ປທສ ເຂົ້າຮ່ວມ ຝຶກອົບຮົມວຽກການຄຸ້ມຄອງການແຂ່ງຂັນດ້ານໂທລະຄົມມະນາຄົມ ຢູ່ ສສ ຫວຽດນາມ

13/01/2020

ປທສ ເຂົ້າຮ່ວມ ຝຶກອົບຮົມວຽກການຄຸ້ມຄອງການແຂ່ງຂັນດ້ານໂທລະຄົມມະນາຄົມ ຢູ່ ສສ ຫວຽດນາມ

        ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ເດີນທາງໄປເຂົ້າຮ່ວມຝຶກອົບຮົມກ່ຽວກັບຫົວຂໍ້: Best practice on policy and regulation implementation for telecommunication service competition ພາຍໃຕ້ການຊ່ວຍເຫຼືອຕາມບົດບັນທຶກການຮ່ວມມືສອງຝ່າຍປະຈຳປີ 2019 ລະຫວ່າງກະຊວງ MPT ແລະ ກະຊວງ MIC, ໃນລະຫວ່າງວັນທີ່ 9-13 ທັນວາຜ່ານມານີ້, ທີ່ ອົງການດັດສົມໂທລະຄົມມະນາຄົມ VNTA ຂອງ ສສ ຫວຽດ ນາມ. ຕາງໜ້າຝ່າຍລາວ ນຳໂດຍ ທ່ານ ປອ ນາງ ໃຈມະລີ ພະກະຊຸມ ຮອງຫົວໜ້າອົງການດັດສົມໂທລະຄົມ (ອດທ), ກະຊວງ ປທສ ແລະ ຝ່າຍຫວຽດນາມ ນຳໂດຍ ທ່ານ TRAN DUY HAI ຮອງຫົວໜ້າອົງການດັດສົມ, ສສ ຫວຽດນາມ, ​ມີບັນດາພະແນກທີ່ກ່ຽວຂ້ອງຂອງ VNTA, ຕາງໜ້າຈາກກະຊວງອຸດສາຫະກຳ ແລະ ການຄ້າເຂົ້າຮ່ວມ.

       ການຈັດຝຶກອົບຮົມໃນຄັ້ງນີ້, ເພື່ອສ້າງຄວາມເຂັ້ມແຂງໃຫ້ພະນັກງານທີ່ຮັບຜິດຊອບວຽກແຂ່ງຂັນ ແລະ ເປັນເວທີແລກປ່ຽນບົດຮຽນດ້ານນິຕິກຳ, ບົດຮຽນການຈັດຕັ້ງປະຕິບັດຕົວຈີງກ່ຽວກັບການຄຸ້ມຄອງການແຂ່ງຂັນດ້ານໂທລະຄົມມະນາຄົມຂອງ 2 ພາກສ່ວນ ກໍ່ຄື ອົງການດັດສົມໂທລະຄົມມະນາຄົມຂອງລາວ (LTRA) ແລະ ອົງການດັດສົມໂທລະຄົມມະນາຄົມຂອງຫວຽດນາມ (VNTA).

      ຜ່ານການຝຶກອົບຮົມໃນໄລຍະ 05 ວັນ, ນັກສຳມະນາກອນ ໄດ້ມີຄວາມເຂົ້າໃຈ ແລະ ໄດ້ຮັບບົດຮຽນ, ປະສົບການຕ່າງໆ ເປັນຕົ້ນແມ່ນ: ບັນດານິຕິກຳກ່ຽວກັບການຄຸ້ມຄອງການແຂ່ງຂັນດ້ານໂທລະຄົມ, ນິຕິກຳການກຳນົດລາຄາ ຄ່າບໍລິການ, ບັນດາຫຼັກການກຳນົດອຳນາດຕະຫຼາດທີ່ສຳຄັນ, ກົນໄກການຄຸ້ມຄອງການຈັດໂປຣໂມຊັນ, ບົດຮຽນການສ້າງຕັ້ງກອງທຶນພັດທະນາໂທລະຄົມ, ບົດຮຽນກ່ຽວກັບລະບົບຄຸ້ມຄອງຄຸນນະພາບການບໍລິການ (QoS), ບົດຮຽນກ່ຽວກັບການຍ້າຍເຄືອຂ່າຍແຕ່ນຳໃຊ້ເບີເດີມ Mobile Number Portability (MNP), ຊຶ່ງບັນດາບົດຮຽນດັ່ງກ່າວນີ້ ຈະເປັນການປະກອບສ່ວນອັນສຳຄັນໃຫ້ແກ່ການກໍ່ສ້າງພະນັກງານຂອງ ອົງການດັດສົມໂທລະຄົມ (LTRA) ກໍ່ຄືພະນັກງານ ກະຊວງ ປທສ ເພື່ອນຳມາໝູນໃຊ້ໃນວຽກງານການຄົ້ນຄ້ວາ, ປັບປຸງບັດດາລະບຽບການເພື່ອຄຸ້ມຂອງການແຂ່ງຂັນດ້ານໂທລະຄົມຂອງ ສປປ ລາວ ໃຫ້ມີປະສິດຕິພາບຮັດກຸມ ແລະ ມີການແຂ່ງຂັນຢ່າງເປັນທຳ.

          ພາບ+ຂ່າວ: ອົງການດັດສົມໂທລະຄົມ, ປທສ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2018
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາລະສານ ໄອຊີທີ ສະບັບທີ 13
ລະ​ບົບ​ຂື້ນ​ທະ​ບຽນ​ປະ​ຊຸມ