ປທສ ປິດຊຸດຝຶກອົບຮົມວຽກງານໂຄສະນາ-ປາຖະກະຖາ ຊຸດທີ IV.

28/09/2020

ປທສ ປິດຊຸດຝຶກອົບຮົມວຽກງານໂຄສະນາ-ປາຖະກະຖາ ຊຸດທີ IV.

         ພິທີປິດຊຸດ​ຝຶກ​ອົບ​ຮົມ​ ວຽກ​ງານ​ໂຄ​ສະ​ນາ-ປາ​ຖະ​ກະ​ຖາ ຊຸດ​ທີ IV ຂອງກະ​ຊວງ​ໄປ​ສະ​ນີ, ໂທ​ລະ​ຄົມ​ມະ​ນາ​ຄົມ ແລະ ການ​ສື່​ສານ (ປທສ) ໄດ້ຈັດຂຶ້ນໃນວັນທີ 25 ກັນຍາຜ່ານມານີ້, ທີ່ສະຖາບັນເຕັກໂນໂລຊີການສື່ສານຂໍ້ມູນຂ່າວສານ (ສຕສ). ໂດຍການເປັນປະທານຂອງທ່ານ ຄໍາພູ ດວງຖະໜອມ ຫົວໜ້າກົມຈັດຕັ້ງ-ພະນັກງານ, ກະຊວງ ປທສ, ໃຫ້ກຽດມອບໃບຢັ້ງຢືນໂດຍ ທ່ານ ລີຈາວ ໄຊເຍ່ຍຊ່າງ ຮອງຫົວໜ້າກົມໂຄສະນາອົບ​ຮົມ​ສູນ​ກາງ​ພັກ, ມີບັນດາທ່ານຫົວໜ້າກົມ/ຮອງກົມ, ຫົວໜ້າພະແນກ/ຮອງພະແນກ ແລະ ນັກສໍາມະນາກອນເຂົ້າ​ຮ່ວມ.

      ການເປີດຊຸດຝຶກອົບຮົມໃນຄັ້ງນີ້, ນັກສໍາມະນາກອນໄດ້ຮັບຟັງການບັນລະຍາຍໃນດ້ານທິດສະດີ ແລະ ພາກປະຕິບັດຕົວຈິງ ໃນການເຮັດກິດຈະກຳຕ່າງໆ ເພື່ອຄົ້ນຄ້ວາ, ຂຽນບົດຕາມຫົວບົດທີ່ຄູຝຶກໄດ້ມອບໝາຍໃຫ້ ພ້ອມທັງທົດລອງຜ່ານບົດປາຖະກະຖາຂອງຕົນເອງ, ມີການປະກອບຄຳເຫັນໃສ່ບົດຈາກໝູ່ຄະນະ ແລະ ໄດ້ຜັນປ່ຽນກັນຂຶ້ນບັນລະຍາຍ ຕາມຫົວຂໍ້ທີ່ຄູຝຶກໄດ້ມອບໝາຍໃຫ້. ການຂຶ້ນທົດລອງບັນຍາຍສາມາດເຮັດໃຫ້ນັກສໍາມະນາກອນ ກ້າສະແດງອອກເຖິງທັກສະໃນການນຳສະເໜີ, ຄວາມກ້າຫານ, ການສັງລວມເນື້ອໃນ, ການເກັບກຳຂໍ້ມູນ ແລະ ການຍົກຕົວຢ່າງຫົວບົດທີ່ຂຶ້ນບັນລະຍາຍ. ພ້ອມນັ້ນ, ຍັງໄດ້ເພີ່ມທັກສະໃນການປາກເວົ້າ, ກ້າສະແດງອອກໃນການປະກອບຄຳຄິດ ຄຳເຫັນຕໍ່ກອງປະຊຸມ ແລະ ເວທີຕ່າງໆ ເພື່ອນໍາເອົາບົດຮຽນດັ່ງກ່າວ ໄປຈັດຕັ້ງຜັນຂະຫຍາຍເຂົ້າໃນຂົງເຂດວຽກງານຂອງຕົນໃຫ້ປະກົດຜົນເປັນຈິງ.

          ຊຸດຝຶກອົບຮົມໄດ້ດໍາເນີນມາເປັນເວລາ 10 ວັນ (ລະຫວ່າງວັນທີ 14-25 ກັນຍາ 2020) ປະກອບມີ 6 ຫຼັກສູດ​ຄື: ບັນຫາພຶ້ນຖານຂອງວຽກງານໂຄສະນາ; ຝຶກຝົນຄວາມສາມາດໃນການຂຽນເອກະສານ; ຄຸນລັກສະນະ ແລະ ສີນລະປະໃນການປາກເວົ້າຂອງນັກປາຖະກະຖາ; ບັນດານິຕິກຳ ແລະ ບາງບົດ ຮຽນໃນການເຄື່ອນໄຫວວຽກງານໂຄສະນາ, ວຽກງານໂຄສະນາຜ່ານສື່ ແລະ ໂຄສະນາເຄື່ອນທີ່. ໃນຕອນທ້າຍ, ຜູ້ເຂົ້າຮ່ວມຝຶກອົບຮົມ ໄດ້ຮັບໃບຢັ້ງຢືນຈາກຄະນະໂຄສະນາອົບຮົມສູນກາງພັກ ກ່ຽວກັບວຽກງານໂຄສະນາ-ປາຖະ ກະຖາ ຈຳນວນ 36 ທ່ານ.

           ພາບ+ຂ່າວ: ຫ້ອງການກະຊວງ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2019
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 15
ລະ​ບົບ​ຂື້ນ​ທະ​ບຽນ​ປະ​ຊຸມ