ກອງປະຊຸມ ເຈົ້າໜ້າທີ່ອາວຸໂສດິຈິຕອນ ແລະ ເຈົ້າໜ້າທີ່ອາວຸໂສດັດສົມໂທລະຄົມ ອາຊຽນ ຄັ້ງທີ 01.

08/04/2021

ກອງປະຊຸມ ເຈົ້າໜ້າທີ່ອາວຸໂສດິຈິຕອນ ແລະ ເຈົ້າໜ້າທີ່ອາວຸໂສດັດສົມໂທລະຄົມ ອາຊຽນ ຄັ້ງທີ 01.

     ກະຊວງ​ ເຕັກ​ໂນ​ໂລ​ຊີ ແລະ ການສື່ສານ (ຕ​ສ) ໄດ້ເຂົ້າຮ່ວມ ກອງປະຊຸມ ເຈົ້າໜ້າທີ່ອາວຸໂສດິຈິຕອນ ແລະ ເຈົ້າໜ້າທີ່ອາວຸໂສດັດສົມໂທລະຄົມ ອາຊຽນ ຄັ້ງທີ 01 (The 1st ASEAN Digital Senior Officials’ Meeting (ADGSOM)-ASEAN Telecommunication Regulators’ Council (ATRC) Leaders’ Retreat of 2021) ໂດຍ ຜ່ານລະບົບກອງ​ປະ​ຊຸມທາງໄກ, ໃນວັນທີ 07 ເມສາຜ່ານມານີ້, ທີ່ ຕຶກກະຊວງ ຕ​ສ. ໂດຍການນໍາພາເຂົ້າຮ່ວມຂອງ ທ່ານ ນາງ ພາວັນນາ ດວງບຸບຜາ  ຮອງຫົວໜ້າ ກົມແຜນການ ແລະ ການຮ່ວມມື, ​ກະ​ຊວງ ຕ​ສ ໃນນາມຕົວແທນ ເຈົ້າໜ້າທີ່ອາວຸໂສ ດິຈິຕອນ ສປປ ລາວ ແລະ ເປັນ​ເຈົ້າພາບກອງ​ປະ​ຊຸມໂດຍທ່ານ ນ. ອາ​ຈາ​ຣິນ ພັດ​ທະ​ນາພັນ​ໄຊ   (Ajarin Pattanapanchai), ຫົວ​ໜ້າ​ຫ້ອງ​ການກະ​ຊວງ ເສດ​ຖະ​ກິດ-ສັງ​ຄົມ ດິ​ຈິ​ຕອນ ແຫ່ງ​ປະ​ເທດ​ໄທ ແລະ ເປັນປະທານໂດຍ ທ່ານ ດາ​ໂຕ ສ​ຣີ ໂມ​ຮຳມັດ ເມັນ​ເຕັກ (Dato’ Sri Mohammad Mentek), ເຈົ້າໜ້າທີ່ອາວຸໂສ ດິຈິຕອນ ມາເລເຊຍ ພ້ອມກັບບັນດາພາກສ່ວນກ່ຽວຂ້ອງ ແລະ ບັນດາປະເທດສະມາຊິກອາຊຽນ.

      ກອງປະຊຸມໃນຄັ້ງນີ້ ແມ່ນກອງປະຊຸມຮອບວຽນ ເພື່ອປຶກສາຫາລື ສະພາບການພັດທະນາດິຈິຕອນ ແລະ ທິດ​ທາງ​ໃນຕໍ່​ໜ້າ ຂອງແຕ່ລະປະເທດສະມາຊິກອາ​ຊຽນ ເພື່ອ​​​ຕອບຖະ​ແຫຼງ​ການ​ຂອງ​ບັນ​ດາ​ຜູ້​ນຳ​ປະ​ເທດ​ສະ​ມາ​ຊິກ​ອາ​ຊຽນ ກ່ຽວ​ກັບ​ການ​ກ້າວ​ໄປ​ສູ່​ການ​ຫັນ​ເປັນ​ທັນ​ສະ​ໄໝ ​ດ້ານ​ລະ​ບົບ​ດິ​ຈິ​ຕອນ, ຮັບຟັງການລາຍງານຄວາມຄືບໜ້າ ບັນດາໂຄງການ ແລະ ກິດຈະກຳ ທີ່ກໍາລັງຈັດຕັ້ງປະຕິບັດ ສົກປີ 2021, ກໍານົດທິດທາງ ແລະ ກິດ​ຈະ​ກຳ ສຳລັບ​ປີ 2022,  ຮັບຝັງຜົນການລາຍງານ ແລະ ທິດທາງຈາກ ກອງປະຊຸມສຸດຍອດ ຜູ້ນໍາອາຊຽນ (ASEAN SUMMIT), ປຶກສາຫາ​ລືກ່ຽວກັບແຜນບູລິມະສິດ ແຜນແມ່ບົດດິຈິຕອນ ຮອດປີ 2025, ການຈັດຕັ້ງປະຕິບັດແຜນການຕ່າງໆ ຮ່ວມກັນໃນຂອບ ອາຊຽນດິຈິຕອນ ແລະ ການຮ່ວມມື ກັບບັນດາປະເທດຄູ່ຮ່ວມມື. ​

      ສໍາລັບ ສປປ ລາວ ກໍ່ຄື ກະຊວງ ຕ​ສ ໄດ້ຮັບ 02 ກິດ​ຈະ​ກຳ ໃນສົກປີ 2021 ຄື: (1)ກິດ​ຈະ​ກຳ ບລັອກເຊນ/Block Chain For The Digital Government-The ASEAN Ways ແລະ (2)ກິດຈະກຳ ເຜີຍແຜ່ແຜນແມ່ບົດດິຈິຕອນ ອາຊຽນ 2025 ສຳລັບພາຍໃນ. ພ້ອມນີ້, ສປປ ລາວ ຍັງໄດ້ສະເໜີ ແຜນກິດຈະກຳ ສົກປີ 2022 ລວມມີ 02 ກິດ​ຈະ​ກຳ​ໃຫມ່ ຄື: (1)ການປະເມີນເສດຖະກິດສຳລັບການອຳນວຍຄວາມສະດວກໃຫ້ແກ່ການນຳໃຊ້ບໍລິການດິຈິຕອນ ທີ່ຈະຊ່ວຍໃນການຟື້ນຕົວ ຫຼັງຈາກການລະບາດຂອງ ພະຍາດ COVID-19 ແລະ (2)ການສ້າງມາດຕະຖານຂໍ້ມູນຂ່າວສານ ແລະ ການແລກປ່ຽນຂໍ້ມູນໄພພິບັດ ລະຫວ່າງອາຊຽນ.  ພ້ອມນີ້, ຍັງມີບັນຫາສຳຄັນອື່ນໆ ທີ່ໄດ້ຍົກຂຶ້ນມາ ເພື່ອປຶກສາຫາລືແລກປ່ຽນຄວາມຄິດເຫັນ ເຊັ່ນ: ວຽກຄວາມປອດໄພທາງໄຊເບີ (Cyber Security), ວຽກງານຄຸ້ມຄອງຂໍ້ມູນຂ່າວສານຂ້າມແດນ (Data Governance), ການພັດທະນາເຕັກໂນໂລຊີ 5G, ບັນດາວຽກທີ່ເປັນພື້ນຖານໃຫ້ແກ່ ເສດຖະກິດດິຈິຕອນ ແລະ ການຫັນເປັນທັນສະໄໝ ໃນອາຊຽນ, ການນຳໃຊ້ໄອຊີທີ ເຂົ້າໃນການຟື້ນໂຕ ຈາກຜົນກະທົບຂອງ ການລະບາດຂອງ ພະຍາດ COVID-19, ວຽກການສົ່ງເສີມການນຳໃຊ້ ໄອຊີທີ ແລະ ຜັກດັນການພັດທະນາຂອງຂະແໜງການ.

       ຊຶ່ງກອງ​ປະ​ຊຸມ​ດັ່ງກ່າວນີ້​ ແມ່ນຈະ​ຈັດ​ຂື້ນ ປີ​ລະ 2 ຄັ້ງ ຄື: ກອງປະຊຸມ ເຈົ້າໜ້າ​ທີ່ອາວຸໂສດິຈິຕອນ ແລະ ເຈົ້າໜ້າທີ່ອາວຸໂສດັດສົມໂທລະຄົມ ອາຊຽນ ຄັ້ງທີ 01 ແລະ ຄັ້ງ​ທີ 02 (ໃນ​ເດືອນສິງ​ຫາ) ເພື່ອ​ກະ​ກຽມ​ເນື້ອ​ໃນ​ໃຫ້​ແກ່ ກອງ​ປະ​ຊຸມ​ລັດ​ຖະ​ມົນ​ຕີ​ດິ​ຈິ​ຕອນ ອາ​ຊຽນ (ໃນ​ເດືອນພະ​ຈິກ) ໂດຍ​ສະ​ເພາະ​ການ​ຮັບ​ຮອງ​ການ​ປ່ຽນ​ຈາກ ICT ເປັນ DIGITAL.

        ຂ່າວໂດຍ:  ພະແນກອາຊຽນ, ກົມແຜນການ ແລະ ການຮ່ວມມື.

        ພາບ+ກວດແກ້: ພະແນກເລຂານຸການ-ພິທີການ, ຫ້ອງການກະຊວງ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2019
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 15
ລະ​ບົບ​ຂື້ນ​ທະ​ບຽນ​ປະ​ຊຸມ