ປທສ ເຜີຍແຜ່ຜົນປະໂຫຍດການນຳໃຊ້ ໄອຊິທີໃນຊີວິດປະຈຳວັນ.

18/11/2020

ປທສ ເຜີຍແຜ່ຜົນປະໂຫຍດການນຳໃຊ້ ໄອຊິທີໃນຊີວິດປະຈຳວັນ.

       ໃນວັນທີ 12 ພະຈິກຜ່ານມານີ້, ທີ່ວິທະຍາຄານປ້ອງການຊາດປ້ອງການຄວາມສະຫງົບ ໄດ້ມີການເຜີຍແຜ່ຜົນປະໂຫຍດການນໍາໃຊ້ ໄອຊີທີ, ນິຕິກໍາການນໍາໃຊ້ສື່ສັງຄົມອອນລາຍ ແລະ ວິທີການນໍາໃຊ້ແອັບພິເຄຊັນ Lao KYC ໃຫ້ກັບພະນັກງານພາຍໃນວິທະຍາຄານປ້ອງການຊາດປ້ອງການຄວາມສະຫງົບ. ໃຫ້ກຽດຂຶ້ນເຜີຍແຜ່ຄັ້ງນີ້ໂດຍ ທ່ານ ສຸລິຍາ ຄໍບູຣະວົງ ຫົວສູນສົ່ງເສີມການນໍາໃຊ້ເຕັກໂນໂລຊີການສື່ສານຂໍ້ມູນຂ່າວສານ, ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ມີພາກສ່ວນທີ່ກ່ຽວຂ້ອງເຂົ້າຮ່ວມ.

      ປະຈຸບັນການນຳໃຊ້ມືຖື ແລະ ສື່ສັງຄົມອອນລາຍ ໄດ້ກາຍເປັນໜຶ່ງປັດໃຈສຳຄັນ ໃນຊີວິດປະຈຳວັນ ແລະ ຫຼາຍຄົນກໍ່ຂາດການນຳໃຊ້ບໍ່ໄດ້ ໂດຍສະເພາະ ການນຳໃຊ້ໃນວຽກງານຕິດຕໍ່ສຶ່ສານເຊິ່ງກັນ ແລະ ກັນ, ການເຮັດທຸລະກິດ ຫຼື ການສຶກສາ-ຮ່ໍ່າຮຽນ, ຄວາມບັນເທິງ ຄຽງຄູ່ກັນນັ້ນ, ສື່ສັງຄົມອອນລາຍກໍ່ມີຄວາມສ່ຽງ ແລະ ສາມາດສ້າງຜົນເສຍຫາຍໃຫ້ແກ່ຜູ້ໃຊ້ໄດ້ຫຼາຍເຊັ່ນກັນ ຖ້າຜູ້ໃຊ້ບໍ່ຮູ້ວິທີການນໍາໃຊ້ທີ່ຖືກຕ້ອງ, ຮູ້ເທົ່າບໍ່ເຖິງການ ຫຼື ຂາດວິຈາລະນາຍານໃນການນໍາໃຊ້ ກໍອາດຈະສົ່ງຜົນກະທົບດ້ານລົບ ຫຼື ອາດຖືກຫຼອກລວງໄດ້. ດັ່ງນັ້ນ, ກະຊວງ ປທສ ເຫັນໄດ້ເຖິງບັນຫາດັ່ງກ່າວ ຈຶ່ງໄດ້ລົງເຜີຍແຜ່ໃຫ້ທຸກຄົນໄດ້ຮັບຮູ້ເຖິງ ຜົນດີ-ຜົນຮ້າຍ ຂອງການນຳໃຊ້ສື່ສັງຄົມອອນລາຍ. ພ້ອມທັງ ເຜີຍແຜ່ນິຕິກຳ ແລະ ຄວາມຮູ້ ຄວາມເຂົ້າໃຈ ໃຫ້ແກ່ພະນັກງານ ຄູອາຈານ ກ່ຽວກັບການນໍາໃຊ້ ສື່ສັງຄົມອອນລາຍທີ່ຖືກຕ້ອງ ແລະ ສ້າງຈິດສໍານຶກທີ່ດີໃນການນໍາໃຊ້ ພ້ອມນັ້ນ, ກໍ່ໃຫ້ຮູ້ ລະບຽບກົດໝາຍ ກ່ຽວກັບການນຳໃຊ້ ສື່ສັງຄົມອອນລາຍ ເພື່ອນໍາໄປໃຊ້ເຂົ້າໃນການດໍາລົງຊີວິດປະຈໍາວັນໃຫ້ໃຫ້ເກີດປະໂຫຍດສູງສຸດ. 

ໃນໂອກາດດຽວກັນ ຍັງໄດ້ເຜີຍແຜ່ການຂຶ້ນທະບຽນເລກໝາຍໂທລະສັບ ດ້ວຍຕົນເອງ ໂດຍຜ່ານ Lao KYC  ເພື່ອຊຸກຍູ້ສົ່ງເສີມການຂຶ້ນທະບຽນເລກໝາຍໂທລະສັບ ແລະ ຊິມເນັດ ໃນທົ່ວປະເທດໃນສຳເລັດ ກ່ອນວັນທີ 31/12/2020 ຕາມແຈ້ງການເລກທີ 1056/ຫກຊ.ອດທ ລົງວັນທີ 17 ມິຖຸນາ 2020. ດັ່ງນັ້ນ ວຽກງານດັ່ງກ່າວ ຈຶ່ງເປັນວຽກເລັ່ງດ່ວນໜຶ່ງ ທີ່ທາງກະຊວງ ປທສ ໃຫ້ຄວາມສຳຄັນ ແລະ ເພື່ອເຮັດໃຫ້ສາມາດບັນລຸຕາມກຳນົດເວລາຂອງແຈ້ງການ. ເຊິ່ງ Lao KYC ແມ່ນແອັບພິເຄຊັນທີ່ຖືກພັດທະນາຂຶ້ນມາ ພາຍໃຕ້ການເບິ່ງແຍງຂອງ ກະຊວງ ປທສ ໃນການຂຶ້ນທະບຽນເລກໝາຍໂທລະສັບຂອງຜູ້ຊົມໃຊ້ ເຊິ່ງປະຈຸບັນຜູ້ຊົມໃຊ້ສາມາດຂຶ້ນທະບຽນເລກໝາຍໂທລະສັບໄດ້ດ້ວຍຕົນເອງ ໂດຍຜ່ານແອັບດັ່ງກ່າວ ແລະ ສາມາດຂຶ້ນທະບຽນເລກໝາຍໂທລະສັບໄດ້ທຸກເຄືອຂ່າຍ ບໍ່ວ່າຈະເປັນລາວໂທລະຄົມ, Unitel, ETL ແລະ T-Plus ສາມາດເຮັດໃຫ້ປະຊາຊົນມີຄວາມສະດວກ ສະບາຍໃນການລົງທະບຽນນຳໃຊ້.

       ຂ່າວ: ສູນສົ່ງເສີມການນໍາໃຊ້ເຕັກໂນໂລຊີການສື່ສານຂໍ້ມູນຂ່າວສານ.

       ພາບ+ກວດແກ້: ຫ້ອງການກະຊວງ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2019
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 15
ລະ​ບົບ​ຂື້ນ​ທະ​ບຽນ​ປະ​ຊຸມ