ຮອງລັດຖະມົນຕີ ປທສ ເຂົ້າຮ່ວມກອງປະຊຸມຄະນະຮັບຜິດຊອບຊີ້ນໍາການພັດທະນາ ແຂວງໄຊສົມບູນ

04/02/2020

ຮອງລັດຖະມົນຕີ ປທສ ເຂົ້າຮ່ວມກອງປະຊຸມຄະນະຮັບຜິດຊອບຊີ້ນໍາການພັດທະນາ ແຂວງໄຊສົມບູນ

           ໃນວັນທີ 03 ກຸມພານີ້, ສະຫາຍ ທອງໃສ ຊານໄຊຍະ ຮອງລັດຖະມົນຕີກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ພ້ອມດ້ວຍຄະຫ້ອງການກະຊວງ ແລະ ອົງການດັດສົມໂທລະຄົມມະນາຄົມ, ກະຊວງ ປທສ ໄດ້ເດີນທາງໄປເຂົ້າຮ່ວມກອງປະຊຸມຄະນະຮັບຜິດຊອບຊີ້ນໍາ ການພັດທະນາເຂດຈຸດສຸມໃຈກາງ (ເປີດກວ້າງ) ລົງເລີກຜັນຂະຫຍາຍດໍາລັດຂອງລັດຖະບານ ວ່າດ້ວຍນະໂຍບາຍການພັດທະນາເສດຖະກິດ ແຂວງໄຊສົມບູນ, ທີ່ສະໂມສອນເມືອງອະນຸວົງ, ແຂວງໄຊສົມບູນ. ໂດຍການເປັນປະທານຂອງ ສະຫາຍ ພັນຄໍາ ວິພາວັນ, ກໍາມະການກົມການເມືອງສູນກາງພັກ, ຮອງປະທານປະເທດແຫ່ງ ສປປ ລາວ, ຫົວໜ້າຄະນະຮັບຜິດຊອບຊີ້ນໍາການພັດທະນາເຂດຈຸດສຸມໃຈກາງ ມີບັນດາລັດຖະມົນຕີ, ຮອງລັດຖະມົນຕີ ກະຊວງຕ່າງໆ, ຫົວໜ້າກົມທີ່ກ່ຽວຂ້ອງ ແລະ ບັນດາພະແນກຕ່າງໆຂອງແຂວງເຂົ້າຮ່ວມ.

          ກອງປະຊຸມໃນຄັ້ງນີ້, ໄດ້ຮັບການເຜີຍແຜ່ດໍາລັດຂອງນາຍົກລັດຖະມົນຕີສະບັບເລກທີ 414/ລບ, ລົງວັນທີ 10/12/2019 ຊຶ່ງດໍາລັດນີ້ໄດ້ສຸມໃສ່ ການຊຸກຍູ້ສົ່ງເສີມກະສິກໍາ-ປ່າໄມ້, ຊຸກຍູ້ສົ່ງເສີມການທ່ອງທ່ຽວ, ພະລັງງານໄຟຟ້າ, ການຂຸດຄົ້ນບໍແຮ່, ການເຊື່ອມຈອດ-ເຊື່ອມໂຍງ ແລະ ການພັດທະນາຊັບພະຍາກອນມະນຸດ ໂດຍມີສ່ວນຮ່ວມຂອງນັກວິທະຍາສາດ, ນັກທຸລະກິດ ແລະ ປະຊາຊົນ. ພ້ອມນີ້, ຍັງໄດ້ຮັບຟັງການປະກອບຄໍາເຫັນຂອງພະແນກຕ່າງໆຂອງແຂວງ ແລະ ກະຊວງ-ຂະແໜງການທີ່ກ່ຽວຂ້ອງ. ໃນໂອກາດດຽວກັນນີ້, ສະຫາຍ ປອ ສົມໄພວັນ ແສງສຸລິຍະ ຮອງຫົວໜ້າສູນບໍລິຫານລັດດ້ວຍເອເລັກໂຕຣນິກ, ກະຊວງ ປທສ ທັງເປັນຄະນະຂອງນັກວິທະຍາສາດຊ່ວຍຄະນະຊີ້ນໍາ ພັດທະນາເຂດຈຸດສຸມໃຈກາງ ກໍ່ໄດ້ຂຶ້ນປະກອບຄໍາເຫັນກ່ຽວກັບການນໍາໃຊ້ ໄອຊີທີ ເຂົ້າໃນການພັດທະນາອີກດ້ວຍ.

          ແຂວງໄຊສົມບູນ ເປັນແຂວງພູດອຍ ຕັ້ງຢູ່ໃຈກາງຂອງ 4 ແຂວງຄື: ແຂວງວຽງຈັນ, ແຂວງບໍລິຄໍາໄຊ, ແຂວງຊຽງຂວາງ ແລະ ແຂວງຫຼວງພະບາງ. ໃນຊຸມປີຜ່ານມາ, ພັກ-ລັດຖະບານ ໄດ້ເອົາໃຈໃສ່ພັດທະນາບໍລິເວນນີ້ຢ່າງຕໍ່ເນື່ອງ ແຕ່ອີງໃສ່ສະພາບຕົວຈິງ ແມ່ນຍັງບໍ່ໄດ້ສົມຄູ່ກັບພື້ນຖານໂຄງລ່າງ ຫຼ້າຫຼັງ, ການຜະລິດຂອງປະຊາຊົນຍັງອີງໃສ່ ທໍາມະຊາດເປັນສ່ວນຫຼາຍ ເຮັດໃຫ້ການພັດທະນາເສດຖະກິດບໍ່ຂະຫຍາຍຕົວ. ສະນັ້ນ, ຄະນະກໍາມະການກົມການເມືອງ ຈຶ່ງໄດ້ແຕ່ງຕັ້ງຄະນະຊີ້ນໍາການພັດທະນາຈຸດສຸມໃຈກາງຂຶ້ນ, ຄຽງຄູ່ກັນນັ້ນ ຍັງໄດ້ສ້າງດໍາລັດ ວ່າດ້ວຍນະໂຍບາຍການພັດທະນາ ເສດຖະກິດແຂວງໄຊສົມບູນ ເພື່ອອໍານວຍຄວາມສະດວກໃນການພັດທະນາແຂວງ.

            ພາບ+ຂ່າວ: ຫ້ອງການກະຊວງ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2018
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາລະສານ ໄອຊີທີ ສະບັບທີ 14
ລະ​ບົບ​ຂື້ນ​ທະ​ບຽນ​ປະ​ຊຸມ