ປທສ ເປີດການນຳໃຊ້ລະບົບການສື່ສານຂອງພາກລັດ (G-Chat)

15/07/2020

 ປທສ ເປີດການນຳໃຊ້ລະບົບການສື່ສານຂອງພາກລັດ (G-Chat)

        ໃນຕອນເຊົ້າຂອງ ວັນທີ 15 ກໍລະກົດນີ້, ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ທສ) ຮ່ວມກັບບໍລິສັດ ອາໂລ ເທັກໂນໂລຊີ ຈຳກັດ ໄດ້ຈັດພິທີເປີດການນຳໃຊ້ລະບົບການສື່ສານຂອງພາກລັດ (G-Chat)  ຂື້ນທີ່ ໂຮງແຮມ ຄຣາວພລາຊ່າ, ນະຄອນຫຼວງວຽງຈັນ. ໃຫ້ກຽດເປັນປະທານເປີດງານ ໂດຍ ທ່ານ ປອ ທະວີສັກ ມະໂນທັມ ຫົວໜ້າສູນບໍລິຫານລັດດ້ວຍເອເລັກໂຕຣນິກ ກະຊວງ ປທສ, ມີຄະນະຜູ້ບໍລິຫານຈາກບໍລິສັດ ອາໂລ ເທັກໂນໂລຊີ ຈຳກັດ, ຄະນະກົມ/ທຽບເທົ່າ, ຕາງໜ້າຈາກບັນດາກະຊວງ, ບໍລິສັດຜູ້ໃຫ້ບໍລິການດ້ານໂທລະຄົມ ແລະ ສະຖາບັນການສືກສາຕ່າງໆເຂົ້າຮ່ວມ.

ກະຊວງ ປທສໄດ້ສ້າງແຜນຮ່ວມມືກັບ ບໍລິສັດ ໂດຍ G-Chat ເປັນລະບົບຕິດຕໍ່ສື່ສານແບບອອນລາຍ ສຳລັບພະນັກງານພາກລັດດ້ວຍກັນເຊັ່ນ: ການຮັບ-ສົ່ງຮູບພາບ, ວີດີໂອ, ການໂທດ້ວຍສຽງ-ພາບໄດ້ພ້ອມກັນ ແລະ ຈອງການປະຊຸມລ່ວງໜ້າແບບເປັນກຸ່ມໄດ້ໂດຍບໍ່ຈຳກັດຜູ້ເຂົ້າຮ່ວມ.

           ລະບົບການສື່ສານພາກລັດ ສ້າງຂຶ້ນເພື່ອຄວາມເປັນເອກະພາບ ແລະ ລວມສູນຂອງການນຳໃຊ້ແອັບໃນການສົນທະນາສື່ສານ ແລະ ແລກປ່ຽນຂໍ້ມູນຂອງພາກລັດ ໃຫ້ມີມາດຕະຖານຄວາມປອດໄພ, ໝັ້ນຄົງທາງດ້ານຂໍ້ມູນ ແລະ ທັນສະໄໝ. ນອກນີ້, ຍັງສາມາດນຳໃຊ້ໃນທຸກອຸປະກອນສື່ສານ ແລະ ຄອມພິວເຕີໄດ້ທຸກທີ່ທຸກເວລາ. ຊຶ່ງອົງປະກອບ ແລະ ຄວາມສາມາດຂອງລະບົບການສື່ສານຂອງພາກລັດ G-Chat ສາມາດບໍລິຫານ, ຈັດການຂໍ້ມູນສ່ວນຕົວໄດ້ ແລະ ສາມາດເລືອກນຳໃຊ້ໄດ້ທັງພາສາລາວ ແລະ ພາສາອັງກິດ, ມີລະບົບ Cloud ທີ່ໝັ້ນຄົງ ແລະ ມີປະສິດທິພາບທີ່ດີ, ຂໍ້ຄວາມຖືກເຂົ້າລະຫັດເພື່ອປະກັນໄດ້ທາງດ້ານຄວາມປອດໄພ, ການເກັບຮັກສາຂໍ້ມູນແບບຢືນຍົງ ແລະ ຖາວອນ, ມີການເຝົ້າລະວັງ ແລະ ຕິດຕາມການຖືກໂຈມຕີຈາກພາຍນອກ, ສາມາດນຳໃຊ້ໄດ້ທັງທາງຄອມພິວເຕີ (Brownser) ແລະ ມືຖື ລະບົບ Andriod ແລະ  IOS, ສ້າງກຸ່ມສົນທະນາ ໂດຍສາມາດກຳນົດເອົາຜູ້ໃຊ້ງານທີ່ຢູ່ຕ່າງພະແນກ ຫຼື ຕ່າງກົມທີ່ຢູ່ພາຍໃນກະຊວງດຽວກັນເຂົ້າມາເປັນສະມາຊິກໃນກຸ່ມໄດ້ ໂດຍບໍ່ໄດ້ກຳນົດຈຳນວນສະມາຊິກ, ຜູ້ໃຊ້ສາມາດນຳບັນຊີລາຍຊື່ຂອງຕົນ ໄປໃຊ້ໃນເຄື່ອງ   ໃໝ່ໂດຍຂໍ້ຄວາມທີ່ສົນທະນາໄວ້ໃນເຄື່ອງເກົ່ານັ້ນຈະບໍ່ຖືກລຶບໄປ, ປະຊຸມຜ່ານ Video Call ແລະ ສາມາດນັດຈອງປະຊຸມແບບເປັນກຸ່ມລ່ວງໜ້າໄດ້, ໃຊ້ງານໄດ້ທຸກອຸປະກອນສື່ສານ ແລະ ຄອມພິວເຕີໄດ້ທຸກສະຖານທີ່.

          ລະບົບການສື່ສານຂອງພາກລັດ ແມ່ນນຳໃຊ້ສະເພາະພະນັກງານລັດທຸກໆກະຊວງ ແລະ ອົງການຈັດຕັ້ງລັດ ສາມາດຕິດຕໍ່ສື່ສານຫາກັນໄດ້ຢ່າງວອ່ງໄວ, ໝັ້ນຄົງ, ປອດໄພ ແລະ ທັນສະໄໝ. ສາມາດຕອບສະໜອງການເຮັດວຽກໃນຍຸກດິຈິຕອນໄດ້ເປັນຢ່າງດີ, ມີລະບົບຮັກສາຄວາມປອດໄພທາງດ້ານຂໍ້ມູນ ແລະ ປ້ອງກັນຄວາມລັບໃນການສົນທະນາບໍ່ໃຫ້ຮົ່ວໄຫຼອອກໄປນອກ. ຊຶ່ງໃນຕໍ່ໜ້າ ກະຊວງ ປທສ ກໍ່ມີແຜນຈະຂະຫຍາຍການນຳໃຊ້ ລະບົບການສື່ສານຂອງພາກລັດ G-Chat ໄປຫາບັນດາພະແນກການຂອງຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ທັງສູນກາງ ແລະ ທ້ອງຖິ່ນ ແນໃສ່ການ ສ້າງບັນຊີຜູ້ນຳໃຊ້ ໃຫ້ແກ່ບັນດາກະຊວງ, ຫ້ອງການລັດຕ່າງໆ ພ້ອມທັງກຽມຄວາມພ້ອມຂອງການຂະຫຍາຍ ແລະ ຊຸກຍູ້ໃຫ້ມີການຊົມໃຊ້ລະບົບດັ່ງກ່າວ ໃຫ້ແຜ່ຫຼາຍໃນຕໍ່ໜ້າ.

            ຂ່າວ: ສູນບໍລິຫານລັດດ້ວຍເອເລັກໂຕຣນິກ, ປທສ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2019
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 15
ລະ​ບົບ​ຂື້ນ​ທະ​ບຽນ​ປະ​ຊຸມ