ປທສ ຫວນຄືນມູນເຊື້ອ 2 ວັນປະຫວັດສາດ.

03/12/2019

ປທສ ຫວນຄືນມູນເຊື້ອ 2 ວັນປະຫວັດສາດ.

        ເມື່ອບໍ່ດົນມານີ້, ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ຈັດກອງປະຊຸມໂຄສະນາ-ປາຖະກະຖາ ຫວນຄືນມູນເຊື້ອ 2 ວັນປະຫວັດສາດ: ລະນຶກວັນຊາດ ທີ 2 ທັນວາ ຄົບຮອບ 44 ປີ ( 02 ທັນວາ 1975 - 02 ທັນວາ 2019 ) ແລະ ວັນຄ້າຍວັນເກີດຂອງ ປະທານ ໄກສອນ ພົມວິຫານ ຄົບຮອບ 99 ປີ ( 13 ທັນວາ 1920 - 13 ທັນວາ 2019 ) ຂຶ້ນ. ໃຫ້ກຽດເຜີຍແຜ່ ແລະ ເລົ່າຄືນມູນເຊື້ອ ໂດຍ ທ່ານ ບົວສີ ຈະເລີນສຸກ ພະນັກງານປະຕິວັດ ອາວຸໂສບຳນານ, ອາດີດຫົວໜ້າອຳນວຍການ ຫໍພິພິທະພັນ ໄກສອນ ພົມວິຫານ, ໂດຍການເຂົ້າຮ່ວມຂອງທ່ານ ທອງໃສ ຊານໄຊຍະ ຮອງເລຂາຄະນະພັກ ຮອງລັດຖະມົນຕີກະຊວງ ປທສ ແລະ ບັນດາສະຫາຍຄະນະປະຈຳພັກ, ຄະນະພັກກະຊວງ, ຄະນະພັກຮາກຖານ, ຄະນະໜ່ວຍພັກ, ສະມາຊິກພັກ ແລະ ພະນັກງານຫຼັກແຫຼ່ງ ອ້ອມຂ້າງກະຊວງ.

       ການຈັດກອງປະຊຸມໂຄສະນາ-ປາຖະກະຖາໃນຄັ້ງນີ້, ກໍ່ເພື່ອຍົກໃຫ້ເຫັນເຖີງມູນເຊື້ອທີ່ສະຫງ່າອົງອາດ ແຫ່ງການຕໍ່ສູ້ອັນຍາວນານເດັດດ່ຽວ, ໜຽວແໜ້ນ, ກ້າຫານ ທີ່ສາມາດຍາດໄດ້ໄຊຊະນະອັນໃຫ່ຍຫຼວງ ຂອງປະຊາຊົນລາວ ພາຍໃຕ້ການຊີ້ນຳ-ນຳພາຂອງພັກປະຊາຊົນປະຕິວັດລາວ, ໄດ້ເຊີດຊູນ້ຳໃຈຮັກຊາດ ເອກະລາດເປັນເຈົ້າຕົນເອງ ເພື່ອສ້າງສາປະເທດຊາດໃຫ້ມີຄວາມຮັ່ງມີເຂັ້ມແຂງ, ປະຊາຊົນມີຄວາມຜາສຸກ, ສັງຄົມມີຄວາມສາມັກຄີປອງດອງ, ມີຄວາມຍຸຕິທຳ ແລະ ເຊື່ອມຊຶມເຫັນໄດ້ບົດບາດການນຳພາຂອງພັກປະຊາຊົນປະຕິວັດລາວ, ປະຊາຊົນລາວມີຄວາມສາມັກ ຄີຕໍ່ສູ້ຢ່າງພິລະອາດຫານ ຕ້ານການຮຸກຮານ ແລະ ການຄອບຄອງຂອງພວກລ່າເມືອງຂື້ນແບບເກົ່າ ແລະ ແບບໃໝ່ ສາມາດປົດປ່ອຍຊາດໄດ້ຢ່າງມີໄຊ. ຜົນງານການສ້າງສາພັດທະນາປະເທດຊາດ ຂອງພັກ-ລັດ ແລະ ຄຸນງາມຄວາມດີອັນໃຫ່ຍຫຼວງຂອງປະທານ ໄກສອນ ພົມວິຫານ ທີ່ມີຕໍ່ປະເທດຊາດ, ຕໍ່ການປະຕິວັດລາວ ຊື່ງທ່ານເປັນຜູ້ນຳທີ່ມີນ້ຳໃຈຮັກຊາດ ອັນດູດດື່ມເສຍສະຫຼະເພື່ອຊາດ ແລະ ເພື່ອປະຊາຊົນທີ່ແທ້ຈິງ, ເປັນແບບຢ່າງໃນການຊີ້ນຳ-ນຳພາ, ເຮັດວຽກມີແບບແຜນ, ດຳລົງຊີວິດແບບລຽບງ່າຍ, ບໍ່ຟຸມເຟື່ອຍ, ເປັນຜູ້ນຳທີ່ແສນເຄົາລົບຮັກຂອງປວງຊົນລາວທັງຊາດ ເຊີ່ງພວກເຮົາຄົນຮຸ່ນໜຸ່ມຈົ່ງຕັ້ງໜ້າຮ່ຳຮຽນ ແລະ ສຶບທອດມໍລະດົກອັນລ້ຳຄ່າ ຂອງ ປະທານ ໄກສອນ ພົມວິຫານ ໄດ້ສ້າງໄວ້ ເພື່ອປະກອບສ່ວນເຂົ້າໃນການສ້າງສາພັດທະນາປະເທດຊາດ ໃຫ້ມີຄວາມຈະເລີນກ້າວໜ້າຕະຫຼອດໄປ.

           ຂ່າວ: ກົມຈັດຕັ້ງພະນັກງານ, ປທສ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2018
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 15
ລະ​ບົບ​ຂື້ນ​ທະ​ບຽນ​ປະ​ຊຸມ