ການນໍາ ກະຊວງ ປທສ ເຂົ້້າຮ່ວມ ກອງປະຊຸມ ລັດຖະມົນຕີໄອຊີທີ ອາຊີ-ປາຊິຟິກ, ທີ່ປະເທດ ສິງກະໂປ.

05/07/2019

ການນໍາ ກະຊວງ ປທສ ເຂົ້້າຮ່ວມ ກອງປະຊຸມ ລັດຖະມົນຕີໄອຊີທີ ອາຊີ-ປາຊິຟິກ, ທີ່ປະເທດ ສິງກະໂປ.

         ທ່ານບຸນສະເຫລີມໄຊ ເຄນນາວົງ,​ ຮອງລັດຖະມົນຕີ ກະຊວງໄປສະນີ, ໂທລະຄົມນາຄົມ ແລະ ການສື່ສານ (ປ​ທ​ສ) ໄດ້ເດີນທາງໄປເຂົ້າຮ່ວມກອງປະຊຸມລັດຖະມົນຕີ ໂທລະຄົມມະນາຄົມ ໄອຊີທີ ອາຊີ-ປາຊິຟິກ ໃນລະຫວ່າງວັນທີ 25-26 ມີຖຸນາຜ່ານມານີ້, ທີ່ ປະເທດ ສິງກະໂປ. ​ ຊຶ່ງມີບັນດາລັດຖະມົນຕີ ດ້ານວຽກງານໂທລະຄົມມະນາຄົມ ແລະ ໄອຊີທີ ຈາກ 38 ປະເທດ ໃນຂົງເຂດອາຊີ-ປາຊີຟິກ (APT), ເຈົ້າໜ້າທີ່ອາວຸໂສ ໂທລະຄົມມະນາຄົມເຂົ້າຮ່ວມ ເພື່ອປຶກສາຫາລື ກ່ຽວກັບການພັດທະນາໄອຊີທີ, ດິຈິຕອນໃນເວທີພາກພື້ນ ແລະ ສາ​ກົນ.

         ກອງປະຊຸມໃນຄັ້ງນີ້, ໄດ້ຈັດຂື້ນໃນທ່າມກາງບັນຍາກາດ ການສະເຫຼີມສະຫຼອງ ການສ້າງຕັ້ງອົງການ ໂທລະຄົມມະນາຄົມ ອາຊີ-ປາຊີຟິກ (APT) ຄົບຮອບ 40ປີ. ພ້ອມນີ້, ຍັງເປັນການຮັບຮູ້ເຖີງບົດບາດຄວາມສໍາຄັນຂອງການຮ່ວມມືໃນເວທີພາກພື້ນ ຕໍ່ການພັດທະ ນາໄອຊີທີ - ດິຈິຕອນ ແລະ ການສືບຕໍ່ຮ່ວມມື, ຮັດແໜ້ນສາຍສໍາພັນ ທາງດ້ານວຽກງານໄອຊີທີ ໃນຂົງເຂດອາຊີ-ປາຊິຟິກໃນຕໍ່ໜ້າ ກໍ່ຄື ການປຶກສາຫາລື ທິດທາງແຜນການ 5 ປີຂ້າງໜ້າ ໃນການພັດທະນາ ໄອຊີທີ ໃຫ້​ກາຍເປັນ​ເຄື່ອງມືຂັບເຄື່ອນ ແລະ ປະກອບສ່ວນໃນການພັດທະນາເສດຖະກິດ-ສັງຄົມ.

         ນອກນີ້, ບັນດາລັດຖະມົນຕີ ຍັງໄດ້ແລກປ່ຽນບົດຮຽນ ສະພາບການພັດທະນາ, ກາລະໂອກາດ ແລະ ສິ່ງທ້າທາຍຂອງປະເທດຕົນໃນການ ຫັນເປັນອຸດສະຫະກໍາທັນສະໄໝ. ໃນໂອກາດດຽວກັນ, ທ່ານ ຮອງ​ລັດ​ຖະ​ມົນ​ຕີ ກະ​ຊວງ​ ປທສ ໄດ້ຮັບກຽດໃຫ້ມີຄໍາເຫັນ ໃນວາລະການສ້າງຂີດຄວາມສາມາດ, ຄູ່ຮ່ວມພັດທະນາດິຈິຕອນ ແລະ ຊຸມຊົນດິຈິຕອນ (Digital Community, Digital Capacity Building and Partnership) ແລະ ທ່ານໄດ້ລາຍງານສະພາບການພັດທະນາ, ການນໍາໃຊ້ໄອຊີທີ ຢູ່ ສປປ ລາວ ລວມທັງ ແຜນການສ້າງຂີດຄວາມອາດສາມາດ, ສ້າງຄວາມເຂັ້ມແຂງ ດ້ານເຕັກນິກ ລວມໄປ​ເຖີງ ການສົ່ງເສີມ, ການສ້າງທັກສະດ້ານດິຈິຕອນ ທີ່ເປັນປັດໃຈສໍາຄັນໃນການພັດທະນາ ທາງດ້ານເສດຖະກິດ - ສັງຄົມ. ພ້ອມນັ້ນ, ທ່ານຍັງໄດ້ສະເໜີໃຫ້ບັນດາປະເທດສະມາຊີກ APT ສືບຕໍ່ຮ່ວມມື, ແລກປ່ຽນບົດຮຽນ ເພື່ອຮັດແຄບຄວາມແຕກໂຕນຂອງການພັດທະນາດິຈິຕອນຂອງປະເທດສະມາຊິກ APT ແລະ ເພື່ອຮັບປະກັນການພັດທະນາທີ່ຍືນ​ຍົງ.

        ໃນຕ້ອນທ້າຍ ໃນກອງປະຊຸມ ໄດ້ຕົກລົງຮັບຮອງເອົາ ຖະແຫຼງການສິງກະໂປ ວ່າດ້ວຍ ການຮ່ວມມືກັນ ເພື່ອສ້າງອານາຄົດດິຈິຕອນໃນພາກພື້ນອາຊີ-ປາຊິຟິກ ທີ່ໄດ້ກຳນົດເອົາ 05 ເປົ້າໝາຍຍຸດທະສາດບູລິມະສິດ ເພື່ອເປັນທິດທາງໃນການດໍາເນີນງານຂອງອົງການ APT  ຊື່ງປະກອບມີ 1. ການຫັນເປັນດິຈິຕອນ, 2. ການສ້າງນະວັດຕະກຳດິຈິຕອນ, 3. ຊຸມຊົນດິຈິຕອນ, 4. ຄວາມເຊື່ອໝັ້ນດິຈິຕອນ ແລະ 5. ການສ້າງຂີດຄວາມສາມາດ ແລະ ຄູ່ຮ່ວມພັດທະນາດິຈິຕອນ.

        ຂ່າວ+ພາບ: ກົມແຜນການ ແລະ ການຮ່ວມມື, ກະ​ຊວງ ປ​ທ​ສ.

 

ວາ​ລະ​ສານ ໄອ​ຊີ​ທີ
ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2018
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ລະ​ບົບ​ຂື້ນ​ທະ​ບຽນ​ປະ​ຊຸມ