ປທສ ເປີດການນຳໃຊ້ລະບົບແຊ ແລະ ນຳໃຊ້ເອກະສານຮ່ວມກັນຂອງພາກລັດ

25/06/2020

ປທສ ເປີດການນຳໃຊ້ລະບົບແຊ ແລະ ນຳໃຊ້ເອກະສານຮ່ວມກັນຂອງພາກລັດ

          ໃນຕອນເຊົ້າ ຂອງ ວັນທີ 25 ມິຖຸນາ 2020, ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ຮ່ວມກັບບໍລິສັດ SB Lab 856 ຈຳກັດ ໄດ້ຈັດພິທີເປີດການນຳໃຊ້ລະບົບການແຊ ແລະ ນຳໃຊ້ເອກະສານຮ່ວມກັນຂອງພາກລັດ (G-Share, G-Drive) ຂື້ນທີ່ຫ້ອງປະຊຸມໃຫຍ່ຊັ້ນ 05, ກະຊວງ ປທສ, ນະຄອນຫຼວງວຽງຈັນ. ໂດຍການເປັນປະທານເປີດງານໂດຍ ທ່ານ ປອ.ທະວີສັກ ມະໂນທັມ, ຫົວໜ້າສູນບໍລິຫານລັດດ້ວຍເອເລັກໂຕຣນິກ, ກະຊວງ ປທສ, ມີຄະນະຜູ້ບໍລິຫານຈາກ ບໍລິສັດ SB Lab 856 ຈຳກັດ, ຄະນະກົມ/ທຽບເທົ່າ ກະຊວງ ປທສ ແລະ ບັນດາກະຊວງອ້ອມຂ້າງເຂົ້າຮ່ວມ.

         ການຫັນເປັນທັນສະໄໝ ແລະ ດິຈິຕອນ ແມ່ນການນຳໃຊ້ ICT ເຂົ້າເປັນກົນໄກສຳຄັນ ໃນການຂັບເຄື່ອນການປະຕິຮູບຂະບວນການບໍລິຫານ ແລະ ບໍລິການຂອງລັດ, ການຜະລິດ, ການດຳເນີນທຸລະກິດ, ການຄ້າ, ການສຶກສາ, ສາທາລະນະສຸກ, ລວມທັງກິດຈະກໍາທາງເສດຖະກິດ ແລະ ສັງຄົມອື່ນໆ ເຂົ້າໃນທຸກຂະແໜງການຂອງລັດ ເພື່ອໃຫ້ບໍລິການປະຊາຊົນເປັນຕົ້ນ: ການຊຳລະພາສີອາກອນຜ່ານລະບົບມືຖື ຫຼື ເວັບໄຊ, ການສ້າງສິ່ງອຳນວຍຄວາມສະດວກ ໃຫ້ພາກທຸລະກິດ, ປະຊາຊົນໃຫ້ເຂົ້າເຖີງຂໍ້ມູນຂ່າວສານຂອງພາກລັດ, ການເຮັດທຸລະກຳຜ່ານທາງລະບົບອິນເຕີເນັດ ທີ່ສ້າງໂອກາດນໍາໄປສູ່ການປະຕິຮູບຂັ້ນພື້ນຖານຂອງການບໍລິການ, ການດຳເນີນທຸລະກິດ ແລະ ສ້າງມູນຄ່າເພີ່ມໃຫ້ແກ່ຜູ້ຊົມໃຊ້ ແລະ ການກ້າວໄປສູ່ອຸດສະຫະກຳ 4.0.

          ກະຊວງ ປທສ ໃນນາມເປັນຜູ້ຄຸ້ມຄອງມະຫາພາກ ດ້ານວຽກງານຫັນໃຫ້ເປັນທັນສະໄໝ ແລະ ດິຈິຕອນ ຂອງລັດຖະບານ ເຫັນໄດ້ເຖິງຄວາມສຳຄັນຕໍ່ວຽກງານການຈັດເກັບ ແລະ ນຳໃຊ້ຂໍ້ມູນຮ່ວມກັນຂອງພາກລັດ ດ້ານວຽກງານຂໍ້ມູນຂ່າວສານຕ່າງໆ, ຈຶ່ງໄດ້ຮ່ວມມືກັບ ບໍລິສັດ ເອັສບີແລັບ 856 ຈຳກັດ ໃນປີ 2019 ພັດທະນາລະບົບການຈັດເກັບ ແລະ ນຳໃຊ້ເອກະສານ ຮ່ວມກັນຂອງພາກລັດ (G-Share, G-Drive) ເພື່ອອຳນວຍຄວາມສະດວກໃຫ້ແກ່ພະນັກງານລັດຖະກອນ ໃນການບັນທຶກ, ຈັດເກັບ, ແບ່ງປັນ ແລະ ແກ້ໄຂເອກະສານສະບັບດຽວກັນຮ່ວມກັນໄດ້ ເຊັ່ນ: ການບັນທຶກຟາຍເອກະສານ, ຮູບພາບ, ວີດີໂອ ແລະ ອື່ນໆ ພ້ອມທັງແບ່ງປັນໃຫ້ບຸກຄົນອື່ນໄດ້ຮັບຮູ້ ແລະ ແກ້ໄຂຮ່ວມກັນໄດ້ໃນເວລາດຽວກັນໂດຍຜ່ານ ລະບົບອິນເຕີເນັດ. ຊຶ່ງໃນຕໍ່ໜ້າ ກະຊວງ ປທສ ກໍ່ຈະສຶບຕໍ່ຜັນຂະຫຍາຍ ແລະ ພັດທະນາລະບົບດັ່ງກ່າວ ໃຫ້ກາຍເປັນລະບົບຕົວແບບໃຫ້ແກ່ຂະແໜງການຕ່າງໆເປັນຕົ້ນ: ບັນດາກະຊວງ ແລະ ອົງການຈັດຕັ້ງພາກລັດ ໃນການອຳນວຍຄວາມສະດວກ ສ້າງລະບົບລາຍງານຂໍ້ມູນສະຖິຕິໃນຂະແໜງການຂອງຕົນ ໃຫ້ມີຄວາມວ່ອງໄວ ທັນສະໄໝ.

           ຂ່າວໂດຍ: ສູນບໍລິຫານລັດດ້ວຍເອເລັກໂຕຣນິກ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2018
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 15
ລະ​ບົບ​ຂື້ນ​ທະ​ບຽນ​ປະ​ຊຸມ