ເປີດແລ້ວງານແຂ່ງຂັນ Lao ICT Award 2021

10/09/2021

ເປີດແລ້ວງານແຂ່ງຂັນ Lao ICT Award 2021

           ໃນຕອນເຊົ້າຂອງວັນທີ 10 ກັນຍາ 2021 ນີ້, ກົມເຕັກໂນໂລຊີການສື່ສານຂໍ້ມູນຂ່າວສານ, ກະຊວງ ເຕັກໂນໂລຊີ ແລະ ການສື່ສານ (ກຕສ) ໄດ້ເປີດພິທີງານແຂ່ງຂັນລາວໄອຊີທີ ປະຈໍາປີ 2021 (Lao ICT Award 2021) ຂຶ້ນຢ່າງເປັນທາງການ, ທີ່ສະຖາບັນເຕັກໂນໂລຊີການສື່ສານຂໍ້ມູນຂ່າວສານ (ກຕສ) ຂື້ນ. ໃຫ້ກຽດເຂົ້າຮ່ວມເປັນປະທານກ່າວເປີດງານໂດຍ ທ່ານ ພູທອງ ສີສະຫວັດ ຮັກສາການ ຫົວໜ້າກົມເຕັກໂນໂລຊີການສື່ສານຂໍ້ມູນຂ່າວສານ ມີບັນດາແຂກທີ່ຖືກເຊີນຈາກບັນດາກະຊວງ, ທະນາຄານ, ຫົວໜ່ວຍທຸລະກິດ ແລະ ສະຖາບັນການສຶກສາ ເຂົ້າຮ່ວມ.

          ການເປີດງານແຂ່ງຂັນໃນຄັ້ງນີ້ ເປັນການແຂ່ງຂັນ ລາວໄອຊີທີ ເປັນຄັ້ງທີ 4. ຊຶ່ງໃນປີນີ້ ແມ່ນແຕກຕ່າງຈາກທຸກປິທີ່ຜ່ານມາ ເນື່ອງຈາກການແພ່ລະບາດຂອງພະຍາດ ​COVID-19 ແລະ ເພື່ອເປັນການປະຕິບັດມາດຕາດຕະການ ຈາກຄະນະສະເພາະກິດໃນການຄວບຄຸມການແພ່ລະບາດຂອງພະຍາດ,  ທາງຄະນະຮັບຜິດຊອບຈັດງານ ຈຶ່ງໄດ້ມີມາດຕາການຈໍາກັດຜູ້ເຂົ້າຊົມງານ. ໂດຍການ ຫັນການຈັດງານມາເປັນຮູບແບບການຖ່າຍທອດສົດຜ່ານສື່ສັງຄົມອອນລາຍຜ່ານທາງເຟສບຸກເພສ (https://www.facebook.com/LaoICTAward.Official) ເພື່ອໃຫ້ສາມາດຮັບຊົມງານແຂ່ງຂັນຄັ້ງນີ້ໄດ້ຢ່າງສະດວກຂຶ້ນ.

          ງານແຂ່ງຂັນ ແຂ່ງຂັນໄອຊີທີລາວ 2021 ປີນີ້ ໄດ້ມີຫຼາຍກວ່າ 20 ຜະລິດຕະພັນ ທີ່ຖືກສົ່ງເຂົ້າຮ່ວມແຂ່ງຂັນ ແລະ ໄດ້ຜ່ານການຄັດເລືອກເຂົ້າມາຮອບສຸດທ້າຍ ຈຳນວນ 13 ຜະລິດຕະພັນ ຈາກ 10 ບໍລິສັດ ໂດຍແບ່ງອອກເປັນ 6 ໝວດຄື: (1)ພາກລັດ The Public sector, (2)ພາກເອກະຊົນ The Private sector, (3)ເພື່ອສັງຄົມ Corporate social responsibility, (4)ເນີ້ອໃນດີຈິຕອນ Digital content, (5)ບໍລິສັດສ້າງຕັ້ງໃໝ່ດ້ານ ໄອຊີທີ Start-up company ແລະ (6)ຄົ້ນຄ້ວາ ແລະ ພັດທະນາດ້ານ ໄອຊີທີ Research and development.

ນອກຈາກນັ້ນ ການແຂ່ງຂັນຄັ້ງນີ້ ຍັງໄດ້ຮັບກຽດຈາກຄະນະກໍາມະການ ຜູ້ຊົງຄຸນນະວຸດ ທີ່ມີປະສົບການ ແລະ ຕິດພັນກັບວຽກງານໄອຊີທີ ທີ່ມາຈາກຫຼາກຫຼາຍອາຊີບ ເຂົ້າຮ່ວມຕັດສີນຄັດເລືອກຜະລິດຕະພັນທີ່ມີ ຜົນງານທີ່ດີທີ່ສຸດ ເພື່ອເປັນຕົວແທນຂອງ ສປປ ລາວ ເຂົ້າຮ່ວມແຂ່ງຂັນຜະລິດຕະພັນໄອຊີທີລະດັບອາຊຽນ (ASEAN ICT Award 2021) ທີ່ຈະຈັດຂື້ນ ໃນເດືອນທັນວາ 2021 ນີ້, ທີ່ປະເທດມຽນມ້າ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2019
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 17
ລະ​ບົບ​ຂື້ນ​ທະ​ບຽນ​ປະ​ຊຸມ