ຂະບວນການສະເຫຼີມສະຫຼອງວັນສົນທິສັນຍາ ວ່າດ້ວຍສິດທິເດັກ ແລະ ລະນຶກວັນສາກົນເພື່ອຢຸດຕິຄວາມຮຸນແຮງຕໍ່ແມ່ຍິງ.

19/11/2020

ຂະບວນການສະເຫຼີມສະຫຼອງວັນສົນທິສັນຍາ ວ່າດ້ວຍສິດທິເດັກ ແລະ ລະນຶກວັນສາກົນເພື່ອຢຸດຕິຄວາມຮຸນແຮງຕໍ່ແມ່ຍິງ.

          ໃນຕອນ​ບ່າຍ​ຂອງວັນທີ 18 ພະຈິກ 2020 ນີ້, ທີ່ ມະ​ຫາ​ວິ​ທະ​ຍາ​ໄລ​ແຫ່ງ​ຊ​າດ, ຄະນະກຳມາທິການ ເພື່ອຄວາມກ້າວ  ໜ້າຂອງແມ່ຍິງ ແລະ ແມ່-ເດັກ (ຄກມດ) ກະ​ຊວງ ໄປ​ສະ​ນີ, ໂທ​ລະ​ຄົມ​ມະ​ນາ​ຄົມ ແລະ ການ​ສື່​ສານ (ປທສ) ຮ່ວມ​ກັບ​ມະ​ຫາ​ວິ​ທະ​ຍາ​ໄລແຫ່ງ​ຊາດ ໄດ້ຈັດ​ຂະ​ບວນ​ການ​ສະ​ເຫຼີມ​ສະຫຼອງວັນ​ສົນ​ທິ​ສັນ​ຍາ​ວ່າ​ດ້ວຍ​ສິດ​ທິ​ເດັກ 20 ພະ​ຈິກ ແລະ ​ລະ​ນຶກວັນ​ສາ​ກົນ​ເພື່ອ​ຢຸດ​ຕິ​ຄວາມ​ຮຸນ​ແຮງ​ຕໍ່​ແມ່​ຍິງ 25 ພະ​ຈິກ ໂດຍການ​ຈັດງານ​ຂຶ້ນ​ທະ​ບຽນ​ເລກ​ໝາຍ​ໂທ​ລະ​ສັບ. ໃຫ້ກຽດເປັນ​ປະທານຮ່ວມ ແລະ ກ່າວເປີດພິ​ທີ​ໂດຍ ທ່ານ ​​ທອງ​ໃສ ຊານ​ໄຊ​ຍະ ຮອງ​ເລ​ຂາ​ຄະ​ນະ​ພັກ, ຮອງລັດຖະມົນຕີ, ​ປະ​ທານ ຄະ​ນະ​ກຳ​ມາ​ທິ​ການ​ເພື່ອ​ຄວາມ​ກ້າວ​ໜ້າ​ຂອງ​ແມ່​ຍິງ ແລະ ແມ່-ເດັກ ກະ​ຊວງ ປ​ທ​ສ ແລະ ທ່ານ ຮ​ສ ໂພ​ສີ ທິບ​ດາ​ວັນ ຄະ​ນະ​ປະ​ຈຳ​ພັກ, ຮອງ​ອະ​ທິ​ກາ​ນ​ບໍ​ດີ ມະ​ຫາ​ວິ​ທະ​ຍາ​ໄລ​ແຫ່ງ​ຊາດ​, ມີບັນດາທ່ານ ​ຄະ​ນະ​ກົມ/​ທຽບ​ເທົ່າ, ຄະ​ນະ​ອຳ​ນວຍ​ການ​ ​ບໍ​ລິ​ສັດ ລັດ​ວິ​ສາ​ຫະ​ກິດ, ພະ​ນັກ​ງານ​ອ້ອມ​ຂ້າງ​  ກະ​ຊວງ ປ​ທສ ແລະ ພະ​ນັກ​ງານຄູ-ອາ​ຈານ ພ້ອມ​ດ້ວຍ​ນັກ​ສຶກ​ສາ ​ມະ​ຫາ​ວິ​ທະ​ຍາ​ໄລ ແຫ່ງ​ຊາດ ເຂົ້​າຮ່ວມ.

          ທ່ານ ​​ທອງ​ໃສ ຊານ​ໄຊ​ຍະ ໄດ້ກ່າວວ່າ: ການ​ສະ​ເຫຼີມ​ສະຫຼອງວັນ​ວັນດັ່ງກ່າວນີ້ ​ທົ່​ວ​ໂລກ​ກໍ​່​ໄດ້​ມີ​ການ​ສະ​ເຫຼີມ​ສະຫຼອງ​ ກໍ່​ຄື ສ​ປ​ປ​ ລາວ ​ເວົ້າ​ລວມ, ​ເວົ້າ​ສ​ະເພາະ ກໍ່​ຄື​ຂະ​ແໜງ ປ​ທ​ສ ​ທີ່​ແຕ່​ລະ​ປີ​ຜ່ານ​ມາກໍ່​ໄດ້​ຮ່ວມ​ກັບຫຼາຍ​ພາກ​ສ່ວນ​ຈັດ​ຂະ​ບວນ​ການ​ນີ້​ຂຶ້ນ​ດ້ວຍຫຼາຍ​ຮູບ​ການ, ແຕ່​ໃນ​ປີ​ນີ້ ກະ​ຊວງ ປ​ທ​ສ ພວກ​ເຮົາ​ໄດ້​ຈັດ​ຮ່ວມ​ກັບ​ມະ​ຫາ​ວິ​ທະ​ຍາ​ໄລ​ແຫ່ງ​ຊາດ​ຈັດ​ຂະ​ບວນ​ການ​ສະ​ເຫຼີມ​ສະຫຼອງ​ສອງວັນ​ດັ່ງ​ກ່າວ​ນີ້​ຂຶ້ນ​ດ້ວຍ​ຮູບ​ແບບ​ການ​ຂຶ້ນ​ທະ​ບຽນ​ເລກ​ໝາຍ​ໂທ​ລະ​ສັບ​ໃຫ້​ກັບ​ນັກ​ຮຽນ​ນັກ​ສຶກ​ສາ ຂອງ​ມະ​ຫາ​ວິ​ທະ​ຍາ​ໄລ​ແຫ່ງ​ຊາດ​.

         ​ວັນ​ສົນ​ທິ​ສັນ​ຍາ​ວ່າ​ດ້ວຍ​ສິດ​ທິ​ເດັກ ໃນ​ວັນ​ທີ 20 ພະ​ຈິກ ປີ 1989 ນີ້ກອງ​ປະ​ຊຸມ​ຂອງ​ສະ​ມັດ​ຊາ​ໃຫຍ່​ອົງ​ການ​ສະ​ຫະ​ປະ​ຊ​າ​ຊາດ​ໄດ້​ມີ​ມະ​ຕິ​ຮັບ​ຮອງ​ເອົາ​ຢ່າງ​ເປັນ​ທາງ​ການໂດຍໃຫ້ເລີ່ມຕົ້ນປະຕິບັດ ນັບແຕ່ປີ 1990 ເປັນຕົ້ນມາ ໂດຍ​ສຸມ​ໃສ່​​ກຸ່ມ​ປະ​ຊາ​ກອນ​ທີ່​ມີ​ຄວາມ​ສ່ຽງ​ທີ່​ສຸດ​ໃນ​ໂລກ. ຕັ້ງ​ແຕ່​ນັ້ນ​ມາ​ສົນ​ທິ​ສັນ​ຍາ​ວ່າ​ດ້ວຍ​ສິດ​ທິ​ເດັກ (CRC) ໄດ້​ກາຍ​ເປັນ​ສົນ​ທິ​ສັນ​ຍາ​ວ່າ​ດ້ວຍ​ສິດ​ທິ​ເດັກໄດ້​ສ້າງ ແລະ ສັບ​ຊ້ອນ​ເອົາ​ສິດ​ທິ​ຂອງ​ເດັກ​ນ້ອຍ​ທຸກ​ຄົນ ແລະ ສ້າງ​ເປັນ​ກົນ​ໄກ​ການ​ລາຍ​ງານ ແລະ ຄວາມ​ຮັບ​ຜິດ​ຊອບ​ລະ​ດັບ​ຊາດ ເພື່ອ​ບັນ​ລຸ​ຜົນ​ໄດ້​ຮັບ ແລະ ລາຍ​ງານ​ຄວາມ​ຄືບ​ໜ້າ. ສປປ ລາວ ໄດ້ລົງນາມ ແລະ ສະພາແຫ່ງຊາດໄດ້ໃຫ້ສັດຕະຍາບັນຕໍ່ສົນທິສັນຍາວ່າດ້ວຍສິດທິເດັກ ໃນປີ 1991. ເຊິ່ງ​ນັບ​ແຕ່​ນັ້ນ​ມາພັກ ແລະ ລັດຖະບານແຫ່ງ ສປປ ລາວ ໄດ້ໃຫ້ຄວາມສຳຄັນ ແລະ ເອົາໃຈໃສ່ຢ່າງສະເໝີຕົ້ນສະເໝີປາຍ ເພື່ອຮັບປະກັນຄວາມເປັນຢູ່ທີ່ດີ, ການເບິ່ງແຍງດູແລ ແລະ ການປະຕິບັດສິດທິ ແລະ ຜົນປະໂຫຍດຂອງເດັກ ໃຫ້ທົ່ວເຖິງໃນຂອບເຂດທົ່ວປະເທດ.

           ການສະເຫຼີມສະຫຼອງ ວັນສາກົນຢຸດຕິຄວາມຮຸນແຮງຕໍ່ແມ່ຍິງ 25 ພະຈິກ ​ກໍ່​ເຊັ່ນ​ດຽວ​ກັນ​ເຊິ່ງ​ປະ​ຊາ​ຊາດ​ທົ່ວ​ໂລກ ກໍ່​ໄດ້​ໃຫ້​ຄວາມ​ສຳ​ຄັນ ແລະ ໄດ້ເລີ່ມມີການສະເຫຼີມສະຫຼອງນັບແຕ່ປີ 1991 ເປັນຕົ້ນມາ; ເພື່ອປູກຈິດສໍານຶກ, ສົ່ງເສີມການຕ້ານ, ສະກັດກັ້ນ ແລະ ລຶບລ້າງການໃຊ້ຄວາມຮຸນແຮງທຸກຮູບການຕໍ່ແມ່ຍິງ, ທັງຍັງເປັນຂະບວນການລະນຶກເຖິງການເຄື່ອນໄຫວຕໍ່ສູ້ເພື່ອໃຫ້ສິດທິອັນເປັນພື້ນຖານ ກໍຄືກຽດສັກສີຂອງແມ່ຍິງ ແລະ ເດັກຍິງໃນທົ່ວໂລກໃຫ້ໄດ້ຮັບການປົກປ້ອງ ການໃຊ້ຄວາມຮຸນແຮງຕໍ່ແມ່ຍິງ ເປັນບັນຫາທີ່ເກີດຂຶ້ນດົນນານແລ້ວ ໃນ​ທຸກ​ປະ​ເທດ ແລະ ປັດຈຸບັນ ກໍເປັນປະກົດການຫຍໍ້ທໍ້ອັນໜຶ່ງໃນສັງຄົມ ແລະ ສົ່ງຜົນກະທົບທາງລົບ​ເປັນ​ຕົ້ນ: ຕໍ່ການພັດທະນາເສດຖະກິດ-ສັງຄົມ ເວົ້າລວມ, ເວົ້າສະເພາະແມ່ນກະ​ທົບທາງ​ດ້ານຮ່າງກາຍ, ຈິດໃຈ, ເພດ, ຕະຫຼອດ​ເຖິງ​ຊັບ​ສິນ ​ຂ​ອງແມ່ຍິງ. ການໃຊ້ຄວາມຮຸນແຮງຕໍ່ແມ່ຍິງ ແມ່ນມີຫຼາຍສາເຫດ ແຕ່ສາເຫດຕົ້ນຕໍ ແມ່ນຍ້ອນຮີດຄອງປະເພນີທີ່​ເກົ່າ​ແກ່ຫຼ້າຫຼັງ, ການເຊື່ອຖື​ແບບ​ງົມ​ງວາຍຄວາມທຸກຍາກ​ຂາດ​ເຂີນ, ລະດັບການສຶກສາຕ່ຳ ແລະ ສິ່ງ​ຫ​ຍໍ້​ທໍ້ອື່ນໆທີ່​ມີ​ຕໍ່​ແມ່​ຍິງ​ໃນ​ສັງ​ຄົມ. ຊຶ່ງ​ປະ​ກອບ​ມີຫຼາຍ ຮູບ​ແບບ​ເຊັ່ນ: ການ​ບັງ​ຄັບ​ໃຫ້​ແຕ່ງ​ງານ​ແຕ່​ອາ​ຍຸ​ຍັງ​ນ້ອຍ, ການ​ຄ້າ​ມະ​ນຸດ, ການ​ບັງ​ຄັບ​ຮ່ວມ​ເພດ ແລະ ການ​ຂົ່ມ​ຂືນ​ທຳ​ຊຳ​ເລົາ ທີ່​ສາ​ມາດ​ເກີດ​ຂຶ້ນ​ກັບ​ແມ່​ຍິງ​ທຸກໆ​ໄວ. ຊຶ່ງ​ບັນ​ຫາ​ດັ່ງ​ກ່າວ​ເປັນ​ສິ່ງ​ທີ່​ກີດ​ຂວາງ​ຢ່າງ​ໜັກ​ໜ່ວງ​ໃນ​ການ​ພັດ​ທະ​ນ​າ​ຄວາມ​ສາ​ມາດ​ຂອງ​ຊັບ​ພະ​ຍາ​ກອນ​ມະ​ນຸດ. ຍ້ອນເຫັນໄດ້ຄວາມສຳຄັນ ຕໍ່ບັນຫາດັ່ງກ່າວ, ອົງການສະຫະປະຊາຊາດ ຈຶ່ງໄດ້ຮັບຮອງເອົາຖະແຫຼງການວ່າດ້ວຍການຢຸດ​ຕິຄວາມຮຸນແຮງຕໍ່ແມ່ຍິງ ຢູ່ກອງປະຊຸມສະມັດຊາໃຫຍ່ອົງການສະຫະປະຊາຊາດໃນ ປີ 1993 ແລະ ກຳນົດເອົາວັນ ທີ 25 ພະຈິກ ຂອງທຸກໆປີເປັນ​ການລະ​ນຶກວັນສາກົນເພື່ອລຶບລ້າງຄວາມຮຸນແຮງຕໍ່ແມ່ຍິງໃນທົ່ວໂລກ. ສຳລັບ ສປປ ລາວ ຂອງ ພວກເຮົາແລ້ວ, ພັກ ແລະ ລັດຖະບານຍາມໃດກໍໃຫ້ຄວາມສຳຄັນຕໍ່ກັບບັນຫາດັ່ງກ່າວ ໂດຍໄດ້ເອົາໃຈໃສ່ໃນການສົ່ງເສີມຄວາມສະເໝີພາບ ຍິງ-ຊາຍ, ລຶບລ້າງທຸກຮູບການໃນການຈຳແນກຕໍ່ແມ່ຍິງ ຕະຫຼອດມາ ອັນໄດ້ສະແດງອອກຢ່າງຈະແຈ້ງຢູ່ ໃນລັດຖະທຳມະນູນ, ກົດໝາຍ, ແຜນຍຸດທະສາດ ແລະ ແຜນດຳເນີນງານແຫ່ງຊາດ ທີ່ສຳຄັນຈຳນວນໜຶ່ງ ເພື່ອຄຸ້ມຄອງ ແລະ ປົກປ້ອງສິດ, ຜົນປະໂຫຍດລວມຂອງແມ່ຍິງ ແລະ ການ​ຢຸດ​ຕິຄວາມຮຸນແຮງຕໍ່ແມ່ຍິງ ທຸກຮູບການທີ່​ເກີດ​ຂຶ້ນ​ໃນ ສ​ປ​ປ ລາວ.

          ດັ່ງ​ນັ້ນ, ເພື່ອເປັນການສະເຫຼີມສະຫຼອງ ເນື່ອງໃນໂອກາດ ສອງວັນ​ດັ່ງ​ກ່າວ​ຂ້າງ​ເທິງ​ນີ້​ໃຫ້ເປັນ​ຂະ​ບວນ​ການ​ທີ່​ຟົດ​ຟື້ນ ແລະ ໃຫ້​ມີ​ເນື້ອ​ໃນ ​ຈຶ່ງໄດ້ຈັດຕັ້ງຂະບວນ​ການ​ ການຂຶ້ນທະບຽນໝາຍເລກໂທລະສັບ​ນີ້​ຂຶ້ນ ​ເຊິ່ງ​ເປັນ​ວຽກ​ທີ່​ສຳ​ຄັນ​ຂອງ​ສັງ​ຄົມ ກໍ່​ຄື ເຮັດ​ໃຫ້​ວຽກ​ງານ​ຂອງພັກ - ລັດ​ຖະ​ບານ​​ສາ​ມາດ​ຄຸ້ມ​ຄອງ ແລະ ກວດ​ສອບ​ຜູ້​ນຳ​ໃຊ້​ສື່​ສັງ​ຄົມ​ອອນ​ລາຍ​ໃນ ສ​ປ​ປ ລາວ.

​ໃນປັດຈຸບັນ ການນໍາໃຊ້ເຄື່ອງມືສື່ສານ ທີ່ສາມາດພົກຕິດຕົວໄປມາໄດ້ຕະຫຼອດເວລາ ທັງສາມາດນໍາໃຊ້ອິນເຕີເນັດ ເພື່ອເຂົ້າໃຊ້ການບໍລິການຮູບແບບໃໝ່ ເປັນຕົ້ນ ການດໍາເນີນທຸລະກໍາທາງດ້ານການເງີນ-ທະນາຄານ, ການສັ່ງອາຫານ, ການຈອງປີ້ຍົນ-ທີ່ພັກ, ການຮັບ-ສົ່ງເອກະສານອີເລັກໂຕຣນິກ ຜ່ານເຄື່ອງໂທລະສັບມືຖືລຸ້ນໃໝ່ ຫຼື ເອີ້ນວ່າ ສະມາດໂຟນ ໃນສັງຄົມນັບຕັ້ງແຕ່ເດັກນ້ອຍຊັ້ນອານຸບານຂຶ້ນມາຮອດຮຸ້ນຄົນເຮັດວຽກ ແມ່ນຮູ້ຈັກກັນດີ ແລະ ໃຊ້ປະຈໍາວັນ ຈົນກາຍເປັນ ປັດໃຈທີ່ 5 ທີ່ຂາດບໍ່ໄດ້ ນອກເໜືອຈາກການນໍາໃຊ້ໄຟຟ້າ, ນໍ້າປະປາ ໄປແລ້ວໃນຍຸກປະຈຸບັນ. ພ້ອມດຽວກັນນັ້ນ, ການພັດທະນາ ແອບພີລເຄຊັນຕ່າງໆ ຖືກພັດທະນາຂື້ນຮັບໃຊ້ຄວາມຕ້ອງການຂອງສັງຄົມ ກໍ່ລ້ວນແລ້ວແຕ່ ປະຍຸກໃຫ້ເຂົ້າກັບລະບົບມືຖື ນັບມືນັບຫຼາກຫລາຍຂື້ນ. ຊື່ງມັນສະແດງເຖິງ ເລກໝາຍໂທລະສັບມືຖື ແລະ ອິນເຕີເນັດ ກາຍເປັນລະຫັດປະຈໍາຕົວຕົນເອງຂອງເຮົາໄປແລ້ວ ບໍ່ວ່າ ຈະໃຊ້ກັບການບໍລິການປະເພດໃດ ລະບົບແມ່ນຈະຖາມຫາວ່າ ໃຊ້ເລກໝາຍໂທລະສັບໃດ ແລະ ມີຕົວຕົນທີ່ຢູ່ອາໄສ. ສະນັ້ນ, ມັນຮຽກຮ້ອງໃຫ້ຂໍ້ມູນໃນຖານເກັບກໍາຂໍ້ມູນຂອງສູນກາງໂທລະສັບ ຕ້ອງສອດຄ່ອງກັບ ຖານຂໍ້ມູນບັດປະຊາຊົນ, ສໍາມະໂນຄົວ ແລະ ປື້ມແຜນແດນ (Passport) ໄປໃນໂຕ. ດັ່ງນັ້ນ, ເພື່ອໃຫ້ເຂົ້າເຖີງມະຫາຊົນໃນທຸກໂຂງເຂດຢ່າງກ້ວາງຂວາງ ແລະ ທົ່ວເຖີງ ທາງກະ​ຊວງ ປ​ທ​ສ ຈຶ່ງ​ໄດ້ພິຈາລະນາ ເລືອກເອົາກິດຈະກໍາທີ່ເປັນລັກສະນະຄວາມໝາຍຄວາມສໍາຄັນຕໍ່ການພັດທະນາການນໍາໃຊ້ລະບົບສຶ່ສານໂທລະຄົມມະນາຄົມໃນຍຸກດິຈິຕອລ ຕາມມາດຕະຖານ Know Your Costumer (KYC) ທີ່ເປັນແອບພີຣເຄຊັນ ຂື້ນທະບຽນເລກໝາຍໂທລະສັບ ແບບ 3 ແກັຣບ ຂອງກະຊວງ ປທສ ພັດທະນາຂື້ນ ໃນການເກັບຮັກສາຂໍ້ມູນຂອງຜູ້ໃຊ້ບໍລິການໃນຮູບແບບອີເລັກໂຕຣນິກ ຊື່ງເປັນພື້ນຖານໃນການເຊື່ອມໂຍງເຂົ້າກັບລະບົບການບໍລິການໃນຍຸກຕິຈິຕອລ ເປັນຕົ້ນ ການຊໍາລະສະສາງຜ່ານເຄື່ອຂ່າຍໂທລະຄົມ Mobile Money, ວຽກປ້ອງການຊາດ-ປ້ອງກັນຄວາມສະຫງົບ.

               ຂ່າວ: ຫ້ອງການ, ພະແນກຄວາມກ້າວໜ້າແມ່ຍິງ, ແມ່ ແລະ ເດັກ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2019
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 15
ລະ​ບົບ​ຂື້ນ​ທະ​ບຽນ​ປະ​ຊຸມ