ກອງປະຊຸມປຶກສາຫາລື ອິນເຕີເນັດໂລກ ແລະ ຖານຂໍ້ມູນຂ່າວສານ ລະຫວ່າງອາຊຽນ ແລະ ສປ.ຈີນ

01/10/2021

ກອງປະຊຸມປຶກສາຫາລື ອິນເຕີເນັດໂລກ ແລະ ຖານຂໍ້ມູນຂ່າວສານ ລະຫວ່າງອາຊຽນ ແລະ ສປ.ຈີນ

          ໃນວັນທີ 26 ກັນຍາ 2021 ຜ່ານມານີ້, ທ່ານ ບັນດິດ ສຈ. ບໍ່ວຽງຄຳ ວົງດາລາ,​ ລັດຖະມົນຕີ ກະຊວງ ເຕັກໂນໂລຊີ ແລະ ການສື່ສານ (ກຕສ) ພ້ອມດ້ວຍຄະນະ ໄດ້ເຂົ້າຮ່ວມ ກອງປະຊຸມປຶກສາຫາລື ອິນເຕີເນັດໂລກ ແລະ ຖານຂໍ້ມູນຂ່າວສານ ລະຫວ່າງ ອາຊຽນ-ສປ.ຈີນ 2021 (World Internet Conference and Dialogue on China - ASEAN Information Harbor) ຜ່ານລະບົບກອງປະຊຸມທາງໄກ. ຊຶ່ງຮ່ວມຈັດຂຶ້ນໂດຍ ຄະນະບໍລິຫານງານ ແລະ ຄຸ້ມຄອງອິນເຕີເນັດ ແຫ່ງ ສປ. ຈີນ ແລະ ລັດຖະບານປະຊາຊົນເຂດປົກຄອງຕົນເອງ ກວາງຊີ ຈວງ, ສປ. ຈີນ ພາຍໃຕ້ຄຳຂວັນ “ກ້າວສູ່ຍຸກໃໝ່ຂອງດິຈິຕອນທີ່ຮຸ່ງເຮືອງສີວິໄລ - ການສ້າງຊຸມຊົນທີ່ມີອະນາຄົດຮ່ວມກັນໃນໂລກໄຊເບີ (Towards a New Era of Digital Civilization – Building a Community with a Shared Future in Cyberspace)”. ມີບັນດາທ່ານລັດຖະມົນຕີ ຂອງຂະແໜງການ ໄອຊີທີ ຈາກບັນດາປະເທດໃນອາຊຽນ ເປັນ​ຕົ້ນ ມາ​ເລ​ເຊຍ, ອິນ​ໂດ​ເນ​ເຊຍ, ກຳ​ປູ​ເຈຍ, ສ​ປ​ປ ລາວ ແລະ ສປ. ຈີນ. ລວມທັງພາກລັດ, ເອກະຊົນ, ບັນດາບໍລິສັດ, ຊ່ຽວຊານ ແລະ ນັກພັດທະນາ ໃນທົ່ວໂລກ ຈາກ 05 ປະເທດ ເຂົ້າ​ຮ່ວ​ມ​.

         ການເປີດກອງປະຊຸມໃນຄັ້ງນີ້, ແມ່ນເພື່ອເຕົ້າໂຮມຜູ້ຕາງໜ້າຂອງລັດຖະບານ, ອົງການຈັດຕັ້ງສາກົນ, ພາກທຸລະກິດ, ສະຖາບັນການຄົ້ນຄວ້າ, ຊ່ຽວຊານ, ​ນັກພັດທະນາ ແລະ ຜູ້ຊົມໃຊ້ ເພື່ອຮ່ວມກັນແລກປ່ຽນທັດສະນະກ່ຽວກັບທ່າອ່ຽງໃນດ້ານການພັດທະນາເຕັກໂນໂລຊີອິນເຕີເນັດ ທີ່ທັນສະໄໝ, ການຄຸ້ມຄອງຊ່ອງທາງອິນເຕີເນັດ, ຮັດແໜ້ນການຮ່ວມມືໃນຊ່ອງທາງອິນເຕີເນັດ, ການແບ່ງປັນໂອກາດໃນການພັດທະນາທີ່ຂັບເຄື່ອນດ້ວຍນະວັດຕະກຳ ແລະ ຮ່ວມກັນສ້າງອະນາຄົດທີ່ດີສຳລັບປະຊາຄົມໂລກ ໃນການຫັນໄປສູ່ຍຸກດິຈິຕອນ.

          ໃນໂອກາດນີ້, ທ່ານ ບັນດິດ ສຈ. ບໍ່ວຽງຄຳ ວົງດາລາ ໄດ້ກ່າວບົດປາໄສ ໃນພາກທີ 1: Opening Remarks by Leaders ຂອງກອງປະຊຸມ ເຊິ່ງທ່ານໄດ້ຍົກໃຫ້ເຫັນເຖິງບັນດາແຜນງານສຳຄັນ ໃນອາຊຽນ ທີ່ໄດ້ໃຫ້ຄວາມສຳຄັນໃນການສ້າງພື້ນຖານເສດຖະກິດຂອງພາກພື້ນ ໃຫ້ເຊື່ອມໂຍງກັບເຕັກໂນໂລຊີດິຈິຕອນ ແລະ ອິນເຕີເນັດ ທີ່ທັນສະໄໝ ເຊັ່ນ: (1)ຖະແຫຼງການອາຊຽນວ່າດ້ວຍການຫັນເປັນອຸດສະຫະກຳ 4.0 ໃນປີ 2019; (2) ແຜນການຟື້ນຟູຮອບດ້ານຂອງອາຊຽນ ແລະ ແຜນຈັດຕັ້ງປະຕິບັດເພື່ອເລັ່ງລັດ ໃນການຫັນເປັນດິຈິຕອນດ້ວຍເຕັກໂນໂລຊີດິຈິຕອນ; (3)ແຜນແມ່ບົດດິຈິຕອນອາຊຽນ 2021 – 2025 ແລະ (4) ຂໍ້ຕົກລົງອາຊຽນວ່າດ້ວຍການຄ້າທາງເອເລັກໂຕຼນິກ. ເຊິ່ງບັນດາແຜນງານເຫຼົ່ານີ້ ສະແດງໃຫ້ເຫັນເຖິງຄວາມມຸ້ງໝັ້ນຂອງອາຊຽນໃນການຊອກຫາກາລະໂອກາດ ແລະ ຜົນປະໂຫຍດ ໃນການຫັນໄປສູ່ຍຸກດິຈິຕອນ. ດັ່ງທີ່ຮູ້ກັນວ່າສະພາບການໃນປັດຈຸບັນ ໄດ້ກາຍເປັນປັດໃຈສຳຄັນທີ່ຈະຊ່ວຍໃຫ້ປະເທດອາຊຽນສາມາດຫຼຸດຜ່ອນ ແລະ ຟື້ນຟູຜົນກະທົບທາງເສດຖະກິດ-ສັງຄົມ ຈາກການແຜ່ລະບາດຂອງພະຍາດ COVID-19 ໃນໄລຍະຍາວ ເພື່ອເຮັດໃຫ້ບັນລຸແຜນງານດັ່ງກ່າວ, ອາຊຽນກໍໄດ້ເປີດກວ້າງການຮ່ວມມື ລະຫວ່າງປະເທດຄູ່ຮ່ວມເຈລະຈາ ເຊັ່ນ: ສປ. ຈີນ, ອົງການຈັດຕັ້ງສາກົນ ແລະ ບັນດາພາກເອກະຊົນ. ພ້ອມນີ້ ທ່ານລັດ​ຖະ​ມົນ​ຕີ ຍັງໄດ້ຍົກໃຫ້ເຫັນວ່າ ສປປ ລາວ ກໍຄື ກະຊວງ ຕສ ກໍເຫັນໄດ້ເຖິງຄວາມສຳຄັນ ແລະ ທ່າອ່ຽງແຮງການພັດທະນາ ໃນໂລກແຫ່ງດິຈິຕອນ ເຊັ່ນດຽວກັນ. ໂດຍປະຈຸບັນ ກະຊວງ ຕສ ກຳລັງສຸ່ມໃສ່ການບັນລຸວິໄສທັດການຫັນເປັນດິຈິຕອນ ແລະ ການນໍາໃຊ້ຜົນປະໂຫຍດຈາກເສດຖະກິດດິຈິຕອນ ໃຫ້ເປັນຂົງເຂດບູລິມະສິດຫຼັກຂອງ ແຜນງານແຫ່ງຊາດ ເພື່ອສ້າງໂອກາດ ແລະ ເພີ່ມຂີດຄວາມສາມາດທາງເສດຖະກິດ-ສັງຄົມ, ຍົກລະດັບຊີວິດຄວາມເປັນຢູ່ທີ່ດີໃຫ້ແກ່ປະຊາຊົນ.

               ການເຂົ້າຮ່ວມກອງປະຊູມປຶກສາຫາລື ແລະ ແລກປ່ຽນຄັ້ງນີ້ ຈະຊ່ວຍໃຫ້ ສປປ. ລາວ ສາມາດຖອດຖອນບົດຮຽນຈາກຫຼາຍພາກສ່ວນໃນການຂະບວນການຂັບເຄື່ອນປະເທດໄປສູ່ຍຸກດິຈິຕອນ, ຂົນຂວາຍໂອກາດການຊ່ວຍເຫຼືອການພັດທະນາພື້ນຖານໂຄງລ່າງດິຈິຕອນ ແລະ ໄອຊີທີ. ສືບຕໍ່ເສີມຂະຫຍາຍສາຍພົວພັນຮ່ວມມືທີ່ດີກັບຄູ່ຮ່ວມຍຸດທະສາດ ອາຊຽນ-ຈີນ ແລະ ລາວ-ຈີນ ເພື່ອແນ່ໃສ່ໃນການສ້າງຜົນປະໂຫຍດຮ່ວມກັນຂອງທຸກພາກສ່ວນ. ໃນໂອກາດນີ້, ພິເສດ ປີນີ້ ເປັນປີສະເຫຼີມສະຫຼອງຄົບຮອບ 30 ປີ ການພົວພັນຮ່ວມມື ອາຊຽນ-ຈີນ ແລະ ຄົບຮອບ 60 ປີ ແຫ່ງການສ້າງຕັ້ງສາຍພົວພັນການທູດ ກໍຄືປີມິດຕະພາບ ລາວ-ຈີນ ແລະ ຈີນ-ລາວ.

                 ຂ່າວ​ໂດຍ:   ພະ​ແນກ​ອາ​ຊຽນ, ກົມ​ແຜນ​ການ ແລະ ການ​ຮ່ວມ​ມື

                ພາບ-ກວດ​ແກ້:   ຫ້ອງ​ການ​ກະ​ຊວງ

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2019
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 17
ລະ​ບົບ​ຂື້ນ​ທະ​ບຽນ​ປະ​ຊຸມ