ກະຊວງເຕັກໂນໂລຊີ ແລະ ການສື່ສານ ເຜີຍແຜ່ກົດໝາຍວ່າດ້ວຍ ຄວາມສະເໝີພາບຍິງ-ຊາຍ.

05/04/2021

ກະຊວງເຕັກໂນໂລຊີ ແລະ ການສື່ສານ ເຜີຍແຜ່ກົດໝາຍວ່າດ້ວຍ ຄວາມສະເໝີພາບຍິງ-ຊາຍ.

                ໃນຕອນເຊົ້າ ຂອງວັນທີ 02 ເມສາ 2021, ກະ​ຊວງ ​ ເຕັກໂນໂລຊີ ແລະ ການສື່ສານ (ກຕ) ໄດ້ຈັດກອງປະຊຸມເຜີຍແຜ່  ກົດໝາຍວ່າດ້ວຍ ຄວາມ​ສະ​ເໝີ​ພາບ​ຍິງ-ຊາຍ,  ກົດໝາຍວ່າດ້ວຍ ​ການ​ຕ້ານ ແລະ ສະ​ກັດ​ກັ້ນ​ການ​ໃຊ້​ຄວາມ​ຮຸນ​ແຮງ​ຕໍ່​ແມ່​ຍິງ ແລະ ເດັກ, ໃຫ້ກຽດເຂົ້າ​ຮ່ວມເປັນປະທານ ແລະ​ ກ່າວ​ມີ​ຄຳ​ເຫັນ​ຕໍ່​ກອງ​ປະ​ຊຸມຂອງ ທ່ານ ວະລະໄຊ ດາລາລອຍ ຮັກສາການຫົວໜ້າຫ້ອງການ ກະຊວງ ກຕ. ໂດຍການເຂົ້າຮ່ວມ​ເຜີຍ​ແຜ່​ເອ​ກະ​ສານຂອງ ທ່ານ ນ. ມະນີວອນ ຫຼວງສົມບັດ ຮອງຫົວໜ້າຫ້ອງການກອງເລຂາຄະນະກໍາມາທິການເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ, ​ມີບັນດາທ່ານຄະນະກົມ/ທຽບເທົ່າ, ຄະນະຜູ້ອໍານວຍການ​ ບໍ​ລິ​ສັດ ລັດ​ວິ​ສາ​ຫະ​ກິດ ແລະ ພະນັກງານ-ລັດຖະກອນ ຈາກບັນດາກົມ/ທຽບເທົ່າ ແລະ ບໍລິສັດ ລັດວິສາຫະກິດ ອ້ອມຂ້າງ ກະ​ຊວງ ​ ເຊິງມີຜູ້ເຂົ້າຮ່ວມທັງໝົດ .......ທ່ານ.

                ທ່ານ ປະທານໄດ້ກ່າວວ່າ: ການຈັດກອງ​ປະ​ຊຸມ​ໃນ​ຄັ້ງ​ນີ້ ​ກໍ່ເພື່ອໃຫ້ຜູ້ເຂົ້າຮ່ວມມີ​ຄວາ​ມຮັບ​ຮູ້ ແລະ ເຂົ້າ​ໃຈ ຢ່າງເລິກເຊິ່ງຕື່ມ ກ່ຽວກັບ​​ເນື້ອ​ໃນ​ຕົ້ນຕໍ​ຂອງ​ກົດໝາຍວ່າດ້ວຍຄວາມ​ສະ​ເໝີ​ພາບ​ຍິງ-ຊາຍ,  ກົດໝາຍວ່າດ້ວຍ ​ການ​ຕ້ານ ແລະ ສະ​ກັດ​ກັ້ນ​ການ​ໃຊ້​ຄວາມ​ຮຸນ​ແຮງ​ຕໍ່​ແມ່​ຍິງ ແລະ ເດັກ ເພື່ອເຮັດໃຫ້ວຽກງານດັ່ງກ່າວໄດ້ຮັບການຈັດຕັ້ງປະຕິບັດຢ່າງມີປະສິດທິພາບ ແລະ ປະສິດທິຜົນ ແນໃສ່ຍົກສູງສິດທິ, ບົດບາດຍິງ-ຊາຍ, ຮັບປະກັນຄວາມສະເໝີພາບອັນແທ້ຈິງລະຫ່ວາງຍິງ-ຊາຍ ໃນເງື່ອນໄຂ ແລະ ໂອກາດທີ່ເທົ່າທຽມກັນ, ຄວາມຮັບຜິດຊອບຂອງລັດ, ສັງຄົມ, ຄອບຄົວຕໍ່ແມ່ຍິງ ແລະ ເດັກ. ສົ່ງເສີມຄວາມຮູ້ຄວາມສາມາດ ຄຸນສົມບັດສິນທຳປະຕິວັດ, ຄວາມສະເໝີພາບຍິງ-ຊາຍ, ການລຶບລ້າງຮູບການຈຳແນກຕໍ່ແມ່ຍິງ, ສະກັດກັ້ນ ແລະ ຕ້ານການຄ້າແມ່ຍິງ ແລະ ເດັກ, ຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກໃນຄອບຄົວ, ສາມາດດຳລົງຊີວິດໃນສັງຄົມຢ່າງມີຄຸນນະພາບ ໃນທຸກຂົງເຂດວຽກງານທາງດ້ານການເມືອງ, ເສດຖະກິດ, ວັດທະນາທໍາ-ສັງຄົມ, ການປົກປັກຮັກສາສິ່ງແວດລ້ອມ, ການປ້ອງກັນຊາດປ້ອງກັນຄວາມສະຫງົບ, ການຕ່າງປະເທດ ເພື່ອເຮັດໃຫ້ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໄດ້ຮັບຜົນດີຂຶ້ນ.

              ໃນໂອກາດເຜີຍແຜ່ຄັ້ງນີ້ກໍ່ໄດ້ເນັ້ນໜັກໃສ່ ກົດໝາຍວ່າດ້ວຍຄວາມ​ສະ​ເໝີ​ພາບ​ຍິງ-ຊາຍ ໄດ້​ມີມະຕິຮັບຮອງ​ເອົາ​ໃນ​ກອງ​ປະຊຸມ​ສະ​ໄໝສາ​ມັນ​ເທື່ອທີ 08 ຂອງ​ສະພາ​ແຫ່ງ​ຊາ​ດຊຸ​ດ ທີ VIII ສະບັບເລກທີ 32/ສປຊ, ລົງວັນ​ທິີ 28 ພະຈິກ 2019 ​ແລະ ຖື​ກປະກາດ​​ໃຊ້​ໂດຍ ລັດຖະດໍາລັດຂອງ​ປະທານປະ​ເທດ ສະບັບເລກທີ​ 029/ປປທ, ລົງ​ວັນ​ທີ 09 ມັງກອນ 2020 ເປັນຕົ້ນມາ  ແລະ ກົດໝາຍວ່າດ້ວຍ ​ການ​ຕ້ານ ແລະ ສະ​ກັດ​ກັ້ນ​ການ​ໃຊ້​ຄວາມ​ຮຸນ​ແຮງ​ຕໍ່​ແມ່​ຍິງ ແລະ ເດັກ  ໄດ້ມີມະຕິຕົກລົງຮັບຮອງ​ເອົາ​ໃນ​ກອງ​ປະຊຸມ​ສະ​ໄໝສາ​ມັນ​ເທື່ອທີ 08 ຂອງ​ສະພາ​ແຫ່ງ​ຊາ​ດຊຸ​ດ ທີ VII ສະບັບເລກທີ 015/ສປຊ, ລົງວັນ​ທິີ 23 ທັນວາ 2014 ແລະ ຖື​ກປະກາດ​​ໃຊ້​ໂດຍລັດຖະດໍາລັດຂອງ​ປະທານປະ​ເທດ ສະບັບເລກທີ​ 031/ປປທ, ລົງ​ວັນ​ທີ  30 ມັງກອນ 2015. ຊຶ່ງທັງສອງກົດໝາຍດັ່ງກ່າວນີ້ ໄດ້ກໍານົດຫຼັກການ, ລະບຽບການ ແລະ ມາດຕະການ ກ່ຽວກັບການຄຸ້ມຄອງ, ຕິດຕາມ, ກວດກາ ວຽກງານງານຄວາມສະເໝີພາບຍິງ-ຊາຍ, ການຕ້ານ ແລະ ສະກັດກັ້ນການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ ດ້ວຍການປ້ອງກັນ, ປົກປ້ອງ, ການຊ່ວຍເຫຼືອຜູ້ຖືກເຄາະຮ້າຍ ແລະ ແກ້ໄຂການໃຊ້ຄວາມຮຸນແຮງດັ່ງກ່າວ.

ພາບ+ຂ່າວ: ຫ້ອງການກະຊວງ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2019
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 15
ລະ​ບົບ​ຂື້ນ​ທະ​ບຽນ​ປະ​ຊຸມ