ຮອງລັດຖະມົນຕີ ກະຊວງ ຕສ ເຂົ້າຮ່ວມສຳມະນາ ການສົ່ງເສີມທຸລະກິດດ້ານໄອທີ ລາວ-ອິນເດຍ ຜ່ານລະບົບທາງໄກ.

13/05/2021

ຮອງລັດຖະມົນຕີ ກະຊວງ ຕສ ເຂົ້າຮ່ວມສຳມະນາ ການສົ່ງເສີມທຸລະກິດດ້ານໄອທີ ລາວ-ອິນເດຍ ຜ່ານລະບົບທາງໄກ.

      ໃນຕອນບ່າຍຂອງ​ວັນ​ທີ 12 ພຶດສະພາ 2021 ນີ້, ທ່ານ ປອ ສັນຕິສຸກ ສິມມະລາວົງ, ຮອງລັດຖະມົນຕີ ກະຊວງ ເຕັກໂນໂລຊີ ​ແລະ ການ​ສື່ສານ (ຕສ) ພ້ອມ​ດ້ວຍ​ຄະນະ ​ໄດ້​ເຂົ້າ​ຮ່ວມງານສຳມະນາ ການສົ່ງເສີມທຸລະກິດດ້ານໄອທີ ລະຫວ່າງ ລາວ ແລະ ອິນເດຍ, ​ ໂດຍຜ່ານລະບົບກອງປະຊຸມທາງໄກ. ຊຶ່ງ​​ຈັດ​ຂຶ້ນ​ໂດຍ ສະຖານທູດອິນເດຍ ປະຈຳ ສປປ ລາວ ຮ່ວມກັບ ສະຖານທູດລາວ ປະຈຳອິນເດຍ, ສະມາຄົມການຄ້າໄອຊີທີລາວ (LICA), ສະພາອຸດສະຫະກຳ ແລະ ການຄ້າ ແຫ່ງຊາດລາວ (LNCCI) ແລະ ESC India (ສະພາສົ່ງເສີມການສົ່ງອອກ ຄອມພີວເຕີຊອບແວ ແລະ ເອເລັກໂຕຣນິກ) ມີພາກສ່ວນທີ່ກ່ຽວຂ້ອງເຂົ້າຮ່ວມ.

       ການຈັດສໍາມະນາໃນຄັ້ງນີ້ ແມ່ນການຮວບຮວມເອົາບັນດາຜູ້ປະກອບການທຸລະກິດ ຂະແໜງ ໄອຊີທີ ແລະ ຂະ  ແໜງການທີ່ກ່ຽວຂ້ອງ ຂອງອິນເດຍ ຫຼາຍກວ່າ 100 ບໍລິສັດ ແລະ ຈາກ ສປປ ລາວ ຫຼາຍກວ່າ 20 ບໍລິສັດ ເພື່ອມາພົບປະສົນທະນາ ແລກປ່ຽນຄວາມຄິດເຫັນ ທາງດ້ານການດຳເນີນທຸລະກິດໄອຊີທີ ຂອງສອງປະເທດ ແລະ ພ້ອມທັງຮັບຟັງ ທິດທາງນະໂຍບາຍ ການສົ່ງເສີມທຸລະກິດໄອຊີທີ ຂອງທາງພາກລັດໃນປະຈຸບັນ ແລະ ຕໍ່ໜ້າ ເພື່ອເປີດໂອກາດໃຫ້ພາກສ່ວນທຸລະກິດ ສາມາດຂະຫຍາຍເຄືອຂ່າຍການຮ່ວມມືຂອງຕົນ, ມີຜົນປະໂຫຍດດ້ານທຸລະກິດ ກໍຄືການພັດທະນາໄອຊີທີ ຂອງສອງປະເທດ. ໂດຍສະເພາະ ໃນສະພາບແຫ່ງຄວາມຫຍຸ້ງຍາກ ຕໍ່ມີການແຜ່ລະບາດ ຂອງພະຍາດ COVID-19 ແລະ ການຟຶ້ນຟູເສດຖະກິດ ໃນສະພາບການປ່ຽນແປງໃໝ່ ຂອງຍຸກການຫັນເປັນດິຈິຕອນ ທີ່ນັບມື້, ນັບຫຼາຍຂື້ນ ໃນ ສປປ ລາວ ກໍ່ຄື ພາກພື້ນ ແລະ ສາກົນ.

        ໃນ​​ໂອກ​າດນີ້, ທ່ານຮອງ​ລັດຖະມົນຕີ ກະຊວງ ເຕັກໂນໂລຊີ ​ແລະ ການ​ສື່ສານ ​ໄດ້​ກ່າວວ່າ: ໃນໄລຍະຜ່ານມາ ສປປ ລາວ ກໍ່ຄືກະຊວງ ເຕັກໂນໂລຊີ ​ແລະ ການ​ສື່ສານ ກໍ່ໄດ້ຮັບການສະໜັບສະໜູນຊ່ວຍເຫລືອ ຈາກລັດຖະບານອິນເດຍ ໂດຍການສ້າງຕັ້ງສູນຝຶກອົບຮົມ ແລະ ພັດທະນາຊອບແວ. ພ້ອມກັນນັ້ນ, ຍັງໄດ້ຈັດຕັ້ງຝຶກອົບຮົມ ໃຫ້ພະນັກງານ-ລັດຖະກອນ ໃນຫລັກສູດການພັດທະນາຊອບແວຕ່າງໆ ແຕ່ປີ 2018 ເປັນຕົ້ນມາ ພາຍໃຕ້ການຄຸ້ມຄອງຂອງກະຊວງ ເຕັກໂນໂລຊີ ​ແລະ ການ​ສື່ສານ. ພ້ອມດຽວກັນນັ້ນ ຍັງມີການຮ່ວມມືກັນທາງດ້ານໄອຊີທີ ບໍ່ວ່າຈະເປັນພາກລັດ ຫຼື ເອກະຊົນ ທີ່ໄດ້ປະກອບສ່ວນເຂົ້າໃນການພັດທະນາ ແລະ ແລກປ່ຽນບົດຮຽນ ເພື່ອໃຫ້ການຂະຫຍາຍຕົວທາງເສດຖະກິດຂອງສອງປະເທດ ລາວ-ອິນເດຍ ຜ່ານການແບ່ງປັນປະສົບການ ແລະ ການເພີ່ມທະວີການຮ່ວມມື ໃຫ້ນັບມື້ນັບຫລາຍຂຶ້ນ ໂດຍສະເພາະ ການສະໜັບສະໜູນ ທາງດ້ານງົບປະມານ ໃນແຜນງານການເຊື່ອມໂຍງ ເຊື່ອມຈອດດ້ານລະບົບດິຈິຕອນ ເພື່ອຫັນ ສປປ ລາວ ເປັນປະເທດບໍລິການທາງຜ່ານ ດ້ານເຕັກໂນໂລຊີສື່ສານ ຂໍ້ມູນຂ່າວສານ ຫລື ເຕັກໂນໂລຊີດິຈິຕອນ.

          ຂ່າວ​ໂດຍ: ກົມ​ແຜນ​ການ ແລະ ການ​ຮ່ວມ​ມື.

         ກວດແກ້: ພະແນກເລຂານຸການ-ພິທີການ, ຫ້ອງການກະຊວງ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2019
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 15
ລະ​ບົບ​ຂື້ນ​ທະ​ບຽນ​ປະ​ຊຸມ