ພິທີປະກາດຜົນລາງວັນ Lao ICT Award 2021.

10/09/2021

ພິທີປະກາດຜົນລາງວັນ Lao ICT Award 2021.

         ໃນບ່າຍວັນທີ 10 ກັນຍາ 2021 ນີ້, ກົມເຕັກໂນໂລຊີການສື່ສານຂໍ້ມູນຂ່າວສານ, ກະຊວງ ເຕັກໂນໂລ ແລະ ການສື່ສານ (ກຕສ), ໄດ້ປະກາດຜົນການແຂ່ງຂັນ ລາວໄອຊີທີ ປະຈຳປີ 2021 (Lao ICT Award 2021) ຂື້ນທີ່ສະຖາບັນເຕັກໂນໂລຊີການສື່ສານຂໍ້ມູນຂ່າວສານ. ຊຶ່ງເປັນກຽດເຂົ້າຮ່ວມໂດຍ ທ່ານ ປອ ສັນຕິສຸກ ສິມມະລາວົງ ຮອງລັດຖະມົນຕີ ກະຊວງ ຕສ ພ້ອມດ້ວຍແຂກທີ່ຖືກເຊີນ ຈາກບັນດາກົມ/ທຽບເທົ່າ, ບໍລິສັດ, ທະນາຄານ, ຫົວໜ່ວຍທຸລະກິດ ແລະ ສະຖາບັນການສຶກສາ.

          ການແຂ່ງຂັນຄັ້ງນີ້ ເປັນການແຂ່ງຂັນ ລາວໄອຊີທີ ຄັ້ງທີ 4  ຊຶ່ງເລີ່ມຈັດແຕ່ປີ 2017 (ຍົກເວັ້ນປີ 2020 ເນື່ອງຈາກການແຜ່ລະບາດຂອງພະຍາດໂຄວິດ) ແຕ່ຄັ້ງນີ້ ເນື່ອງຈາກການແພ່ລະບາດຂອງພະຍາດ COVID-19 ຈຶ່ງໄດ້ຫັນການຈັດງານມາເປັນຮູບແບບການຖ່າຍທອດສົດຜ່ານສື່ສັງຄົມອອນລາຍ ຜ່ານທາງເຟສບຸກເພສ (https://www.facebook.com/LaoICTAward.Official) ເພື່ອໃຫ້ຮັບຊົມງານແຂ່ງຂັນຄັ້ງນີ້ໄດ້ຢ່າງສະດວກຂຶ້ນ.

          ສໍາລັບຜະລິດຕະພັນທີ່ໄດ້ຮັບລາງວັນຊະນະເລີດປະກອບມີ:

  1. ຊະນະເລີດອັນດັບ 1 ໄດ້ແກ່ຜະລິດຕະພັນ: Lailao CF ລະບົບຊ່ວຍ SME ຂາຍເຄື່ອງອອນລາຍຜ່ານ Facebook ຂອງບໍລິສັດ ລາຍລາວເລັບ ໄດ້ຮັບໂລ້ລາງວັນ, ເງິນສົດ 5,000,000 ກີບ (ຫ້າລ້ານກີບຖ້ວນ), ໃບຍ້ອງຍໍຈາກກະຊວງ ຕສ ແລະ ເຄື່ອງທີ່ລະລຶກຈາກບັນດາ ບໍລິສັດທີ່ໃຫ້ການສະໜັບສະໜູນ.
  2. ຮອງຊະນະເລີດອັນດັບ 1 ແມ່ນຜະລິດຕະພັນ: ບັນຊີ.LA ຂອງບໍລິສັດ ຫ້າສິບເຈັດໄບ໌ສ ຈໍາກັດຜູ້ດຽວ ໄດ້ຮັບໂລ້ລາງວັນ, ເງິນສົດ 3,000,000 ກີບ (ສາມລ້ານກິີບຖ້ວນ), ໃບຊົມເຊີຍຈາກກະຊວງ ຕສ ແລະ ເຄື່ອງທີ່ລະລຶກ.
  3. ຮອງຊະນະເລີດອັນດັບ 2 ແມ່ນຜະລິດຕະພັນ: ລະບົບຊ່ວຍເຫຼືອຂໍ້ມູນປະຊາຊົນພາຍຫຼັງໄດ້ຮັບວັກຊິນ ຂອງບໍລິສັດ ບັນດາດິຈິຕອນ ບິຊີເນັສ ຈໍາກັດຜູ້ດຽວ ໄດ້ຮັບໂລ້ລາງວັນ, ເງິນສົດ 2,000,000 ກີບ(ສອງລ້ານກິີບຖ້ວນ) ແລະ ເຄື່ອງທີ່ລະລຶກ.
  4. ລາງວັນຊົມເຊີຍ 2 ລາງວັນຄືຜະລິດຕະພັນ: Laoapp Mocha ຂອງບໍລິສັດ ສະຕ໊າໂທລະຄົມ ແລະ LAO SUSU ຂອງບໍລິສັດ SBlab 856 ຈໍາກັດ ລາງວັນ 1,000,000 ກີບ (ໜຶ່ງລ້ານກີບຖ້ວນ) ແລະ ຂອງທີ່ລະລຶກ.

ໃນໂອກາດນີ້ ທ່ານ ປອ ສັນຕິສຸກ ສິມມະລາວົງ ຮອງລັດຖະມົນຕີ ກະຊວງ ຕສ ໄດ້ໃຫ້ກຽດມອບລາງວັນໃຫ້ແກ່ຜູ້ທີ່ຊະນະເລີດໃນງານແຂ່ງຂັນ. ສໍາລັບ ທີມຊະນະເລີດໃນການປະກວດຄັ້ງນີ້ ຈະໄດ້ຮັບບູລິມາສິດ ເປັນຕົວແທນຂອງ ສປປ ລາວ ເຂົ້າຮ່ວມແຂ່ງຂັນຜະລິດຕະພັນໄອຊີທີລະດັບອາຊຽນ (ASEAN ICT Award 2021) ທີ່ຈະຈັດຂື້ນ ໃນເດືອນທັນວາ 2021 ນີ້, ທີ່ປະເທດມຽນມ້າ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2019
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 17
ລະ​ບົບ​ຂື້ນ​ທະ​ບຽນ​ປະ​ຊຸມ