ກອງປະຊຸມປາຖະກະຖາ ເຜີຍແຜ່, ເຊື່ອມຊຶມສະເຫຼີມສະຫຼອງວັນສ້າງຕັ້ງສະຫະພັນກຳມະບານລາວ ຄົບຮອບ 65 ປີ

18/02/2021

ກອງປະຊຸມປາຖະກະຖາ ເຜີຍແຜ່, ເຊື່ອມຊຶມສະເຫຼີມສະຫຼອງວັນສ້າງຕັ້ງສະຫະພັນກຳມະບານລາວ ຄົບຮອບ 65 ປີ

        ໃນຕອນເຊົ້າຂອງວັນທີ 18 ກຸມພາ 2021 ນີ້, ສະຫະພັນກຳມະບານ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ຈັດພິທີປາຖະກະຖາເຜີຍແຜ່, ເຊື່ອມຊຶມສະເຫຼີມສະຫຼອງວັນສ້າງຕັ້ງສະຫະພັນກຳມະບານລາວ ຄົບຮອບ 65 ປີ ( 01 ກຸມພາ 1956 - 01 ກຸມພາ 2021) ແລະ ເຜີຍແຜ່ຂໍ້ແຂ່ງຂັນ 05 ເປັນເຈົ້າ ຂຶ້ນ. ໂດຍການເປັນປະທານ ແລະ​ ເຜີຍແຜ່ເອກະສານໂດຍ ທ່ານ​ ວິໄລ ວົງຂະເສີມ ຄະນະພັກ,​ ຮອງປະທານ​ສູນກາງສະຫະພັນກຳມະບານລາວ​ ແລະ ​ເຜີຍແຜ່ຂໍ້ແຂ່ງຂັນ 05 ເປັນເຈົ້າໂດຍ  ທ່ານ​ ປອ​ ພູວົງ ​ຝາກເຟືອງໃຈ ຫົວຫນ້າກົມ​ຂະບວນການ-ຍ້ອງຍໍ​ສູນກາງສະຫະພັນກຳມະບານລາວ. ເປັນກຽດເຂົ້າຮ່ວມໂດຍທ່ານ​ທອງໃສ ຊານໄຊຍະ ຮອງເລຂາຄະນະພັກ, ​ຮອງ​ລັດຖະມົນຕີ​ກະຊວງ ​ປທສ​ ແລະ ປະທານ​ສະຫະພັນກຳມະບານກະຊວງ ​ປທສ​​ພ້ອມດ້ວຍຄະນະ, ມີຄະນະພັກບັນດາກົມ/ທຽບເທົ່າ,​ ຄະນະພັກຮາກຖານບັນດາບໍລິສັດ​  ພ້ອມດ້ວຍສະມາຊິກກຳມະບານເຂົ້າຮ່ວມຢ່າງພ້ອມພຽງ​ຈຳນວນ.

         ການຈັດພິທີປາຖະກະຖາໃນຄັ້ງນີ້ ກໍ່ເພື່ອເປັນການໂຄສະນາສຶກສາອົບຮົມປູກຈິດສຳນຶກ ແລະ ສ້າງຄວາມຮັບຮູ້ຢ່າງເລິກເຊິ່ງກ່ຽວກັບມູນເຊື້ອການກຳເນີດ, ເຕີບໃຫຍ່ຂະຫຍາຍຕົວຂອງສະຫະພັນກຳມະບານລາວ ໃນຕະຫລອດໄລຍະ 65 ປີຜ່ານມາ ໃຫ້ແກ່ສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານ ເພື່ອເສີມຂະຫຍາຍທາດແທ້ ມູນເຊື້ອປະຕິວັດຂອງສະມາຊິກກຳມະບານ, ກຳມະກອນ ແລະ ຜູ້ອອກແຮງງານທີ່ມີຜົນງານໃນການປະກອບສ່ວນອັນສຳຄັນເຂົ້າໃນພາລະກິດປົດປ່ອຍປະເທດຊາດ ໃນເມື່ອກ່ອນກໍ່ຄືໄລຍະປົກປັກຮັກສາ ແລະ ສ້າງສາພັດທະນາປະເທດຊາດ ພາຍໃຕ້ການນຳພາຂອງພັກປະຊາຊົນປະຕິວັດລາວ. ແນໃສ່ປຸກລະດົມ ແລະ ປູກຈິດສຳນຶກໃຫ້ແກ່ສະມາຊິກກຳມະບານ, ກຳມະກອນ ແລະ ຜູ້ອອກແຮງງານໃຫ້ມີຄວາມບຸກບືນ, ຕັ້ງຫນ້າປະກອບສ່ວນເຂົ້າ ໃນການເຄື່ອນໄຫວວຽກງານກຳມະບານ, ສ້າງຂະບວນການແຂ່ງຂັນ 5 ເປັນເຈົ້າ ຕິດພັນກັບຂະບວນການແຂ່ງຂັນ ຮັກຊາດ ແລະ ພັດທະນາ, ການສ້າງໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ຕິດພັນກັບການປະຕິບັດໜ້າທີ່ວິຊາສະເພາະ ແລະ ຂະບວນການຜະລິດ, ສ້າງທັດສະນະໃນການອອກແຮງງານທີ່ມີລະບຽບວິໄນໃຫ້ກວ້າງຂວາງ ແລະ ຟົດຟື້ນກວ່າເກົ່າ.

           ພ້ອມດຽວກັນນີ້, ຍັງໄດ້ເຜີຍແຜ່ເນື້ອໃນຂໍ້ແຂ່ງຂັນ 5 ເປັນເຈົ້າຂອງກໍາມະບານ ສະບັບປັບປຸງ ໃຫ້ຜູ້ເຂົ້າຮ່ວມ ໄດ້ຮັບຮູ້, ເຂົ້າໃຈ ແລະ ນໍາເອົາ ຂໍ້ແຂ່ງຂັນດັ່ງກ່າວ ໄປຈັດຕັ້ງປະຕິບັດເຂົ້າໃນໜ້າທີວຽກງານທີ່ຕົນຮັບຜິດຊອບ ໃຫ້ມີປະສິດທິພາບ ແລະ ມີສິດທິຜົນສູງສຸດ.

            ຂ່າວໂດຍ: ສະຫະພັນກໍາມະບານ ກະຊວງ ປທສ.

           ພາບ: ຫ້ອງການກະຊວງ ປທສ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2019
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 15
ລະ​ບົບ​ຂື້ນ​ທະ​ບຽນ​ປະ​ຊຸມ