ປທສ ມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈໍາປີ 2019

12/03/2020

ປທສ ມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈໍາປີ 2019

        ໃນວັນທີ 11 ມີນານີ້, ທີ່ກະຊວງ ໄປສະນີ, ໂທລະຄົມມະນາຄົມ ແລະ ການສືື່ສານ (ປທສ) ໄດ້ຈັດກອງປະຊຸມເຜີຍແຜ່ ຄຳແນະນຳ ກ່ຽວກັບການຈັດຕັ້ງປະຕິບັດຄຳສັ່ງ ກົມການເມືອງສູນກາງພັກ ກ່ຽວກັບ ວຽກງານ ຂະຫຍາຍພັກ, ພິທີມອບໃບຢັ້ງຢືນໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ປະຈຳປີ 2019 ແລະ ພິທີສະຫຼຸບຜົນສໍາເລັດປະຈໍາປີມອບ ໃບຍ້ອງຍໍ ການປະຕິບັດວຽກງານຂອງ ພະນັກງານ ກະຊວງ ປທສ ປະຈຳປີ 2019 ຂຶ້ນ. ໂດຍການເປັນປະທານຂອງ ສະຫາຍ ທັນສະໄໝ ກົມມະສິດ ຄະນະປະຈໍາພັກ, ເລຂາຄະນະພັກ, ລັດຖະມົນຕີ ກະຊວງ ປທສ, ມີບັນດາຄະນະພັກ, ຄະນະນຳກະຊວງ, ຄະນະໜ່ວຍພັກ ບັນດາກົມ/ທຽບເທົ່າ, ຄະນະພັກຮາກຖານ, ຄະນະອຳນວຍການ ບໍລິສັດລັດ ວິສາຫະກິດທີ່ໃຫ້ບໍລິການດ້ານໂທຄົມມະນາຄົມ ພ້ອມດ້ວຍສະມາຊິກພັກອ້ອມຂ້າງກະຊວງເຂົ້າຮ່ວມ.

         ໃນພິທີໄດ້ຜ່ານບົດສະຫຼຸບ ການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຂອງກະຊວງ ປທສ ໃນໄລຍະຜ່ານມາເຊິ່ງຄະນະໜ່ວຍພັກໄດ້ມີຄວາມເອົາໃຈໃສ່ ໃນການຊີ້ນຳ-ນຳພາ ຕໍ່ວຽກງານທີ່ ພັກ-ລັດ ໄດ້ມອບໝາຍໃຫ້ ໂດຍຖືເອົາວຽກງານສຶກສາອົບຮົມ ການເມືອງ-ແນວຄິດ ເປັນຕົ້ນຕໍ ເຮັດໃຫ້ສະມາຊິກພັກສ່ວນຫຼາຍຍັງຮັກສາຄຸນທາດການເມືອງໄດ້ຢ່າງໜັກແໜ້ນ, ມີອຸດົມການ ແລະ ມີນຳໃຈການປະຕິວັດສູງ ໂດຍປະຕິບັດຕາມແນວທາງຂອງພັກ, ກົດໝາຍຂອງລັດໄດ້ດີ, ມີການເຄື່ອນໄຫວຕາມແບບແຜນທີ່ໄດ້ກຳນົດໄວ້ ແລະ ສືບຕໍ່ປັບປຸງໜ່ວຍພັກຂອງຕົນໃຫ້ມີຄວາມໜັກແໜ້ນ-ເຂັ້ມແຂງເທື່ອລະກ້າວ, ພ້ອມກັນຕັ້ງໜ້າປະຕິບັດວຽກງານການເມືອງ-ແນວຄິດ ຕິດພັນກັບວຽກງານວິຊາສະເພາະ ທີ່ໄດ້ຮັບມອບໝາຍຢ່າງມີຜົນສຳເລັດ, ຄະນະໜ່ວຍພັກ ແລະ ສະມາຊິກພັກແຕ່ລະສະຫາຍກໍ່ໄດ້ສຸມໃສ່ວຽກງານກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຕາມ 05 ດ້ານ: ນຳພາດ້ານການເມືອງ, ດ້ານແນວຄິດ, ດ້ານການຈັດຕັ້ງ, ດ້ານແບບແຜນວິທີນຳພາ ແລະ ປະຕິບັດໜ້າທີ່ການເມືອງ, ສາມາດເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ຈຳນວນ  18 ໜ່ວຍພັກ. ພ້ອມດຽວກັນນີ້, ຍັງໄດ້ມີພິທີມອບໃບຢັ້ງຢືນໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ປະຈຳປີ 2019 ແລະ ພິທີສະຫຼຸບຜົນສໍາເລັດປະຈໍາປີມອບໃບຍ້ອງຍໍ ການປະຕິບັດວຽກງານຂອງ ພະນັກງານ ກະຊວງ ປທສ ປະຈຳປີ 2019.

          ໃນຕອນທ້າຍ ສະຫາຍ ທັນສະໄໝ ກົມມະສິດ ໄດ້ໃຫ້ກຽດໂອ້ລົມ ແລະ ໃຫ້ທິດຊີ້ນຳຕໍ່ພິທີ ຊຶ່ງກ່ອນອຶ່ນໝົດ ທ່ານໄດ້ສະແດງຄວາມຍ້ອງຍໍ, ຊົມເຊີຍຕໍ່ຄະນະໜ່ວຍພັກ ບັນດາກົມ/ທຽບເທົ່າ, ຄະນະພັກຮາກຖານ, ຄະນະອຳນວຍການ ບໍລິສັດລັດ ວິສາຫະກິດທີ່ໃຫ້ບໍລິການດ້ານໂທຄົມມະນາຄົມ ຕໍ່ກັບຜົນງານທີ່ງານມາໄດ້ ແລະ ໃຫ້ສືບຕໍ່ເສີມຂະຫຍາຍມູນເຊື້ອອັນດີງາມ, ຜົນງານດ້ານດີ, ເດັດດ່ຽວປັບປຸງແກ້ໄຂຈຸດອ່ອນຄົງຄ້າງ ແລະ ສິ່ງທີ່ທ້າທາຍເປັນໄພອັນຕະລາຍ ຕໍ່ພັກເຮົາ, ແນໃສ່ເຊີດຊູບົດບາດຄວາມສາມາດນຳພາຂອງໜ່ວຍພັກ ແລະ ຍົກສູງຄວາມເປັນແບບຢ່າງນຳໜ້າ ຂອງຖັນແຖວສະມາຊິກພັກ, ເພີ່ມທະວີເຄື່ອນໄຫວວຽກງານວິຊາສະເພາະ, ສາມາດປະຕິບັດໜ້າວຽກທີ່ການ ຈັດຕັ້ງມອບໝາຍໃຫ້ສຳເລັດຜົນ, ມີແນວຄິດການເມືອງໜັກແໜ້ນເຂັ້ມແຂງຕໍ່ການຈັດຕັ້ງ, ເອົາໃຈໃສ່ຝຶກຝົນຫຼໍ່ຫຼອມຕົນເອງຕາມ 05 ດ້ານ ເພື່ອຮັບປະກັນໃຫ້ພັກເຮົາມີຄວາມປອດໃສ, ເຂັ້ມແຂງ, ໜັກແໜ້ນ ຂຶ້ນເລື້ອຍໆ.

          ຂ່າວ: ກົມຈັດຕັ້ງ-ພະນັກງານ, ປທສ.

          ກວດແກ້+ພາບ: ຫ້ອງການ, ພະແນກເລຂານຸການພິທີການ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2018
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 15
ລະ​ບົບ​ຂື້ນ​ທະ​ບຽນ​ປະ​ຊຸມ