ກອງປະຊຸມທາບທາມບຸກຄະລາກອນສະໝັກເລືອກຕັ້ງຄະນະບໍລິຫານງານສູນກາງສະຫະພັນແມ່ຍິງລາວ.

16/07/2021

ກອງປະຊຸມທາບທາມບຸກຄະລາກອນສະໝັກເລືອກຕັ້ງຄະນະບໍລິຫານງານສູນກາງສະຫະພັນແມ່ຍິງລາວ.

       ໃນຕອນເຊົ້າຂອງວັນທີ 16 ກໍລະກົດ 2021 ນີ້, ຄະນະບໍລິຫານງານສະຫະພັນແມ່ຍິງ ກະຊວງ ເຕັກໂນໂລຊີ ແລະ ການສື່ສານ (ກຕສ) ໄດ້ເປີດກອງປະຊຸມທາບທາມບຸກຄະລາກອນສະໝັກເລືອກຕັ້ງເຂົ້າໃນຄະນະບໍລິຫານງານສູນກາງສະຫະພັນແມ່ຍິງລາວ ສະໄໝທີ VIII ຮອບທີ 02 ຂຶ້ນ, ທີ່ຫ້ອງປະຊຸມໃຫຍ່ ກຕສ. ໂດຍການເປັນປະທານຂອງ ທ່ານ ປອ ສັນຕິສຸກ ສິມມາລາວົງ ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ມີບັນດາທ່ານຄະນະບໍລິຫານງານສະຫະພັນແມ່ຍິງ ກະຊວງ, ຄະນະກົມ/ທຽບເທົ່າ ອ້ອມຂ້າງກະຊວງ ເຂົ້າຮ່ວມຢ່າງພ້ອມພຽງ.

ການເປີດກອງປະຊຸມໃນຄັ້ງນີ້ ກໍເພື່ອເຮັດໃຫ້ກອງປະຊຸມທາບທາມໃຫ້ໄດ້ຮັບໝາກຜົນ ແລະ ໄປຕາມທິດຊີ້ນໍາ ຂອງຄະນະເລຂາທິການສູນກາງພັກ ກໍຄືຄະນະບໍລິຫານງານສູນກາງສະຫະພັນແມ່ຍິງລາວສະໄໝທີ VIII ທົ່ວປະເທດ. ດັ່ງນັ້ນ, ຄະນະບໍລິຫານງານ ກຕສ ຈຶ່ງໄດ້ປ່ອນບັດທາບທາມບຸກຄະລາກອນ ຈາກ 71 ທ່ານ ຄັດເລືອກ 68 ທ່ານ ເພື່ອປະກອບເຂົ້າໃນຄະນະບໍລິຫານງານສູນກາງສະຫະພັນແມ່ຍິງລາວ ສະໄໝທີ VIII  ຮອບທີ 02 ທີ່ຈະເປີດກອງປະຊຸມໃຫຍ່ຜູ້ແທນສະຫະພັນແມ່ຍິງລາວຂຶ້ນໃນທ້າຍປີ 2021 ນີ້.

         ໃນໂອກາດນີ້, ທ່ານ ປອ ສັນຕິສຸກ ສິມມາລາວົງ ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ໄດ້ໂອ້ລົມ ແລະ ເນັ້ນໜັກໃຫ້:  ຜູ້ແທນກອງປະຊຸມ ຈົ່ງຕັ້ງໜ້າປະຕິບັດໜ້າທີ່ ແລະ ສິດຂອງຕົນໃຫ້ຖືກຕ້ອງຕາມລະບຽບການຂອງສະຫະພັນແມ່ຍິງລາວວາງອອກ ເພື່ອໃຫ້ສາມາດເລືອກເຟັ້ນເອົາຕົວແທນຂອງເອື້ອຍນ້ອງແມ່ຍິງໃນຂອບເຂດທົ່ວປະເທດໃຫ້ໄດ້ຕາມມາດຕະຖານ, ເງື່ອນໄຂ ທີ່ໄດ້ລະບຸໃນຂໍ້ຕົກລົງຂອງສະຫະພັນແມ່ຍິງລາວ. ຄຽງຄູ່ກັບການເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ແກ່ເອື້ອຍນ້ອງແມ່ຍິງເປັນປະຈໍາ ແລະ ຕໍ່ເນື່ອງ, ເອົາໃຈໃສ່ ແລະ ຕັ້ງໜ້າໃນການປະກອນສ່ວນເຫື່ອແຮງ, ສະຕິປັນຍາ ແລະ ຄວາມຮູ້ຄວາມສາມາດຂອງຕົນ ເຂົ້າໃນວຽກງານວິຊາສະເພາະທີ່ໄດ້ຮັບມອບໝາຍໃຫ້ມີປະສິດທິພາບ-ປະສິດທິຜົນສູງສຸດ.

      ກອງປະຊຸມໄດ້ດໍາເນີນການປ່ອນບັດທາບທາມບຸກຄະລາກອນສະໝັກເລືອກຕັ້ງເຂົ້າໃນຄະນະລິຫານງານສູນກາງສະຫະພັນແມ່ຍິງລາວສະໄໝທີ VIII ຮອບທີ 02 ໄດ້ດໍາເນີນໄປຕາມລະບຽບຂອງສະຫະພັນແມ່ຍິງລາວວາງອອກຢ່າງຖືກຕ້ອງ ແລະ ຄົບຖ້ວນ, ຮັບປະກັນໃຫ້ໄດ້ປະສິດທິພາບປະສິດຜົນສູງສຸດ, ມີຂະບວນຟົດຟື້ນ ແລະ ມີຜົນສໍາເລັດຢ່າງຈົບງາມ.

             ຂ່າວ: ຫ້ອງການ, ພະແນກສົ່ງເສີມຄວາມກ້າວໜ້າແມ່ຍິງ ແລະ ແມ່-ເດັກ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2019
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 17
ລະ​ບົບ​ຂື້ນ​ທະ​ບຽນ​ປະ​ຊຸມ