ປທສ ຮ່ວມກັບ ຄະນະສະເພາະກິດ ພັດທະນາ ເວັບໄຊ Covid-19

24/04/2020

ປທສ ຮ່ວມກັບ ຄະນະສະເພາະກິດ ພັດທະນາ ເວັບໄຊ Covid-19

  ຕົ້ນເດືອນເມສາ 2020 ຜ່ານມານີ້, ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ຮ່ວມກັບ ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດ Covid-19, ກະຊວງ ສາທາລະນະ   ສຸກ, ບໍລິສັດ ໄຊເບີເຣຍ, ​ບໍລິສັດ LaiLaoLab ແລະ ບໍລິສັດ SB Lab 856 ຈຳກັດ ຮ່ວມກັນພັດທະນາເວັບໄຊ www.covid19.gov.la  ເພື່ອເປັນບ່ອນເຜີຍແຜ່ຂໍ້ມູນຂ່າວສານທາງການ ກ່ຽວກັບພະຍາດ Covid-19 ຢູ່ ໃນ ສປປ ລາວ.

    ການສ້າງເວັບໄຊນີ້ ກໍ່ເພື່ອເປັນມາດຕະການໜຶ່ງໃນການນຳໃຊ້ໄອຊີທີ ເຂົ້າມາຊ່ວຍໃຫ້ຄະນະສະເພາະກິດ ແລະ ຂະແໜງການທີ່ກ່ຽວຂ້ອງ ໃນການເຜີຍແຜ່, ສະໜອງຂໍ້ມູນຂ່າວສານ ແລະ ເອກະສານທາງການຂອງລັດຖະບານ ເຊັ່ນ: ຄຳສັ່ງ,ແຈ້ງການ, ບົດແນະນຳ, ວິດີໂອຖະແຫຼງຂ່າວປະຈຳວັນ, ບັນດາຂໍ້ມູນຂ່າວສານັ, ການເຄື່ອນໄຫວຂອງຄະນະສະເພາະກິດ ແລະ ລັດຖະບານ ທີ່ຕິດພັນກັບການປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດ Covid-19. ນອກນີ້, ເວັບໄຊ ຍັງໄດ້ເປັນເຊື່ອມໂຍງເອົາລະບົບບໍລິການ ແລະ ການເຜີຍແຜ່ຂໍ້ມູນທີ່ຕິດພັນກັບວຽກງານປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ Covid-19 ຂອງຂະແໜງການຕ່າງໆ ເຊັ່ນ: ໜ້າ Facebook page ຂອງສູນຂໍ້ມູນຂ່າວສານການແພດສຸຂະສຶກສາ (ທີ່ສາມາດເບິ່ງໜ້າ Facebook page ຂອງສູນຜ່ານເວັບໄຊ ໂດຍທີ່ຜູ້ໃຊ້ບໍ່ຈຳເປັນຈະຕ້ອງມີ ລະຫັດຊື່ Facebook ຫຼື ລ໊ອກອິນເຂົ້າ Facebook ຂອງຕົນ) ແລະ ບັນດາລະບົບໂປຣແກຣມທີ່ທາງ ກະຊວງ ປທສ ຮ່ວມກັບບໍລິສັດພັດທະນາຊອບແວຂອງລາວ ພັດທະນາຂື້ນມາ ເປັນຕົ້ນ ລະບົບ Dashboard ລາຍງານຂໍ້ມູນການແຜ່ລະບາດຂອງເຊື້ອພະຍາດ Covid-19 ຂອງ ສປປ ລາວ, ອາຊຽນ ແລະ ສາກົນ ເຊິ່ງສາມາດສະແດງຂໍ້ມູນແບບ Real-time, ລະບົບສົນທະນາ ແລະ ສອບຖາມຂໍ້ມູນ (Chatbot) ທີ່ສາມາດນຳໃຊ້ໃນການສອບຖາມຂໍ້ມູນໄດ້, ພ້ອມນັ້ນ, ຍັງມີລະບົບຕິດຕາມ-ເຝົ້າລະວັງການລະບາດຂອງ  Covid-19  ເທິງລະບົບມືຖື (LaoKYC Mobile Application) ທີ່ຜູ້ໃຊ້ສາມາດເຂົ້າຫາ ແລະ ນຳໃຊ້ບັນດາລະບົບຕ່າງໆ ຜ່ານການເຂົ້າຫາເວັບໄຊດັ່ງກ່າວໄດ້.

   www.covid19.gov.la ເປັນເວັບໄຊທີ່ພັດທະນາຂື້ນໂດຍນຳໃຊ້ລະບົບຕົວແບບຂອງເວັບໄຊລັດຖະບານ (G-Web Platform) ທີ່ກະຊວງ ປທສ ໄດ້ພັດທະນາ ແລະ ເປີດການນຳໃຊ້ຢ່າງເປັນທາງການໃນຕົ້ນເດືອນກຸມພາທີ່ຜ່ານມາ, ເຮັດໃຫ້ການອັບໂຫຼດ ແລະ ບໍລິຫານຂໍ້ມູນຂື້ນເວັບໄຊ ໄດ້ຢ່າງສະດວກສະບາຍ. ປະຈຸບັນມີເອກະສານທາງການທີ່ຕິດພັນກັບການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ Covid-19 ຢູ່ ສປປ ລາວ ຫຼາຍກວ່າ 90 ສະບັບ, ຂໍ້ມູນຂ່າວສານກໍລະນີຕິດເຊື້ອ, ບັນດາສື່ໂຄສະນາທັງແບບຮູບພາບ ແລະ ວິດີໂອ ທີ່ຜ່ານການກວດກາ,ຮອງຮັບຈາກຄະນະສະເພາະກິດ ແລະ ກະຊວງສາທາລະນະສຸກ ທີ່ອັບເດດຂື້ນໃນແຕ່ລະມື້ ຫຼາຍກວ່າ 120 ລາຍການ ແລະ ມີຜູ້ເຂົ້າຊົມເວັບໄຊແລ້ວ ຫຼາຍກວ່າ 30,000 ເທື່ອຄົນ ຫຼັງຈາກເປີດເວບໄຊຂື້ນຢ່າງເປັນທາງການບໍ່ດົນ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2018
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 15
ລະ​ບົບ​ຂື້ນ​ທະ​ບຽນ​ປະ​ຊຸມ