ທ່ານ ທອງໃສ ຊານໄຊຍະ ເຂົ້າຮ່ວມພິທີສິເຫຼີມສະຫຼອງວັນໄປສະນີໂລກ.

09/10/2020

ທ່ານ ທອງໃສ ຊານໄຊຍະ ເຂົ້າຮ່ວມພິທີສິເຫຼີມສະຫຼອງວັນໄປສະນີໂລກ.

      ໃນວັນທີ 09 ຕຸລາ 2020 ນີ້, ທ່ານ ທອງໃສ ຊານໄຊຍະ ຮອງລັດຖະມົນຕີກະຊວງໄປສະນີ, ໂທລະຄົມມະນາ ຄົມ ແລະ ການສື່ສານ (ປທສ) ໄດ້ເຂົ້າຮ່ວມເປັນປະທານກ່າວເປີດ ພິທີສະເຫຼີມສະຫຼອງວັນໄປສະນີ ໂລກ ຄົບຮອບ 146 ປີ (9 ຕຸລາ 1874 – 9 ຕຸລາ 2020) ທີ່ສໍານັກງານໃຫຍ່ ລັດວິສາຫະກິດໄປສະນີລາວ ມີຄະນະກົມ/ທຽບເທົ່າ, ຄະນະ ອໍານວຍການບໍ ລິສັດ, ຫົວໜ້າພະແນກ/ຮອງພະແນກ, ບັນດາບໍລິສັດຜູ້ປະກອບການດ້ານໄປສະນີ ແລະ ພະນັກງານອ້ອມ ຂ້າງເຂົ້າຮ່ວມ.

       ທ່ານ ທອງໃສ ຊານໄຊຍະ ໄດ້ກ່າວວ່າ: ເພື່ອລະນຶກເຖິງບົດບາດ ຂອງການບໍລິການໄປສະນີ ທີ່ຊ່ວຍໃຫ້ຜູ້ຄົນໄດ້ສາມາດສື່ສານພົວພັນ ແລກປ່ຽນຂໍ້ມູນຂ່າວສານ ແລະ ການຄ້າຮ່ວມກັນ ທັງໃນລະດັບປະເທດ ແລະ ລະຫວ່າງປະເທດໃນທົ່ວໂລກ ຊຶ່ງນັບແຕ່ໃດມາ ທົ່ວໂລກໄດ້ຮັບຮູ້ວ່າ ບຸລຸດໄປສະນີ ແມ່ນບຸກຄົນທີ່ເສຍສະຫຼະໃນການສ້າງຄວາມສຸກໃຫ້ກັບສັງຄົມ. ສະນັ້ນ, ການບໍລິການໃນຂະແໜງໄປສະນີ ຈຶ່ງມີຄວາມຈໍາເປັນໃນການເຄື່ອນໄຫວທາງດ້ານເສດຖະກິດ-ສັງຄົມ ທີ່ເຮັດໜ້າທີ່ເຊື່ອມໂຍງ ລະຫວ່າງຄົວເຮືອນປະຊາຊົນ, ຮ້ານຄ້າ, ຫົວໜ່ວຍທຸລະກິດ, ຜູ້ສະໜອງ ແລະ ຜູ້ບໍລິໂພກ ແຕ່ຍັງປະກອບສ່ວນສໍາຄັນໃນການຂັບເຄື່ອນຕະຫຼາດເສດຖະກິດດິຈິຕອນ ທີ່ຫຼາຍກິດຈະກໍາເຄື່ອນໄຫວດ້ານທຸລະກິດ ຍັງອາໄສການບໍລິການຂອງຂະແໜງໄປສະນີ ໃນການໂຄສະນາເຖິງເຮືອນ, ສ້າງການພົວພັນ, ແຈກຢາຍ ແລະ ຈັດສົ່ງສິນຄ້າໃຫ້ແກ່ລູກຄ້າ. ດັ່ງນັ້ນ, ກະຊວງ ປທສ ຈຶ່ງໄດ້ສ້າງນະໂຍບາຍ ແລະ ສິ່ງອໍານວຍຄວາມສະດວກ ເພື່ອຊຸກຍູ້ໃຫ້ຜູ້ປະກອບການໄປສະນີ ແລະ ຜູ້ປະກອບການແຈກຢາຍເຄື່ອງຝາກ ຂະຫຍາຍຕາໜ່າງການບໍລິການໃຫ້ກວ້າງຂວາງ ດ້ວຍມາດຕະຖານ ແລະ ຄຸນນະພາບໃກ້ຄຽງກັບສາກົນ.

       ຫຼາຍປະເທດໃນໂລກ ໄດ້ຍົກບົດບາດຄວາມສຳຄັນຂະແໜງໄປສະນີໃນການສ້າງລາຍຮັບ, ການສ້າງວຽກເຮັດງານທໍາ ແລະ ການບໍລິການຂອງພາກລັດຕໍ່ປະຊາຊົນ ຊຶ່ງການບໍລິການ ແລະ ຕາໜ່າງໄປສະນີ ຂະຫຍາຍກວ້າງອອກໄປບ່ອນໃດ ກໍ່ຈະຊຸກຍູ້ໃຫ້ມີການພັດທະນາເສດຖະກິດ-ສັງຄົມ ໃນຂົງເຂດນັັ້ນ. ເປີດກວ້າງໃຫ້ມີການແຂ່ງຂັນ ແລະ ຊຸກຍູ້ຊ່ວຍເຫຼືອກັນ ລະຫວ່າງຜູ້ປະກອບການ ເພື່ອຫຼຸດຜ່ອນການລົງທຶນໃສ່ບ່ອນທີ່ບໍ່ເກີດປະໂຫຍດ. ສະນັ້ນ, ຂະ     ແໜງໄປສະນີ ຢູ່ ສປປ ລາວ ກໍ່ຄວນມີສ່ວນຮ່ວມ ສົ່ງເສີມໃຫ້ເສດຖະກິດ-ສັງຄົມ ຂອງປະເທດມີການພັດທະນາ, ລັດຖະບານຊ່ວຍຈັດຫາໂອກາດໃຫ້ຜູ້ທີ່ມີເງື່ອນໄຂພັດທະນາຂະແໜງໄປສະນີ ໂດຍເປີດກວ້າງການແຂ່ງຂັນໃນຕະຫຼາດ ເພື່ອສະໜອງການບໍລິການຂະແໜງໄປສະນີດ້ວຍຄວາມວ່ອງໄວ,  ໜ້າເຊື່ອຖື ແລະ ປອດໄພ.

          ພ້ອມນີ້, ທ່ານຍັງເນັ້ນໜັກໃຫ້ ພະນັກງານທຸກຄົນເອົາໃຈໃສ່ ຍົກສູງມາດຕະຖານ ແລະ ຄຸນນະພາບຂອງການບໍລິການ ພ້ອມທັງສ້າງຄວາມເພິ່ງພໍໃຈໃຫ້ກັບສັງຄົມນັບມື້ນັບຫຼາຍຂື້ນ. ໃນໂອກາດດຽວກັນ, ທ່ານໄດ້ຖືໂອກາດອວຍພວນໃຫ້ພະນັກງານກໍ່ຄືບູລຸດໄປສະນີ ຈົ່ງມີສຸຂະພາບແຂງແຮງ, ປະຕິບັດສຳເລັດໜ້າທີ່ຂອງຕົນ, ບັນດາຜູ້ປະກອບການຂະເແໜງ ການໄປສະນີຈົ່ງປະສົບຜົນສຳເລັດໃນການຳເນີນທຸລະກິດຂອງຕົນ, ສ້າງເຕີມໃຫ່ຍເຂັມແຂງ ແລະ ກ້າວໜ້າຢ່າງຢືນຍົງ.

          ພາບ+ຂ່າວ: ຫ້ອງການກະຊວງ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2019
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 15
ລະ​ບົບ​ຂື້ນ​ທະ​ບຽນ​ປະ​ຊຸມ