ຝຶກອົບຮົມປ້ອນຂໍ້ມູນເຂົ້າລະບົບລາຍງານແບບທັນສະໄໝຮັບໃຊ້ການນຳ (Minister Dashboard)

24/06/2020

ຝຶກອົບຮົມປ້ອນຂໍ້ມູນເຂົ້າລະບົບລາຍງານແບບທັນສະໄໝຮັບໃຊ້ການນຳ (Minister Dashboard)

       ໃນຕອນເຊົ້າຂອງວັນທີ 24 ມິຖຸນາ 2020 ນີ້, ກະຊວງໄປສະນີ ໂທລະຄົມມະນາຄົມ ແລະ ການສື່ສານ (ປທສ) ໄດ້ເປີດຝຶກອົບຮົມການປ້ອນຂໍ້ມູນເຂົ້າ ລະບົບລາຍງານແບບທັນສະໄໝຮັບໃຊ້ການນຳ (Minister Dashboard) ຂຶ້ນທີ່ສະຖາບັນເຕັກໂນໂລຊີການສື່ສານຂໍ້ມູນຂ່າວສານ (ຫຼັກ3), ນະຄອນຫຼວງວຽງຈັນ. ໂດຍເປັນປະທານກ່າວເປີດຂອງ ທ່ານ ຄຳຜາຍ ອິນທະຣາ, ຫົວໜ້າພະແນກໂປຣແກຣມ ແລະ ຂໍ້ມູນຂ່າວສານ, ສູນບໍລິຫານລັດດ້ວຍເອເລັກໂຕຣນິກ, ກະຊວງ ປທສ, ມີຕາງໜ້າຈາກບັນດາກົມ/ທຽບເທົ່າ, ບໍລິສັດລັດວິສາຫະກິດ ອ້ອມຂ້າງກະຊວງເຂົ້າຮ່ວມ.

        ລະບົບລາຍງານແບບທັນສະໄໝຮັບໃຊ້ການນຳ ແມ່ນໄດ້ຮັບການຮ່ວມພັດທະນາ ລະຫວ່າງ ສູນບໍລິຫານລັດດ້ວຍເອເລັກໂຕຣນິກ, ກະຊວງ ປທສ ແລະ  ບໍລິສັດ ເອັສເທັກ ພັດທະນາ ຈຳກັດ ທີ່ໄດ້ເປີດການນຳໃຊ້ ຢ່າງເປັນທາງການ ໃນວັນທີ 8 ພຶດສະພາ ຜ່ານມານີ້. ດັ່ງນັ້ນ, ເພື່ອເຮັດໃຫ້ລະບົບມີຂໍ້ມູນທີ່ຄົບຖ້ວນ ສົມບູນ, ກະຊວງ ປທສ ຈຶ່ງໄດ້ຈັດຝຶກອົບຮົມການປ້ອນຂໍ້ມູນເຂົ້າໃນລະບົບໃນຄັ້ງນີ້ຂຶ້ນ ເພື່ອໃຫ້ທຸກພາກສ່ວນ ໂດຍສະເພາະບັນດາບໍລິສັດທີ່ໃຫ້ບໍລິການທາງດ້ານໂທລະຄົມ ສະໜອງຂໍ້ມູນໃຫ້ແກ່ ພະແນກສະຖິຕິ, ກົມແຜນການ ແລະ ການຮ່ວມມື ກໍ່ຄື ກະຊວງ ປທສ ໄດ້ຮູ້ເຖິງວິທີການປ້ອນຂໍ້ມູນເຂົ້າໃນລະບົບ ສະແດງຂໍ້ມູນຖືກຕ້ອງ, ຊັດເຈນ, ສະດວກ ແລະ ມີປະສິດທິພາບ.

        ການນໍາສະເໜີບົດ ແມ່ນໄດ້ແບ່ງອອກເປັນ 2 ພາກ ຄື: ການນຳສະເໜີຫຍໍ້ ກ່ຽວກັບລະບົບ (Minister Dashboard) ແລະ ໄດ້ແນະນຳ (ແບບຟອມ) ຂັ້ນຕອນກະກຽມການບັນທຶກ, ການເອົາຂໍ້ມູນເຂົ້າລະບົບ, ແນະນຳ (ໂປຣແກຣມ) ທີ່ໃຊ້ໃນການອັບໂຫຼດຂໍ້ມູນ, ຟາຍເອກະສານເຂົ້າລະບົບ ແລະ ການປ້ອນຂໍ້ມູນສະຖິຕິເຂົ້າລະບົບ ພ້ອມທັງສາທິດການເຂົ້າເບີ່ງການສະແດງຜົນລາຍງານຕົງຈີງ. ພ້ອມດຽວກັນນີ້, ຍັງໄດ້ມີການ ແລກປ່ຽນຄຳຄິດເຫັນ, ສະຫຼຸບຕີລາຄາ ຜົນການຈັດຝຶກອົບຮົມດັ່ງກ່າວເພື່ອໃຫ້ຜູ້ເຂົ້າຮ່ວມໄດ້ຮັບຊາບ ແລະ ນຳເອົາໄປຈັດຕັ້ງປະຕິບັດເຂົ້າໃນໜ້າທີ່ວຽກງານຂອງຕົນ.
          ຂ່າວໂດຍ: ສູນບໍລິຫານລັດດ້ວຍເອເລັກໂຕຣນິກ, ປທສ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2018
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 15
ລະ​ບົບ​ຂື້ນ​ທະ​ບຽນ​ປະ​ຊຸມ