ລາວ-ໄທ ເພີ່ມທະວີຮ່ວມມືກັນທາງດ້ານວຽກງານ ຫຼັກສູດການຮຽນ-ການສອນ

29/11/2019

ລາວ-ໄທ ເພີ່ມທະວີຮ່ວມມືກັນທາງດ້ານວຽກງານ ຫຼັກສູດການຮຽນ-ການສອນ

           ໃນຕອນເຊົ້າວັນທີ 28 ເດືອນ ພະຈິກ ປີ 2019 ນີ້, ກະຊວງ ໄປສະນີໂທລະຄົມມະນາຄົມ ແລະ ການສື່ສານ (ປທສ) ໄດ້ເປີດພິທີລົງນາມເຊັນບົດບັນທຶກຄວາມເຂົົ້າໃຈ ລະຫວ່າງ ສະຖາບັນເຕັກໂນໂລຊີການສື່ສານຂໍ້ມູນຂ່າວສານ (ສຕສ) ແລະ ບໍລິສັດ CAT telecom ຮ່ວມກັບບໍລິສັດ Pakgon ຈໍາກັດ (ປະເທດໄທ), ທີ່ ສຕສ, ຊຶ່ງ 2 ບໍລິສັດດັ່ງກ່າວ ເປັນບໍລິສັດແນວໜ້າທາງດ້ານວຽກງານໂທລະຄົມ ແລະ ການພັດທະນາທາງ ດ້ານເຕັກໂນໂລຊີການ ສື່ສານຂໍ້ມູນຂ່າວສານ ໃນປະເທດໄທ. ໃຫ້ກຽດເປັນປະທານເປີດໂດຍ ທ່ານ ທອງໃສ ຊານໄຊຍະ ຮອງລັດຖະມົນຕີ ກະຊວງ ປທສ ມີຕາງໜ້າຈາກ ບັນດາກົມອ້ອມຂ້າງ ກະຊວງ ປທສ, ​ລັດວິສາຫະກິດໃນຂະແໜງການໂທລະຄົມ ແລະ ບໍລິສັດເອກະຊົນຕ່າງໆ ໃນຂະແໜງການ ທີ່ກ່ຽວຂ້ອງ ເຂົ້າຮ່ວມເພື່ອເປັນສັກຂີພະຍານໃນຄັ້ງນີ້.

             ການເຊັນບົດບັນທຶກຄວາມເຂົ້າໃຈໃນຄັ້ງນີ້ ກໍ່ເພື່ອຮ່ວມມືກັນຄົ້ນຄວ້າ ແລະ ສ້າງຫຼັກສູດ ບໍລິຫານ ວິສະວະກຳ ຄອມພິວເຕີ ຫຼື Computer Engineering Management ເຊິ່ງເປັນຫຼັກສູດປະລິນຍາຕີຕໍ່ເນື່ອງ 2 ປີ ໂດຍຈະຮັບເອົາຄົນທີ່ຈົບຊັ້ນສູງ ຂຶ້ນໄປ ຈາກທຸກຂະແໜງການ ໃຫ້ສາມາດເຂົ້າຮຽນຕໍ່ໄດ້. ຫຼັກສູດ ດັ່ງກ່າວນີ້ ຈະລວມເນື້ອຫາທາງດ້ານເຕັກໂນໂລຊີທີ່ທັນສະໄໝ, ເນັ້ນການສ້າງ ແລະ ປະຕິບັດຕົວຈິງ ລວມໄປເຖິງການຮຽນຮູ້ກ່ຽວກັບການບໍລິຫານຈັດການ ເວົ້າລວມ, ເວົ້າສະເພາະ ແມ່ນຈະເປັນ ການພັດທະນາຫຼັກສູດ ເພື່ອສ້າງບຸກຄະລາກອນ ທີ່ມີຄວາມຮູ້ ທາງດ້ານເຕັກໂນໂລຊີ,​ ເປັນວິສະວະກອນ ທີ່ສາມາດສ້າງຜະລິດຕະພັນຕົວຈິງ ແລະ ພຽບພ້ອມດ້ວຍ ຄວາມຮູ້ຄວາມສາມາດ ໃນການບໍລິຫານ ຈັດການ ເພື່ອໃຫ້ເປັນຄົນໜຶ່ງທີ່ ສາມາດຫັນຕົນເປັນຜູ້ບໍລິຫານ ທີ່ທັນສະໄໝ ຫຼື ເປັນບຸກຄົນທີ່ສາມາດ ສ້າງຜະລິດຕະພັນ (Solution) ທີ່ຕອບສະໜອງໃຫ້ແກ່ຄວາມຕ້ອງການ ຂອງສັງຄົມ, ຈົນສາມາດ ຫັນຕົນເປັນເຈົ້າຂອງກິດຈະການໄດ້ອີກດ້ວຍ. ໂດຍເນັ້ນໃສ່ ການສ້າງບຸກຄະລາກອນ ໃຫ້ມີຄວາມຫຼາກຫຼາຍ ແລະ ສາມາດເຮັດວຽກຕົວຈິງໄດ້ ແນໃສ່ການສົມທົບປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຢ່າງຮອບດ້ານ ແລະ ທັນການ. ນອກຈາກການຮ່ວມມື ທາງດ້ານ ການພັດທະນາ ແລະ ຈັດຕັ້ງປະຕິບັດຫຼັກສູດແລ້ວ ທັງສອງຝ່າຍຍັງມີແຜນການຮ່ວມມື ໃນຂອບອື່ນໆອີກ ເຊັ່ນ: ການຄົ້ນຄວ້າ ແລະ ພັດທະນາ Smart Campus  ຫຼື ການສ້າງສະຖາບັນ ໃຫ້ກາຍເປັນສະ ຖາບັນທີ່ທັນສະໄໝ ແລະ ການຊຸກຍູ້, ສົ່ງເສີມໃຫ້ນັກສຶກສາມີຄວາມສາມາດໃນການສ້າງທຸລະກິດລິເລີ່ມ ຫຼື Startup ປະກອບສ່ວນ ເຂົ້າໃນການພັດທະນາເສດຖະກິດ-ສັງຄົມຂອງປະເທດຊາດ.

                ພາບ+ຂ່າວ: ສຕສ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2018
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາລະສານ ໄອຊີທີ ສະບັບທີ 13
ລະ​ບົບ​ຂື້ນ​ທະ​ບຽນ​ປະ​ຊຸມ