ປທສ ສໍາເລັດກອງປະຊຸມປະຈໍາປີ 2019

14/02/2020

ປທສ ສໍາເລັດກອງປະຊຸມປະຈໍາປີ 2019

           ກອງປະຊຸມວຽກງານໄປສະນີ, ໂທລະຄົມມະນາຄົມ ແລະການສື່ສານ (ປທສ) ປີ 2019 ໄດ້ອັດລົງດ້ວຍຜົນສໍາເລັດອັນຈົບງາມ ທີ່ສູນການຮ່ວມມືລາວ-ຢີ່ປຸນ (ຫຼັກ 5), ນະຄອນຫຼວງວຽງຈັນ ໃນຕອນສວຍຂອງວັນທີ 13 ກຸມພານີ້, ໂດຍການເປັນປະທານຂອງ ທ່ານ ສົມດີ ດວງດີ ກໍາມະການສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງການເງີນ ມີບັນດາທ່ານລັດຖະມົນຕີ/ຮອງລັດຖະມົນຕີ, ຄະນະກົມ/ທຽບເທົ່າ ແລະ ຄະນະພະແນກ ປທສ ແຂວງ ພ້ອມດ້ວຍແຂກທີ່ຖືກເຊີນເຂົ້າຮ່ວມ.

           ໃນກອງປະຊຸມ ທ່ານ ປອ. ທັນສະໄໝ ກົມມະສິດ, ກໍາມະການສູນກາງພັກ, ລັດຖະມົນຕີກະຊວງ ປທສ ໄດ້ລາຍງານຜົນຂອງກອງປະຊຸມວຽກງານ ປທສ ໃນປີ 2019  ແລະ ທິດທາງແຜນການ ປະຈໍາປີ 2020 ​ຊຶ່ງ​ຈະ​ໄດ້ສືບ​ຕໍ່ຈັດຕັ້ງຜັນຂະຫຍາຍແນວທາງຂອງພັກ ແລະ ແຜນພັດທະນາເສດຖະກິດ-ສັງຄົມ ໃນຂົງເຂດ ປທສ ​ເພື່ອເຮັດໃຫ້ວຽກງານດັ່ງກ່າວກາຍເປັນກຳລັງຂັບເຄື່ອນທີ່ແຂງແຮງ ເຂົ້າໃນການພັດທະນາເສດຖະກິດ, ສັງຄົມ, ວັດທະນະທຳ, ສິ່ງແວດລ້ອມ, ວຽກງານປ້ອງກັນຊາດ, ປ້ອງກັນຄວາມສະຫງົບ ​ແລະ ການ​ເຊື່ອມ​ໂຍງກັບພາກພື້ນ ແລະ ສາກົນ.

             ໃນໂອກາດນີ້, ທ່ານຮອງນາຍົກລັດຖະມົນຕີ ໄດ້ໃຫ້ກຽດໂອ້ລົມຕໍ່ກອງປະຊຸມ ຊຶ່ງກ່ອນອຶ່ນໝົດທ່ານໄດ້ສະແດງຄວາມຍ້ອງຍໍ, ຊົມເຊີຍ ຕໍ່ຜົນສໍາເລັດທີ່ຍາດມາໄດ້ ທີ່​ສ່ອງ​ແສງ​ເຖິງຄວາມ​ຮັບ​ຜິດ​ຊອບ​ ຂອງທຸກ​ຂະ​ແໜງ​ການ ​ຕໍ່ວ​ຽກ​ງານ​ໄອ​ຊີ​ທີ ເປັນຕົ້ນແມ່ນການເປັນເຈົ້າພາບຈັດກອງປະຊຸມລັດຖະມົນຕີອາຊຽນດ້ານໄອຊີທີ ທີ່ປະສົບຜົນສໍາເລັດຢ່າງຈົບງາມ. ພ້ອມນີ້, ທ່ານຍັງຍົກໃຫ້ເຫັນເຖິງຄວາມສໍາຄັນຂອງອິນເຕີເນັດ ເຕັກໂນໂລຊີດິຈິຕອນ ໄດ້ສ້າງການຫັນປ່ຽນ ເສດຖະກິດ-ສັງຄົມ ວັດທະນະທໍາ ດ້ວຍບາດກ້າວທີ່ ສະຕະວັດກ້າວກະໂດດ ເວົ້າໄດ້ວ່າ ເຕັກໂນໂລຊີດິຈິຕອນ ນັບມື້ນັບມີຜົນກະທົບຕໍ່ການດໍາລົງຊີວິດຂອງຄົນເຮົາ ກໍ່ຄືການພັດທະນາປະເທດ ຊຶ່ງມັນໄດ້ສ້າງທັງກາລະໂອກາດ ແລະ ສິ່ງທ້າທາຍ ທີ່ທຳລາຍອັນເກົ່າດັ້ງເດີມ ເພື່ອສ້າງອັນໃໝ່ທົດແທນທີ່ດີກວ່າ, ທັນສະໄໝກວ່າ (Disruptive technology). ສະນັ້ນ, ແຕ່ລະຂະແໜງການ ກໍ່ຄືບັນດາອົງການຈັດຕັ້ງລັດຕ່າງໆ ຕ້ອງຖືເອົາການນໍາໃຊ້ເຕັກໂນໂລຊີດິຈິຕອນ ເປັນໃຈກາງຂອງການຍົກສູງປະສິດຕິພາບ ແລະ ປະສິດຕິຜົນ ຂອງການປະຕິບັດງານ. ດັ່ງນັ້ນ, ເພື່ອໃຫ້ບັນລຸວັດຖຸປະສົງ ບັນດາຂະແໜງການຄວນມີ ແຜນຍຸດທະສາດ ຫຼື ແຜນງານການນໍາໃຊ້ ໄອຊີທີ ໃນຂະແໜງການຂອງຕົນ ພ້ອມທັງມີການປະສານງານ ກັບກະຊວງ ປທສ ໃນການຈັດຕັ້ງ ປະຕິບັດ ເພື່ອຮັບປະກັນໃຫ້ມີການເຊື່ອມໂຍງ ລະຫວ່າງຂໍ້ມູນ ແລະ ຖານຂໍ້ມູນ ຂອງບັນດາອົງການຈັດຕັ້ງລັດ ໃຫ້ເປັນມາດຕະຖານດຽວກັນ. ຫຼີກລ້ຽງການລົງທຶນທີ່ຊໍ້າຊ້ອນ. ບັນດາຫ້ອງການຕ່າງໆ ຕ້ອງຕັ້ງໜ້າຫັນໄປສູ່ການບໍລິການແບບອອນລາຍ ເທື່ອລະກ້າວ. ບັນດາລັດວິສາຫະກິດ ຕ້ອງມີການປັບປຸງການດໍາເນີນທຸລະກິດ ໃຫ້ທັນກັບສະພາບການ ສ້າງໃຫ້ມີນະວັດຕະກໍາໃໝ່ ການດໍາເນີນທຸລະກິດ, ເນັ້ນຫາຕົ້ນທຶນຄ່າໃຊ້ຈ່າຍທີ່ບໍ່ຈໍາເປັນ, ຫຼີກລ້ຽງການລົງທຶນທີ່ບໍ່ເກີດປະໂຫຍດ, ເປີດໂອກາດໃຫ້ປະຊາຊົນ ຊອກຮູ້ຮໍ່າຮຽນສິ່ງໃໝ່ໆ ແລະ ຮັບເອົາກາລະໂອກາດ ຂອງການນໍາໃຊ້ ໄອຊີທີ ໃຫ້ເກີດປະໂຫຍດສູງສຸດ ແຕ່ໃຫ້ມີສະຕິ ແລະ ມີຈັນຍາບັນ, ຫຼີກເວັ້ນການຕົກເປັນເຫຍື່ອຂອງກຸ່ມຄົນບໍ່ດີ ທີ່ອາດຈະມີການເຜີຍແຜ່ຂໍ້ມູນຂ່າວສານທີ່ບໍ່ຖືກຕ້ອງ ຫຼື ຊັກຊວນໃຫ້ກະທໍາສິ່ງທີ່ຜິດຕໍ່ລະບຽບກົດໝາຍ.

                 ພ້ອມນີ້, ທ່ານຍັງໄດ້ເນັ້ນໜັກໃຫ້ ຂະແໜງການ ປທສ ສືບຕໍ່ສ້າງ ແລະ ປັບປຸງ ນະໂຍບາຍ ແລະ ຍຸດທະສາດທີ່ຖືກຕ້ອງ ສອດຄ່ອງກັບແນວທາງນະໂຍບາຍ ລະບຽບກົດໝາຍຂອງພັກ- ລັດຖະບານ ກໍ່ຄືສະພາບການປ່ຽນແປງຂອງດິຈິຕອນໃນແຕ່ລະໄລຍະ, ຕ້ອງເປັນເຈົ້າການເລັ່ງຄົ້ນຄວ້າສ້າງແຜນແມ່ບົດການຫັນທັນສະໄໝທາງດ້ານດິຈິຕອນ ແຜນແມ່ບົດການກ້າວໄປສູ່ເສດຖະກິດດິຈິຕອນ ແຜນແມ່ບົດການຫັນໄປສູ່ ການຊໍາລະສະສາງ ທັນສະໄໝດ້ວຍດິຈິຕອນ ຂອງ ສປປ ລາວ ໂດຍສົມທົບກັບຂະແໜງ ການກ່ຽວຂ້ອງ ເພື່ອຍົກລະດັບການຄຸ້ມຄອງ ແລະ ພັດທະນາດິຈິຕອນໃນ ສປປ ລາວ ໃຫ້ເປັນລະບົບ, ຮອງຮັບການຂັບເຄື່ອນເສດຖະກິດ-ສັງຄົມ. ຄຽງຄູ່ກັບການສ້າງ ແລະ ປັບປຸງ ບັນດານິຕິກໍາ ເພື່ອສ້າງສະພາບແວດລ້ອມທີ່ເອື້ອຍອໍານວຍໃຫ້ແກ່ການເຄື່ອນໄຫວຄຸ້ມຄອງ ຕໍ່ການດໍາເນີນດ້ານທຸລະກິດດິຈິຕອນ, ໂດຍສະເພາະການບໍລິຫານລັດດ້ວຍເອເລັກໂຕຣນິກ, ການທະນາຄານເອເລັກໂຕຣນິກ, ການຄ້າເອເລັກໂຕຣນິກ ແລະ ການຫັນເປັນສັງຄົມຂໍ້ມູນຂ່າວສານ, ສະກັດກັ້ນການນໍາໃຊ້ດິຈິຕອນ ເປັນພາຫະນະ ໃນການກໍ່ຄວາມບໍ່ສະຫງົບ, ການໃສ່ຮ້າຍປ້າຍສີ ຫຼື ສ້າງຄວາມວຸ່ນວາຍໃຫ້ແກ່ສັງຄົມ. ຄົ້ນຄວ້າ ສ້າງນະວັດຕະກໍາໃໝ່ ຂອງການນໍາໃຊ້ໄອຊີທີ ເພື່ອເປັນພື້ນຖານໃນການຊຳລະສະສາງ ແລະ ເກັບລາຍຮັບ ເຂົ້າງົບປະມານຜ່ານລະບົບໂທລະສັບມືຖື (Mobile Money). ພ້ອມທັງຊ່ວຍສົ່ງເສີມທຸລະກິດຂະໜາດນ້ອຍ, ຂະໜາດກາງ (SMEs) ແລະ ຜູ້ປະກອບການໃໝ່ (Start Up) ໃນການເຂົ້າຫາແຫຼ່ງທຶນ, ເຂົ້າເຖິງການຄ້າຂາຍທາງເອເລັກໂຕຣນິກ (E-Commerce) ເພື່ອສ້າງວຽກເຮັດ-ສ້າງລາຍໄດ້ໃຫ້ປະຊາຊົນ ໄດ້ຢ່າງແທ້ຈິງ. ພິເສດ ແມ່ນເພື່ອຊ່ວຍເຮັດໃຫ້ລັດຖະບານ ສາມາດຈັດເກັບລາຍຮັບເຂົ້າງົບປະມານແຫ່ງຊາດ ໄດ້ຕາມຄາດໝາຍ, ສະດວກສະບາຍ ໂປ່ງໃສ ແລະ ກວດສອບໄດ້. ເຮັດໃຫ້ຊີວິດການເປັນຢູ່ ຂອງປະຊາຊົນ ດີຂຶ້ນກວ່າເກົ່າ, ປະເທດຊາດຮັ່ງມີ, ເຂັ້ມແຂງ, ສີວິໄລ ແລະ ຍຸຕິທໍາ.

                   ຂ່າວ: ຫ້ອງການກະຊວງ, ພະແນກເລຂານຸການ-ພິທີການ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2018
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາລະສານ ໄອຊີທີ ສະບັບທີ 13
ລະ​ບົບ​ຂື້ນ​ທະ​ບຽນ​ປະ​ຊຸມ