ກອງປະຊຸມສຳມະນາ ສັບປະດາສາກົນດ້ານໄຊເບີຂອງສີງກະໂປ (SICW) ຄັ້ງທີ 5 ແລະ ກອງປະຊຸມສຳມະນາ ລັດຖະມົນຕີອາຊຽນດ້ານຄວາມປອດໄພໄຊເບີ (AMCC) ຄັ້ງທີ 5.

09/10/2020

ກອງປະຊຸມສຳມະນາ ສັບປະດາສາກົນດ້ານໄຊເບີຂອງສີງກະໂປ (SICW) ຄັ້ງທີ 5 ແລະ ກອງປະຊຸມສຳມະນາ ລັດຖະມົນຕີອາຊຽນດ້ານຄວາມປອດໄພໄຊເບີ (AMCC) ຄັ້ງທີ 5.

       ໃນວັນທີ 06-07 ຕຸລາຜ່ານມານີ້, ຕ່າງໜ້າ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ), ໂດຍ ທ່ານ ຄຳຫຼ້າ ສຸນນະລັດ ຫົວໜ້າສູນສະກັດ ແລະ ແກ້ໄຂເຫດສຸກເສີນທາງຄອມພິວເຕີ ໄດ້ນຳພາຄະນະເຂົ້າຮ່ວມກອງປະຊຸມສຳມະນາ ສັບປະດາສາກົນດ້ານໄຊເບີຂອງ ສີງກະໂປ (SICW) ຄັ້ງ​ທີ 5 ແລະ ກອງປະຊຸມສຳມະນາ ລັດຖະມົນຕີອາຊຽນ ດ້ານ​ຄວາມ​ປອດ​ໄພ​ໄຊ​ເບີ (AMCC) ຄັ້ງທີ 5 ຜ່ານລະບົບທາງໄກ, ຊຶ່ງຈັດ​ຂຶ້ນ​ໂດຍ ​ອົງ​ການ​ຄວາມ​ປອດ​ໄພ​ທາງ​ໄຊ​ເບີ ຂອງປະເທດ​ສິ​ງ​ກະ​ໂປ (Cyber Security Agency of Singapore)   ມີບັນ​ດາລັດ​ຖະ​ມົນ​ຕີ​ດ້ານ​ໄອ​ຊີ​ທີ ແລະ ໄຊ​ເບີ​ອາ​ຊຽ​ນ, ​ຜູ້ນຳຈາກບັນ​ດາ ອຸດສະຫະກຳ, ສະຖາບັນການສຶກສາ ແລະ ອົງການທີ່ບໍ່ຂຶ້ນກັບລັດຖະບານເຂົ້າຮ່ວມດ້ວຍ.

       ກອ​ງ​ປະ​ຊຸມສຳມະນາຄັ້ງນີ້, ຈັດ​ຂຶ້ນ​ພາຍ​ໃຕ້​ຫົວ​ຂໍ້ “ການຮ່ວມມືໃນອະນາຄົດ ຫລັງ COVID” ໂດຍສຸມໃສ່ການແລກປ່ຽນ​ບົດຮຽນຂອງແຕ່ລະປະເທດ ແລະ ປຶກສາຫາລືບັນດາແຜນການຮ່ວມມື ເພື່ອສ້າງ​ໂລກໄຊ​ເບີ ທີ່​ມີຄວາມ​ປອດໄພ ແລະ ​ຍືດ​ຍຸ່ນ ຮັບປະກັນການນຳໃຊ້ອິນເຕີເນັດໃຫ້ມີຄວາມປອດໄພສາມາດ ​ຂັບ​ເຄື່ອນຄວາມກ້າວໜ້າທາງເສດຖະກິດ ໃນອະນາຄົດດິຈິຕອນ. ບັນດາບັນຫາພົ້ນເດັ່ນສຳ​ຄັນທີ່ໄດ້ສົນທະນາຮ່ວມກັນປະກອບມີ ເຊັ່ນ: (1)ຄວາມສ່ຽງຂອງ ໂລກອອນລາຍ ໃນສະພາບໃໝ່ (New Normal) ຫຼັງຈາກ COVID-19 ແລະ ການຮັກສາຂໍ້ມູນສ່ວນຕົວ, (2) ແລກປ່ຽນກ່ຽວກັບຄວາມ​ພະ​ຍາ​ຍາມ​ຂອງ​ບັນ​ດາ​ປະ​ເທດ​ສະ​ມາ​ຊິກ​ອາ​ຊຽນ ໃນ​ການ​ສົ່ງ​ເສີມການ​ຮ່ວມ​ມື​ຕໍ່​ກັບ​ວຽກ​ງານ​ດັ່​ງ​ກ່າວ​. ພ້ອມດຽວ ກັນນີ້, ກອງ​ປະ​ຊຸມ​ຍັງ​ມີ​ວາ​ລະ​ພິ​ເສດ ທີ່ໄດ້​ເຊີນ​ເອົາ​ບັນ​ດາ ​ຄູ່​ຮ່ວມ​ເຈ​ລະ​ຈາ​ອາ​ຊຽນ ມາ​ປຶກ​ສາ​ຫາ​ລື​ບັນ​ຫາ​ດ້ານຄວາມປອດໄພທາງໄຊເບີ ທີ່​ຕິດ​ພັນ​ກັ​ບ​ການ​ແຜ່​ລະ​ບາດ​ພະ​ຍາດ Covid-19. ເຊິ່ງເວທີປຶກສາຫາລືຄັ້ງນີ້ ເຖິງຈະບໍ່ແມ່ນກອງປະຊຸມ ທາງການ ຂອງອາຊຽນ,​ ແຕ່ກໍ່ເປັນເວທີ ທີ່ເປີດໂອກາດໃຫ້ ບັນດາປະເທດ ໄດ້ແລກປ່ຽນບົດຮຽນຊຶ່ງກັນທາງດ້ານວິຊາການໃນລະດັບສູງ ເພື່ອນຳເອົາຜົນຂອງການປຶກສາຫາລື ສະເໜີ ແກ່ອາຊຽນ ໃນການພິຈາລະນາ ການຮ່ວມມື ກັບບັນດາພາກສ່ວນທີ່ຕິດພັນ ໃນອານາຄົດ ບົນພື້ນຖານ ຄວາມເປັນເອກະພາບກັນ ແລະ ເຄົາລົບຕໍ່ລະບຽບກົດໝາຍ ພາຍໃນຊຶ່ງກັນ ແລະ ກັນ ຂອງແຕ່ລະປະເທດໃນອາຊຽນ.

            ຂ່າວ:  ກົມແຜນການ ແລະ ການຮ່ວມມື, ປທສ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2019
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 15
ລະ​ບົບ​ຂື້ນ​ທະ​ບຽນ​ປະ​ຊຸມ