິ່ນ, ທັກສະດ້ານດິຈິຕອນ ລວມໄປເຖິງວຽກງານ ການກຳນົດນະໂຍບາຍ, ລະບົບພື້ນຖານໂຄງລ່າງ ແລະ ບັນດາຕົວຂັບເຄື່ອນ ເພື່ອຊ່ວຍເລັ່ງການຫັນປ່ຽນດິຈິຕອນ  ກັບ​ບັນ​ດາ​ປະ​ເທດ​ສະ​ມາ​ຊິກທີ່ເຂົ້າຮ່ວມ ແລະ ໄອ​ທີ​ຢູ. ພ້ອມນັ້ນ, ກໍ່ໄດ້ຍົກໃຫ້ເຫັນບັນຫາ ຄວາມສຳຄັນຂອງການເຊື່ອມຕໍ່ ແລະ ເຕັກໂນໂລຊີດິຈີຕອນ ທີ່ມີຄວາມຈຳເປັນ ໃນຍຸດທະສາດແຫ່ງຊາດ ຂອງການຟື້ນຟູເສດຖະກິດ.

         ການເຂົ້າຮ່ວມກອງປະຊຸມຄັ້ງນີ້ ແມ່ນເປັນໂອກາດອັນດີ ຂອງ ສປປ ລາວ ກໍ່ຄື ກະຊວງ ຕສ ໃນນາມປະເທດສະມະຊິກຂອງອົງການ ITU ແລະ ເພື່ອນຮ່ວມມືທີ່ດີກັບ ສສ. ຫວຽດນາມ ໃນ​ການຮັບ​ຮູ້​ບັນດາ​ທິດ​ທາງ, ນະ​ໂຍ​ບາຍ​ ຂອງ​ບັນ​ດາ​ປະ​ເທດ​ທີ່​ມີ​ການ​ພັດ​ທະ​ນາ​ທາງ​ດ້ານເຕັກໂນໂລຊີ​ດິ​ຈີ​ຕອນ. ໃນໂອກາດດຽວກັນນີ້, ສປປ ລາວ ກໍ່ໄດ້ເຂົ້າຮ່ວມເປີດບູດວາງສະແດງ ຜ່ານລະບົບອອນລາຍ ໃນລະຫວ່າງວັນທີ 1 ກັນຍາ ເຖິງ 31 ທັນວາ 2021 ໂດຍມີຜະລິດຕະພັນທາງດ້ານ ໄອຊີທີ ທັງພາກລັດ ແລະ ເອກະຊົນທັງໝົດ 16 ຜະລິດຕະພັນ ກໍຄື ຂອງກະຊວງ ຕສ 7 ຜະລິດຕະພັນ (Lao KYC, G-Chat, G-Share, E-document, E-votting, E-Office, Conference room) ແລະ 9 ຜະລິດຕະພັນແມ່ນຂອງພາກສ່ວນບໍລິສັດ (T-plus, M-services, Unitel, U-Money, E-Visa, Lailaolab, IQURI Tech, M-Money, Mocha Laosaap) ເພື່ອເປັນການເປີດໂອກາດໃຫ້ທັງພາກລັດ ແລະ ທຸລະກິດ ໃນ ສປປ ລາວ ໄດ້ວາງສະແດງບັນດາຜະລິດຕະພັນ, ຜົນງານຂອງຕົນທັງພາຍໃນ ແລະ ລະດັບສາກົນ. ຊຶ່ງມັນໄດ້ສະແດງໃຫ້ເຫັນເຖິງການພັດທະນາທາງດ້ານ ​ໄອ​ຊີ​ທີ ຂອງ ສ​ປ​ປ ລາວ ໃນ​ຍຸກເຕັກ​ໂນ​ໂລ​ຊີດິ​ຈີ​ຕອນ​.

            ສາມາດລົງຖະບຽນເຂົ້າຊົມງານໄດ້ທີ່ websie: https://digitalworld2021.vn/

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2019
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 17
ລະ​ບົບ​ຂື້ນ​ທະ​ບຽນ​ປະ​ຊຸມ