ປທສ ເປີດກອງປະຊຸມສຳມະນາ ກຽ່ວກັບວຽກງານ ບໍລິຫານລັດດ້ວຍເອເລັກໂຕຣນິກ

19/03/2021

ປທສ ເປີດກອງປະຊຸມສຳມະນາ ກຽ່ວກັບວຽກງານ ບໍລິຫານລັດດ້ວຍເອເລັກໂຕຣນິກ

      ໃນຕອນເຊົ້າ ວັນທີ 18 ມີນາຜ່ານມານີ້, ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ເປີດກອງປະຊຸມສຳມະນາ ກຽ່ວກັບວຽກງານ ບໍລິຫານລັດດ້ວຍເອເລັກໂຕຣນິກ ໃຫ້ກັບພະແນກ ປທສ 08 ແຂວງພາກເໜືອ ຂຶ້ນ, ທີ່ສະຖາບັນເຕັກໂນໂລຊີການສື່ສານຂໍ້ມູນຂ່າວສານ. ໂດຍການເປັນປະທານເປີດຂອງ ທ່ານ ປອ ທະວີສັກ ມະໂນທັມ ຫົວໜ້າສູນບໍລິຫານລັດດ້ວຍເອເລັກໂຕຣນິກ, ກະຊວງ ປທສ ມີຜູ້ເຂົ້າຮ່ວມຈາກບັນດາພະແນກ 08 ແຂວງ ພາກ  ເໜືອ ແລະ ພະແນກປທສ ນະຄອນຫຼວງວຽງຈັນ.

      ການເປີດກອງປະຊຸມສຳມະນາໃນຄັ້ງນີ້ ແມ່ນເພື່ອນຳສະເໜີກ່ຽວກັບວຽກງານການພັດທະນາລະບົບບໍລິຫານລັດ ດ້ວຍເອເລັກໂຕຣນິກໃນໄລຍະຜ່ານມາ ລວມໄປເຖິງທິດທາງແຜນການໃນການພັດທະນາໃນຕໍ່ໜ້າ ແລະ ການກະກຽມຄວາມພ້ອມກ້າວໄປສູ່ການເປັນລັດຖະບານດິຈິຕອນ ໂດຍສະເພາະ ແມ່ນບັນດາລະບົບທີ່ໃຫ້ບໍລິການພາກລັດ ໃນປະຈຸບັນເຊັ່ນ: ລະບົບຫ້ອງການທັນສະໄໝ (e-Office), ລະບົບກອງປະຊຸມທາງໄກ (Video Conference), ລະບົບສື່ສານພາກລັດ (G-Chat) ແລະ ລະບົບນຳໃຊ້ເອກະສານຮ່ວມກັນ (G-Share/G-Drive) ​ ເພື່ອໃຫ້ພະແນກ ປທສ ແຂວງ ໄດ້ນຳເອົາໄປຜັນຂະຫຍາຍ ແລະ ນຳໃຊ້ເຂົ້າການປະຕິບັດວຽກງານຂອງຕົນ ໃນການຫັນເປັນທັນສະໄໝ, ທັງເປັນການ ປະຢັດເວລາ, ມີຄວາມປອດໄພ, ເຮັດໃຫ້ວຽກງານໄດ້ຮັບໝາກຜົນ ແລະ ວ່ອງໄວຍິ່ງຂື້ນ.  ພ້ອມດຽວກັນນີ້, ກອງປະຊຸມຍັງໄດ້ມີການແລກປ່ຽນຄຳຄິດເຫັນແບບກົງໄປກົງມາ ມີການຕັ້ງຄຳຖາມ-ຕອບ ປຶກສາຫາລື ບັນຫາຕ່າງໆ ທີ່ກ່ຽວຂ້ອງເຖິງການຄຸ້ມຄອງ, ການນໍາໃຊ້ ແລະ ພັດທະນາ ລະບົບ ບໍລິຫານ/ບໍລິການລັດ ແບບທັນສະໄໝ ເຊິ່ງມີຄວາມສົນໃຈຫຼາຍ ແລະ ເປັນປະໂຫຍດໃນການພັດທະນາ, ປັບປຸງລະບົບ ໃຫ້ສາມາດນຳໃຊ້ ເຂົ້າໃນວຽກງານຕົວຈິງໃຫ້ມີຄວາມປອດໄພ ແລະ ມີປະສິດຕິພາບ.

         ຂ່າວໂດຍ: ທ.ຊ່ອງດາວ  ພົມມະຈັນ. ສູນບໍລິຫານລັດດ້ວຍເອເລັກໂຕນິກ.

         ພາບ+ກວດແກ້: ຫ້ອງການກະຊວງ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2019
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 15
ລະ​ບົບ​ຂື້ນ​ທະ​ບຽນ​ປະ​ຊຸມ