ທ່ານ ຄໍາຫຼ້າ ສຸນນະລັດ ເຂົ້າຮ່ວມບັນຍາຍ ການນໍາໃຊ້ສື່ສັງຄົມອອນລາຍໃຫ້ມີຄວາມປອດໄພ.

31/07/2020

ທ່ານ ຄໍາຫຼ້າ ສຸນນະລັດ ເຂົ້າຮ່ວມບັນຍາຍ ການນໍາໃຊ້ສື່ສັງຄົມອອນລາຍໃຫ້ມີຄວາມປອດໄພ.

        ໃນລະຫວ່າງວັນທີ 21 - 23 ກໍລະກົດທີ່ຜ່ານມານີ້, ທ່ານ ຄໍາຫຼ້າ ສຸນນະລັດ ຫົວໜ້າ ສູນສະກັດກັ້ນ ແລະ ແກ້ໄຂເຫດການສຸກເສີນທາງຄອມພິວເຕີ, ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ຮັບກຽດເຂົ້າຮ່ວມເປັນວິທະຍາກອນ​ເພື່ອບັນຍາຍກ່ຽວກັບວຽກງານ: “ການນໍາໃຊ້ສື່ສັງຄົມອອນລາຍໃຫ້ມີຄວາມປອດໄພ” ໃນຫົວຂໍ້: “ການຕອບໂຕ້ ແລະ ຕີຖອຍ ຂ່າວລວງ, ຂ່າວລື ແລະ ຂ່າວປັ່ນປວນ ໃນສື່ສັງຄົມອອນລາຍ” ທີ່ຈັດຂຶ້ນໂດຍ ສະຖາບັນສື່ມວນຊົນ, ວັດທະນະທໍາ ແລະ ທ່ອງທ່ຽວ, ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ. ໂດຍການເປັນປະທານຂອງ ທ່ານ ປິ່ນປາດຖະໜາ ພັນທະມາລີ ຫົວໜ້າກົມສື່ມວນຊົນ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເຊິ່ງມີຫຼາຍພາກສ່ວນທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.

         ການຈັດກອງປະຊຸມສໍາມະນາຄັ້ງ​ນີ້ ແມ່ນເພື່ອເຮັດໃຫ້ຜູ້ເຂົ້າຮ່ວມ ກໍ່ຄືສັງຄົມໄດ້ຮັບຮູ້, ເຂົ້າໃຈຕໍ່ກັບວຽກງານການຕອບໂຕ້ ແລະ ຕີຖອຍ ຂ່າວລວງ, ຂ່າວລື ແລະ ຂ່າວປັ່ນປວນ ໃນສື່ສັງຄົມອອນລາຍ. ພ້ອມທັງ, ຍັງເປັນການຍົກລະດັບຄວາມຮູ້, ຄວາມເຂົ້າໃຈ ກ່ຽວກັບ “ກົດໝາຍ ແລະ ລະບຽບການ ຄຸ້ມຄອງສື່ມວນຊົນ ໂດຍສະເພາະສື່ສັງຄົມອອນລາຍ”. ພ້ອມນີ້, ບັນດາຜູ້ເຂົ້າຮ່ວມໄດ້ມີການປຶກສາຫາລື ແລກປ່ຽນຄຳຄິດຄຳເຫັນ ແລະ ທິດທາງໃນການຄຸ້ມຄອງ ການເຄື່ອນໄຫວຂອງສື່ແບບໃໝ່ ເພື່ອນໍາໄປເຜີຍແຜ່ ແລະ ເອົາໄປໝູນໃຊ້ເຂົ້າໃນວຽກງານ ການດໍາລົງຊີວິດຂອງຕົນ.

           ຂ່າວ: ສູນສະກັດກັ້ນ ແລະ ແກ້ໄຂເຫດສຸກເສີນທາງຄອມພິວເຕີ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2019
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 15
ລະ​ບົບ​ຂື້ນ​ທະ​ບຽນ​ປະ​ຊຸມ