ປທສ ປາຖະກາຖາ ວັນສ້າງຕັ້ງສະຫະພັນກໍາມະບານລາວ ຄົບຮອບ 64 ປີ.

05/02/2020

ປທສ ປາຖະກາຖາ ວັນສ້າງຕັ້ງສະຫະພັນກໍາມະບານລາວ ຄົບຮອບ 64 ປີ.

             ກະຊວງ ໄປສະນີ ໂທລະຄົມມະນາຄົມ ແລະ ການສື່ສານ (ປທສ) ໄດ້ຈັດກອງປະຊຸມປາຖະກະຖາເລົ່າມູນເຊື້ອ ວັນສ້າງຕັ້ງສະຫະພັນກໍາມະບານລາວ ຄົບຮອບ 64 ປີ (01 ກຸມພາ 1956 - 01 ກຸມພາ 2020) ຂຶ້ນໃນຕອນເຊົ້າ ຂອງວັນທີ 05 ກຸມພານີ້, ທີ່ຫ້ອງປະຊຸມໃຫຍ່ຕຶກກະຊວງ ໃນທ່າມກາງບັນຍາກາດທົ່ວພັກ ທົ່ວປວງຊົນລາວທັງຊາດ ກໍາລັງສ້າງຜົນງານ ຂະບວນການຕ່າງໆ ເພື່ອຕ້ອນຮັບວັນສໍາຄັນຕ່າງໆຂອງພັກ-ຂອງຊາດ ຢ່າງມີເນື້ອໃນເລິກເຊິ່ງ. ພ້ອມກັນນັ້ນ, ກໍ່ພວມອອກແຮງງານແຂ່ງຂັນສືບຕໍ່ ຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ່ X ຂອງພັກ, ແຜນພັດທະນາເສດຖະກິດ-ສັງຄົມ 5 ປີ ຄັ້ງ VIII ຂອງລັດຖະບານ ໃນໄລຍະທ້າຍສະໄໝ ບົນຈິດໃຈຍູ້ແຮງຂະບວນກໍ່ສ້າງໜ່ວຍພັກປອດໃສ ເຂັ້ມແຂງໜັກແໜ້ນ ເພື່ອກະກຽມໃຫ້ກອງປະຊຸມໃຫຍ່ ອົງຄະນະພັກ ກະຊວງ ປທສ ຄັ້ງທີ II ຂອງຕົນ, ຂະບວນການແຂ່ງຂັນ 5 ເປັນເຈົ້າຂອງກໍາມະບານ ຕິດພັນກັບຂະບວນການແຂ່ງຂັນ “ຮັກຊາດ ແລະ ພັດທະນາ”. ເວົ້າສະເພາະ ກໍຄືແຜນພັດທະນາ 05 ປີ ຄັ້ງທີ II ຂອງຂະແໜງການ ປທສ. ໃຫ້ກຽດເປັນປະທານເຜີຍແຜ່ໂດຍ ທ່ານ ນາງ ອາລີ ວົງ​ໝໍ່ບຸນ​ທຳ ຮອງປະທານສູນກາງສະຫະພັນກຳມະບານລາວ ມີ ຄະນະພັກກະຊວງ, ຄະນະບໍລິຫານງານສະຫະພັນກໍາມະບານກະຊວງ, ຄະນະຮາກຖານ/ໜ່ວຍຂອງກົມທຽບເທົ່າ, ບັນດາບໍລິສັດ ລັດວິສາຫະກິດ ອ້ອມຂ້າງກະຊວງ ປທສ ແລະ ສະມາຊິກກໍາມະບານເຂົ້າຮ່ວມ.

           ເພື່ອຈັດຕັ້ງປະຕິບັດຕາມແຈ້ງການແນະນໍາ ຂອງຫ້ອງການສູນກາງສະຫະພັນກໍາມະບານລາວ ສະບັບເລກທີ 030/ສກລ ລົງວັນທີ 08 ມັງກອນ 2020 ເພື່ອສະ​ເຫຼີມສະຫຼອງ ວັນ​ສ້າງຕັ້ງສະຫະພັນ​ກຳມະບານ​ລາວ ຄົບຮອບ 64 ປີ ແລະ ເປັນການທວນຄືນໃຫ້ຮູ້ກ່ຽວກັບ ສະຫະພັນກຳມະບານລາວ ທີ່ມີບົດບາດໃນການສຶກສາອົບຮົມສະມາຊິກກຳມະບານ, ກຳມະກອນຊາວຜູ້ອອກແຮງງານ ໃຫ້ເປັນພົນລະເມືອງດີ, ມີລະບຽບແບບແຜນໃນການອອກແຮງງານ ແລະ ຕື່ນໂຕທາງດ້ານການເມືອງແນວຄິດ, ປະກອບສ່ວນນໍາເອົາຄວາມຮູ້ຄວາມສາມາດທາງດ້ານວິທະຍາສາດ ແລະ ເຕັກໂນໂລຊີ ເຂົ້າໃນການສ້າງເສດຖະກິດສັງຄົມ ກໍ່ຄື ການສ້າງສາ ພັດທະນາປະເທດຊາດ.  ພ້ອມນີ້, ອົງການຈັດຕັ້ງກໍາມະບານ ຍັງເປັນຕົວແທນ ຂອງກໍາມະກອນ ຊາວຜູ້ອອກແຮງງານ ໃນການປົກປ້ອງສິດ-ຜົນປະໂຫຍດ ອັນຊອບທຳຂອງສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານ ເປັນໃຈກາງໃນການຕິດຕາມ, ກວດກາ, ແລະ ປະສານງານ ການປະຕິບັດນະໂຍບາຍຄ່າແຮງງານ ລະຫວ່າງ ຜູ້ໃຊ້ແຮງງານ ແລະ ຜູ້ອອກແຮງງານ ໃຫ້ມີຄວາມເປັນທໍາ ຖືກຕ້ອງຕາມລະບຽບກົດໝາຍທີ່ວາງອອກ ການປະຕິບັດນະໂຍບາຍເບິ່ງແຍງໃນເວລາເຈັບເປັນ, ເສຍຊີວິດໂດຍການນຳໃຊ້ກອງທືນຊ່ວຍເຫຼືອຊື່ງກັນ ແລະ ກັນ ແລະ ອື່ນໆ.

ສະຫະພັນກໍາມະບານກະຊວງ ປທສ ມີສະມາຊິກທັງໝົດຈໍານວນ 2,841 ສະຫາຍ, ໃນນັ້ນລັດບໍລິຫານຈໍານວນ 461 ສະຫາຍ, ເປັນຍິງ 214 ສະຫາຍ, ຢູ່ບໍລິສັດວິສາຫະກິດມີ 2.380 ສະຫາຍ, ເປັນຍິງ 812 ສະຫາຍ, ແບ່ງອອກເປັນ 04 ຮາກຖານ, 14 ໜ່ວຍ, ສະຫະພັນກໍາມະບານ ກະຊວງ ປທສ ໄດ້ສໍາເລັດການຈັດກອງປະຊຸມໃຫຍ່ຄັ​້ງທີ III ຂອງຕົນໃນວັນທີ 21 ຕຸລາ 2019, ມີຄະນະບໍລິຫານງານທັງໝົດ 11 ສະຫາຍ, ຍິງ 02 ສະຫາຍ, ໃນນັ້ນມີປະທານ, ຮອງປະທານ ແລະ ຄະນະກໍາມະການ.

          ນອກຈາກນີ້ ໃນໄລຍະຜ່ານມາ ສະຫະພັນກໍາມະບານ ກະຊວງ ປທສ ຍັງໄດ້ເອົາໃຈໃສ່ສ້າງຂະບວນການ ແຂ່ງຂັນ 5 ເປັນເຈົ້າຂອງກໍາມະບານ, ສ້າງກິດຈະກໍາອື່ນໆເພື່ອຕ້ອນຮັບ ແລະ ສະເຫຼີມສະຫຼອງວັນສໍາຄັນຕ່າງໆຂອງພັກ-ຂອງຊາດເຊັ່ນ: ຈັດຕັ້ງການອອກແຮງລວມອະນາໄມຂອບເຂດຮັບຜິດຊອບຂອງຕົນຢູ່ແຕ່ລະຮາກຖານ/ໜ່ວຍ, ຈັດຂະບວນການແຂ່ງຂັນກິລາ, ຈັດຝຶກອົບຮົມ ສໍາມະນາໃນຫົວຂໍ້ຕ່າງໆ ເປັນປະຈໍາ.

          ຂ່າວ: ສະຫະພັນກໍາມະບານກະຊວງ ປທສ.

          ພາບ: ຫ້ອງການກະຊວງ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2018
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາລະສານ ໄອຊີທີ ສະບັບທີ 13
ລະ​ບົບ​ຂື້ນ​ທະ​ບຽນ​ປະ​ຊຸມ