ພິທີມອບໃບຢັ້ງຢືນ ໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2020.

10/03/2021

ພິທີມອບໃບຢັ້ງຢືນ ໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2020.

        ໃນວັນທີ 09 ມີນາ 2021 ນີ້, ທີ່ກະຊວງ ໄປສະນີ, ໂທລະຄົມມະນາຄົມ ແລະ ການສືື່ສານ (ປທສ) ໄດ້ຈັດພິທີມອບໃບຢັ້ງຢືນ ໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ປາຖະກະຖາເນື່ອງໃນວັນສ້າງຕັ້ງພັກປະຊາ ຊົນປະຕິວັດລາວ ຄົບຮອບ 66 ປີ (22/3/1955-22/3/2021). ໂດຍການເປັນປະທານຂອງ ສະຫາຍ ທອງໃສ ຊານໄຊຍະ, ຮອງເລຂາຄະນະພັກ, ຮອງລັດຖະມົນຕີ ກະຊວງ ປທສ, ມີບັນດາຄະນະປະຈຳພັກ, ຄະນະພັກ, ຄະນະໜ່ວຍພັກ ບັນດາກົມ/ທຽບເທົ່າ, ຄະນະພັກຮາກຖານ, ຄະນະອຳນວຍການ ບໍລິສັດອ້ອມຂ້າງກະຊວງ ພ້ອມສະມາຊິກພັກ ແລະ ພະນັກງານ-ລັດຖະກອນເຂົ້າຮ່ວມ.

        ທ່ານ ຄໍາພູ ດວງຖະໜອມ ຫົວໜ້າກົມຈັດຕັ້ງ-ພະນັກງານ, ກະຊວງ ປທສ ໄດ້ຜ່ານບົດສະຫຼຸບ ການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຊຶ່ງໃນໄລຍະຜ່ານມາ ຄະນະໜ່ວຍພັກໄດ້ມີຄວາມເອົາໃຈໃສ່ ໃນການຊີ້ນຳ-ນຳພາ ຕໍ່ວຽກງານທີ່ ພັກ-ລັດ ໄດ້ມອບໝາຍໃຫ້ໂດຍຖືເອົາວຽກງານສຶກສາອົບຮົມ ການເມືອງ-ແນວຄິດ ເປັນຕົ້ນແມ່ນເຮັດໃຫ້ສະມາຊິກພັກສ່ວນຫຼາຍຍັງຮັກສາຄຸນທາດການເມືອງໄດ້ຢ່າງໜັກແໜ້ນ, ມີອຸດົມການ ແລະ ມີນ້ຳໃຈການປະຕິວັດສູງ ໂດຍປະຕິບັດຕາມແນວທາງຂອງພັກ, ກົດໝາຍຂອງລັດ ມີການເຄື່ອນໄຫວຕາມແບບແຜນທີ່ໄດ້ກຳນົດໄວ້ ແລະ ສືບຕໍ່ປັບປຸງໜ່ວຍພັກຂອງຕົນໃຫ້ມີຄວາມໜັກ ແໜ້ນ, ເຂັ້ມແຂງເທື່ອລະກ້າວ, ພ້ອມກັນຕັ້ງໜ້າປະຕິບັດວຽກງານການເມືອງ-ແນວຄິດ ຕິດພັນກັບວຽກງານວິຊາສະເພາະ ທີ່ໄດ້ຮັບມອບໝາຍຢ່າງມີຜົນສຳເລັດ. ຄະນະໜ່ວຍພັກ ແລະ ສະມາຊິກພັກແຕ່ລະສະຫາຍກໍ່ໄດ້ສຸມໃສ່ວຽກງານກໍ່ສ້າງໜ່ວຍພັກປອດໃສ, ເຂັ້ມ ແຂງ, ໜັກແໜ້ນ ຕາມ 05 ດ້ານ: ນຳພາດ້ານການເມືອງ, ດ້ານແນວຄິດ, ດ້ານການຈັດຕັ້ງ, ດ້ານແບບແຜນວິທີນຳພາ ແລະ ປະຕິບັດໜ້າທີ່ການເມືອງ. ພ້ອມນີ້, ກໍ່ໄດ້ມີການມອບໃບຢັ້ງຢືນ ປະຈຳປີ 2020 ໃຫ້ແກ່ 24 ໜ່ວຍພັກ ທີ່ສາມາດເປັນໜ່ວຍພັກປອດໃສ, ເຂັ້ມແຂງ,   ໜັກແໜ້ນ.

        ໃນໂອກາດດຽວກັນນີ້, ສະຫາຍ ທອງໃສ ຊານໄຊຍະ ໄດ້ເຜີຍແຜ່ເອກະສານ ລະນຶກວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 66 ປີ, ໂດຍທ່ານໄດ້ຍົກໃຫ້ເຫັນປະຫັວດຄວາມເປັນມາການກຳເນີດຂອງພັກປະຊາຊົນປະຕິວັດລາວ ແລະ ຜົນສຳເລັດແຫ່ງການຊີ້ນຳ-ນຳພາ ຂອງພັກປະຊາຊົນປະຕິວັດລາວ ເພື່ອກຳນົດແນວທາງ, ແຜນນະໂຍບາຍຂອງພັກ, ຍົກສູງຄວາມສາມາດ ແລະ ຄຸນນະພາບຂອງພັກ, ຕ້ານລະບອບຫຼາຍເຄົ້າ, ຫຼາຍພັກ, ຕ້ານລັດທິເອກະຊົນ ແລະ ຕ້ານລັດທິສວຍໂອກາດ ໃນທຸກຮູບແບບ; ນຳພາປວງຊົນລາວດຳເນີນການຕໍ່ສູ້ກັບພວກຈັກກະພັດລ່າເມືອງຂື້ນ ເພື່ອນຳເອົາຄວາມເປັນເອກະລາດ ມາໃຫ້ແກ່ປະເທດຊາດ ແລະ ສິດເປັນເຈົ້າຂອງປະຊາຊົນ ກໍ່ຄືປົກປັກຮັກສາ ແລະ ສ້າງສາປະເທດຊາດ ຂື້ນສູ່ຈຸດໝາຍສັງຄົມນິຍົມ, ເຮັດໃຫ້ປະຊາຊົນຮັ່ງມີຜາສຸກ, ປະເທດຊາດມັ່ງຄັ່ງເຂັ້ມແຂງ, ສັງຄົມສາມັກຄີປອງດອງ, ປະຊາທິປະໄຕ, ຍຸຕິທຳສີວິໄລ.

     ພ້ອມນັ້ນ, ສະຫາຍ ຍັງໄດ້ກ່າວຕື່ມອີກວ່າ ໃນຊຸມປີຕໍ່ໜ້າ ພັກເຮົາຍິ່ງມີຄວາມຮັບຜິດຊອບ ອັນໜັກໜ່ວງໃນການພາລະກິດປະຫວັດສາດ ໃນເງື່ອນໄຂໃໝ່, ນຳພາປວງຊົນລາວທັງຊາດ ປົກປັກຮັກສາປະເທດຊາດໄວ້ຢ່າງໝັ້ນຄົງ ນຳພາສ້າງສາພັດທະນາປະເທດຊາດ ໃຫ້ຫຼຸດພົ້ນອອກຈາກຄວາມທຸກຍາກ ແລະ ສະຖານະພາບປະເທດດ້ອຍພັດທະນາ ຕາມແຜນທີ່ກຳນົດໄວ້, ກາຍເປັນປະເທດພັດທະນາ ແລະ ກ້າວເຂົ້າສູ່ສັງຄົມນິຍົມ.

          ຂ່າວ: ກົມຈັດຕັ້ງ-ພະນັກງານ.

         ພາບ: ຫ້ອງການກະຊວງ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2019
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 15
ລະ​ບົບ​ຂື້ນ​ທະ​ບຽນ​ປະ​ຊຸມ