ກອງປະຊຸມທາງໄກ ພົບປະສອງຝ່າຍລະຫວ່າງ ສປປ ລາວ ແລະ ສິງກະໂປ.

05/10/2020

ກອງປະຊຸມທາງໄກ ພົບປະສອງຝ່າຍລະຫວ່າງ ສປປ ລາວ ແລະ ສິງກະໂປ.

        ອີງຕາມການເຊື້ອເຊີນ ຂອງ ກະຊວງຂໍ້ມູນຂ່າວສານ ແລະ ການສື່ສານ ປະເທດສິງກະໂປ. ໃນວັນທີ 05 ຕຸລາ 2020 ນີ້, ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໂດຍ ທ່ານ ບຸນສະເຫຼີມໄຊ ເຄນນາວົງ, ຮອງລັດຖະມົນຕີກະຊວງ ປທສ ໄດ້ຈັດກອງປະຊຸມທາງໄກ ພົບປະສອງຝ່າຍຮ່ວມກັບ ທ່ານ S. Iswaran, ລັດຖະມົນຕີ ກະຊວງ​ຂໍ້​ມູນ​ຂ່າວ​ສານ ແລະ ການສື່ສານ ປະເທດສິງກະໂປ ຂຶ້ນ. ເພື່ອແລກປ່ຽນ ກ່ຽວ​ກັບ​ບັນ​ຫາຄວາມປອດໄພທາງໄຊເບີ (Cybersecurity) ໃນ​ຂົງ​ເຂດ​ອາ​ຊຽນ ແລະ ບັນ​ດາ​ຫົວ​ຂໍ້​ທີ່​ຈະ​ໄດ້​ສົນ​ທະ​ນາ​ໃນ​ ກອງປະ​ຊຸມ​ ສັບ​ປະ​ດາ​ສາ​ກົນ​ດ້ານ​ໄຊ​ເບີ​ຂອງ​ສິງ​ກະ​ໂປ (SICW) ແລະ ກອງ​ປະ​ຊຸມ​ລັດ​ຖະ​ມົນ​ຕີ​ອາ​ຊຽນ​ດ້ານ​ຄວາມ​ປອດ​ໄພ​ໄຊ​ເບີ (AMCC) ທີ່ ສິງກະໂປເປັນເຈົ້າພາບ ຊຶ່ງ​ຈະ​ໄດ້​ຈັດ​ຂຶ້​ນ ໃນ​ວັນ​ທີ 6-9 ຕຸ​ລາ 2020. ພ້ອມທັງ ສະ​ເໜີແລກປ່ຽນບົດຮຽນນຳຝ່າຍລາວ ດ້ານ​ຍຸດ​ທະ​ສາດ ແລະ ການ​ພັດ​ທະ​ນາ​ດ້ານ​ຄວາມ​ປອດ​ໄພ​ດ້ານ​ໄຊ​ເບີ.

         ໃນກອງປະຊຸມ, ສອງ​ຝ່າຍ ໄດ້ສົນທະນາແລກ​ປ່ຽນບັນຫາສໍາຄັນ 02 ຫົວຂໍ້ຫຼັກໆຄື: (1) ການສ້າງກົດລະບຽບພື້ນຖານທາງດ້ານໄຊເບີ (ແຜນວຽກການຈັດຕັ້ງປະຕິບັດ ບັນຖັດຖານທາງໄຊເບີ); ແລະ (2) ຍຸດທະສາດຄວາມປອດໄພ ແລະ ການພັດທະນາທາງໄຊເບີ ທີ່ເຫັນວ່າເປັນວຽກງານທີ່ມີຄວາມສຳຄັນໃນຍຸກປະຈຸບັນ ແລະ ຕິດພັນກັບຫຼາຍຂະແໜງການ. ພ້ອມນີ້, ສອງຝ່າຍຍັງໄດ້ເຫັນດີສຶບຕໍ່ຮ່ວມມື ແລະ ແລກປ່ຽນບົດຮຽນຊຶ່ງກັນ ແລະ ກັນ ບົນພື້ນຖານຕ່າງຝ່າຍຕ່າງໄດ້ຮັບຜົນປະໂຫຍດ ແລະ ການເຄົາລົບຕໍ່ກົດໝາຍ ແລະ ລະບຽບການພາຍໃນຂອງແຕ່ລະປະເທດ. ພ້ອມກັນຜ່ານຜ່າກັບສິ່ງທ້າທ້າຍໃນຕໍ່ໜ້າຮ່ວມກັນ ໂດຍສະເພາະ ໃນ ຊ່ວງ COVID-19 ນີ້.

           ຂ່າວໂດຍ : ກົມແຜນການ ແລະ ການຮ່ວມມື, ກະຊວງ ປທສ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2019
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 15
ລະ​ບົບ​ຂື້ນ​ທະ​ບຽນ​ປະ​ຊຸມ