ປທສ ໄຂກອງປະຊຸມປະຈໍາປີ 2019

11/02/2020

ປທສ ໄຂກອງປະຊຸມປະຈໍາປີ 2019

       ກອງປະຊຸມວຽກງານໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ໄຂຂຶ້ນໃນຕອນເຊົ້າ ຂອງວັນທີ 11 ກຸມພາ 2020 ນີ້, ທີ່ສູນການຮ່ວມມືລາວ-ຢີ່ປຸນ (ຫຼັກ 5), ນະຄອນຫຼວງວຽງຈັນ ຊຶ່ງໄດ້ດຳ​ເນີນ​ເປັນໄລຍະ​ເວ​ລາ 03 ວັນ​ (ລະຫວ່າງວັນ​ທີ 11-13 ກຸມພາ 2020) ພາຍໃຕ້ຄໍາຂວັນ: } ຊຸກຍູ້ ສົ່ງເສີມ ການຫັນເປັນທັນສະ ໄໝ ລະບົບການບໍລິການຂອງລັດ ດ້ວຍດີຈີຕອນ~. ໂດຍການເປັນປະທານຂອງ ທ່ານ ປອ ທັນສະໄໝ ກົມມະສິດ, ກ​າມະ​ການ​ສູນ​ກາງ​ພັກ, ລັດຖະມົນຕີກະຊວງ ປທສ, ມີ​​ຄະນະນໍາກະ​ຊວງ, ຫົວໜ້າກົມ, ຮອງກົມ/ທຽບເທົ່າ, ຫົວໜ້າພະແນກ/ຮອງພະແນກ ປທສ ແຂວງ/ນະຄອນຫຼວງ, ຄະນະອໍານວຍການລັດວິສາຫະກິດ, ຕາງໜ້າບັນດາກະຊວງ/ອົງການທຽບເທົ່າ ອ້ອມຂ້າງສູນກາງ ພ້ອມດ້ວຍພະນັກງານ ຫຼັກແຫຼ່ງອ້ອມຂ້າງກະຊວງເຂົ້າຮ່ວມ.

           ທ່ານ ທອງໃສ ຊານໄຊຍະ ຮອງລັດຖະມົນຕີກະຊວງ ປທສ ໄດ້ຜ່ານບົດສະຫຼຸບ ການຈັດຕັ້ງປະຕິບັດວຽກງານ ປທສ ໃນໄລຍະປີ 2019 ແລະ ທິດທາງແຜນການປີ 2020 ກໍ່ຄືໃນໃນໄລຍະ 1 ປີຜ່ານມາ ສາມາດຍາດໄດ້ຜົນງານພົ້ນເດັ່ນຫຼາຍປະການເຊັ່ນ: ສໍາເລັດການເປັນເຈົ້າພາບໝູນວຽນກອງປະຊຸມລັດຖະມົນຕີ ໄອຊີທີ ອາຊຽນ ຄັ້ງທີ 19, ທົດລອງນໍາໃຊ້ລະບົບອອກໃບຮັບຮອງເອເລັກໂຕຣນິກແຫ່ງຊາດ National Root Certification Authority (NRCA) ເພື່ອກຽມຄວາມພ້ອມໃນການເຮັດທຸລະກໍາອອນລາຍ; ໄດ້ໃຫ້ບໍລິການສູນຂໍ້ມູນເອເລັກໂຕຣນິກແກ່ບັນດາອົງການຈັດຕັ້ງລັດ ແລະ ເອກະຊົນເປັນຕົ້ນ ການຝາກເວັບໄຊ ທີ່ມີລະບົບຄວາມປອດໄພ, ບໍລິ ການລະບົບອີເມວທາງການ, ບໍລິການເຊີເວີ; ສ້າງລະບົບຫ້ອງການທັນສະໄໝ (E-Office) ລວມທັງລະບົບອີເມວ, ລະບົບກອງປະຊຸມທາງໄກສຳລັບພາກລັດ ແລະ ລະບົບບໍລິການປະຕູດຽວຖານຂໍ້ມູນພາກລັດ (e-Government portal).​ ພ້ອມນີ້, ຍັງໄດ້ລິເລີ່ມໂຄງການຫັນເປັນທັນສະໄໝ ໃນການຊຳລະສະສາງ ແລະ ການເກັບລາຍຮັບເຂົ້າງົບປະມານ. ອະນຸຍາດໃຫ້ບໍລິສັດທີ່ໃຫ້ບໍລິການດ້ານໂທລະຄົມທົດລອງນໍາໃຊ້ລະບົບ 5G, ສ້າງລະບົບຕິດຕາມກວດ ກາໄພຄຸກຄາມທາງໄຊເບີ (Cyber attack Monitoring System); ຕິດຕັ້ງລະບົບເຕັກນິກ ເພື່ອຮັບແຈ້ງເຫດສຸກເສີນທາງຄອມພີວເຕີ (RTIR), ລະບົບຕິດຕາມ ແລະ ກວດຈັບການໂຈມຕີລະບົບເຄື່ອຂ່າຍ (Tsubame Sensor), ລະບົບແຈ້ງເຕືອນ, ເຜີຍແຜ່ຄວາມຮູ້ໃຫ້ແກ່ສັງຄົມ (Web Server) ແລະ ລະບົບຄວາມປອດໄພເທີງເວັບໄຊ (SSL Certificate),​ ສ້າງແຜນການນໍາໃຊ້ CA ເຂົ້າກັບລະບົບ e-office, ລະບົບ i-office, e-tax ຂອງກະຊວງ ການເງິນ; ສ້າງຄູ່ກະແຈຂັ້ນສູງສຸດ (Root CA), ຄູ່ກະແຈລັດຖະບານ (Government CA), ຄູ່ກະແຈສາທາລະນະ (Public CA), ສ້າງສະຖານີກວດກາຄື້ນຄວາມຖີ່ວິທະຍຸສື່ສານແບບບໍໍ່ມີຄົນປະຈຳ (Remote Monitoring Station)  2 ແຫ່ງທີ່ສະໜາມບິນສາກົນວັດໄຕ ແລະ ເມືອງຈັນທະບູລີ ນະຄອນຫຼວງວຽງຈັນ. ດ້ານນິຕິກໍາ ສ້າງດຳລັດ 2 ສະບັບ, ຂໍ້ຕົກລົງ 3 ສະບັບ, ຄຳແນະນຳ 1 ສະບັບ. ສາມາດສ້າງບຸກຄະລາກອນດ້ານໄອຊີທີ ລະບົບຊັ້ນສູງໄດ້ 275 ຄົນ, ຝຶກອົບຮົມ, ສໍາມະນາທັງພາຍໃນ ແລະ ຕ່າງປະເທດໄດ້ 475 ເທື່ອຄົນ, ສ້າງລະບົບການສອບເສັງ ແບບອີເລັກໂຕຣນິກ (E-Testing), ລະບົບລາຍງານຜົນການສອບເສັງແບບເລັກໂຕຣນິກ (E-Score) ແລະ ຫຼັກສູດການສຶກສາທາງໄກ, ຄົ້ນຄວ້າປັບປຸງຫຼັກສູດການຮຽນ-ການສອນຊັ້ນປະລິນຍາຕີລະບົບຕໍ່ເນື່ອງ. ສໍາເລັດການເປັນເຈົ້າພາບຈັດການແຂ່ງ ຂັນປະກວດການຄົ້ນຄວ້າ ແລະ ພັດທະນາບໍລິການທາງດ້ານໄອຊີທີ (ICT AWARD), ສປປ ລາວສາມາດຍາດໄດ້ 2 ລາງວັນ. ພັດທະນາວຽກງານໄປສະນີ ໃຫ້ສາມາດນໍາໃຊ້ເຕັກໂນໂລຊີ ທີ່ທັນສະໄໝເຂົ້າໃນ ການບໍລິການ E-post, E-logistice, E-Finance service ແລະ  E-commerce. ການຮ່ວມມືສາກົນໄດ້ເຊັນບົດບັນທຶກຄວາມເຂົ້າໃຈ (MOU)  03 ສະບັບ ໄດ້ຮັບທຶນຊ່ວຍເຫຼືອ 03 ໂຄງການ ແລະ ອີກ 2 ໂຄງການຈາກ ສປ ຈີນ.

            ສໍາລັບທິດທາງແຜນການໃນຕໍ່ໜ້າ ກໍ່ຄືປີ 2020 ເພື່ອເຮັດໃຫ້ແຜນປີສຸດທ້າຍຂອງ ແຜນພັດທະນ 5 ປີ ຄັ້ງທີ II (2016-2020) ຂອງຕົນໄດ້ຮັບການຈັດຕັ້ງປະຕິບັດດ້ວຍໝາກຜົນສູງ ຄຽງຄູ່ກັບການເອົາໃຈໃສ່ເພີ່ມທະວີການໂຄສະນາ, ເຜີຍແຜ່ໃຫ້ຄວາມຮູ້ ເພື່ອສ້າງຄວາມເຂົ້າໃຈໃຫ້ແກ່ສັງຄົມຮູ້ຈັກນຳໃຊ້ສື່ສັງຄົມອອນລາຍ;  ຄົ້ນຄ້ວາ  ປັບປຸງ ແລະ ສ້າງນະໂຍບາຍ, ນິຕິກຳ ເປັນຕົ້ນ: ແຜນແມ່ບົດການຫັນໄປສູ່ການຊໍາລະສະສາງແບບດິຈິຕອນ ແລະ ແຜນແມ່ບົດການຫັນໄປສູ່ເສດຖະກິດດິຈິຕອນແຫ່ງຊາດ ເພື່ອກຽມຄວາມພ້ອມໃນການ ຫັນເປັນທັນສະໄໝ ໃນການຊໍາລະສະສາງ ແລະ ເກັບລາຍຮັບເຂົ້າງົບປະມານຜ່ານລະບົບໂທລະສັບມືຖື, ສ້າງລາຍຮັບຂອງຂະແໜງການເຂົົ້າງົບປະມານລັດເພື່ອເປັນການປະກອບ ສ່ວນສຳຄັນ ຕໍ່ການພັດທະນາເສດຖະກິດ - ສັງຄົມ ໃນສົກງົບປະມານປີ 2020. ສະໜອງ ແລະ ຕິດຕັ້ງອຸປະກອນການເຊື່ອມຕໍ່ລະບົບເຄື່ອຂ່າຍພາກລັດ ເປັນດິຈິຕອນ ໃຫ້ບັນດາ 18 ກະຊວງ ແລະ ຫ້ອງວ່າການ ສນຍ ໃຫ້ສາມາດເຊື່ອມໂຍງຫາກັນໄດ້; ຂະຫຍາຍການນໍາໃຊ້ລະບົບຫ້ອງການທັນສະໄໝ (e- Office) ໃຫ້ໄດ້ 6 ພາກສ່ວນ ຢູ່ສູນກາງ (ຫ້ອງວ່າການສໍານັກງານນາຍົກ, ສະພາແຫ່ງຊາດ, ກະຊວງພາຍໃນ, ກະຊວງແຜນການ ແລະ ການລົງທຶນ, ກະຊວງ ສຶກສາທິການ ແລະ ກີລາ ແລະ ກະຊວງຖະແຫຼງຂ່າວ ແລະ ວັດທະນາທໍາ), ອະນຸມັດຍ່ານຄື້ນຄວາມຖີ່ ໃຫ້ບັນດາຜູ້ໃຫ້ບໍລິການໂທະລະຄົມມະນາຄົມເພື່ອການທົດລອງລະບົບ 5G; ສ້າງມາດຕະຖານເຕັກນິກຫັນໄປສູ່ໄປສະນີແບບອີເລັກໂຕຼນິກ (e-post) ທີ່ມີຄຸນນະພາບ ກຽມຄວາມພ້ອມ ໃນການຮອງຮັບ E-commerce ໃນອານາຄົດ.

          ໃນໂກາດດຽວກັນນີ້, ບັນດາກົມ/ທຽບເທົ່າ, ພະແນກ ປທສ ແຂວງ/ນະຄອນຫຼວງ ແລະ ບໍລິສັດ ລັດວິສາຫະກິດຈຳນວນໜຶ່ງ ໄດ້ຂຶ້ນສະເໜີບົດຕ່າງໆ ທີ່ຕິດພັນກັບການພັດທະນາ, ການຄຸ້ມຄອງ ແລະ ການນຳໃຊ້ ລະບົບ ປທສ ຢູ່ໃນ ສປປລາວ  ຕໍ່ທີ່ປະຊຸມ  ເພື່ອປຶກສາຫາລື, ຖອດຖອນບົດຮຽນ, ຊອກວິທີ ຊຸກຍູ້ ສົ່ງເສີມ ດ້ານຕັ້ງໜ້າ ແລະ ປັບປຸງແກ້ໄຂ ດ້ານຫຍໍ້ທໍ້ ຂໍ້ຄົງຄ້າງ ຕ່າງໆ ຢ່າງທັນການ ເພື່ອ} ຊຸກຍູ້ ສົ່ງເສີມ ການຫັນເປັນທັນສະໄໝ ລະບົບການບໍລິການຂອງລັດ ດ້ວຍດີຈີຕອນ~ ໃຫ້ໄດ້ຮັບການຈັດຕັ້ງປະຕິບັດ ໃຫ້ໄດ້ຮັບປະສິດທິພາບ ແລະ ປະສິດທິຜົນສູງ.

ຂ່າວ: ຫ້ອງການກະຊວງ, ພະແນກເລຂານຸການ-ພິທີການ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2018
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາລະສານ ໄອຊີທີ ສະບັບທີ 13
ລະ​ບົບ​ຂື້ນ​ທະ​ບຽນ​ປະ​ຊຸມ