ກອງປະຊຸມເປີດກວ້າງຂອງໜ່ວຍພັກກົມແຜນການ ແລະ ການຮ່ວມມື ຄັ້ງທີ I

11/03/2019

ກອງປະຊຸມເປີດກວ້າງຂອງໜ່ວຍພັກກົມແຜນການ ແລະ ການຮ່ວມມື ຄັ້ງທີ I

 

          ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ), ໜ່ວຍພັກຮາກຖານ ກົມແຜນການ ແລະ ການຮ່ວມມື ໄດ້ຈັດກອງປະຊຸມເປີດກວ້າງ ຄັ້ງທີ I ຂື້ນເມື່ອວັນທີິ 05 ມີນາຜ່ານມານີ້, ທີ່ຫ້ອງປະຊຸມໃຫຍ່ກະຊວງ ປທສ. ໂດຍການເປັນປະທານຂອງ ສະຫາຍ ບຸນສະເຫຼີມໄຊ ເຄນນາວົງ, ຄະນະປະຈໍາພັກກະຊວງ, ຮອງລັດຖະມົນຕີ ກະຊວງ ປທສ ມີບັນດາຄະນະໜ່ວຍພັກຮາກຖານອ້ອມຂ້າງ, ຄະນະກົມ, ຫົວໜ້າພະແນກ,​ ຮອງພະແນກ ແລະ ສະມາຊິກພັກສົມບູນ ເຂົ້າຮ່ວມ.

          ສະຫາຍ ພູຂົງ ຈິດຮູບໂລກ, ເລຂາ ໜ່ວຍພັກຮາກຖານ, ຫົວໜ້າ ກົມແຜນການ ແລະ ການຮ່ວມມື, ກະຊວງ ປທສ ໄດ້ຜ່ານບົດລາຍງານ ການເມືອງ, ບົດສໍາຫຼວດການນໍາພາ ແລະ ສະຫຼຸບຕີລາຄາຖອດຖອນບົດຮຽນ ໃນການຊີ້ນຳນຳພາຂອງໜ່ວຍພັກໃນ​ໄລ​ຍະ​ຜ່ານ​ມາ ເປັນ​ຕົ້ນ​ແມ່ນ ການ​ນຳ​ພາ​ຄົ້ນ​ຄວ້າ​ເຊື່ອມ​ຊຶມ, ​ຈັດ​ຕັ້ງ​ຜັນ​ຂະ​      ຫ​ຍາຍ​ມະ​ຕິ​ກອງ​ປະ​ຊຸມ​ໃຫຍ່ຂອງ​ໜ່ວຍ​ພັກ, ມະຕິ​ກອງ​ປະຊຸມ​ໃຫຍ່​ ອົງຄະ​ນະ​ພັກກະຊວງ​ວາງ​ອອກ, ການ​ນໍາພາຈັດ​ຕັ້ງ​ປະຕິບັດ​ມະຕິ-ຄໍາສັ່ງ ​ແລະ ຂໍ້​ກໍານົດ​ຕ່າງໆ, ການ​ນໍາພາ​ວຽກ​ງານ​ປັບປຸງ​ກົງຈັກ​ການຈັດ​ຕັ້ງ, ການ​ກວດກາ​ ພັກ-ລັດ ​ແລະ ອົງການ​ຈັດ​ຕັ້ງ​ມະຫາຊົນ. ຊຶ່ງສາມາດຍາດໄດ້ຜົນງານພົ້ນເດັ່ນເຊັ່ນ: ສາມາດສ້າງເປັນໜ່ວຍພັກເຂັ້ມແຂງ ຮູ້ນໍາພາຮອບດ້ານ ແລະ ໜ່ວຍພັກປອດໄສ ເຂັ້ມແຂງ ໜັກເໜັ້ນ ຕິດຕໍ່ກັນ ສອງປີ, ວຽກງານການຂະຫຍາຍພັກ ໜ່ວຍພັກສາມາດກໍ່ສ້າງມະຫາຊົນກ້າວໜ້າ ຜູ້ທີ່ມີຄຸນທາດການເມືອງໜັກແໜ້ນ ໂດຍສາມາດເລື່ອນມະຫາຊົນກ້າວໜ້າ ເປັນສະມາຊິກພັກ ຈຳນວນ 05 ສະຫາຍ. ນອກນີ້, ຍັງໄດ້ປັບປຸງປົວແປງພາຍໃນໜ່ວຍພັກ, ສະຫຼຸບຕີລາຄາ, ຖອດຖອນບົດຮຽນ, ຕີລາຄາແບ່ງປະເພດໜ່ວຍພັກ ແລະ  ສະມາຊິກພັກ ຈໍານວນ 03 ສະຫາຍ ເປັນສະມາຊິກພັກແຂງຮອບດ້ານ ແລະ ປະເພດແຂງ.  ພ້ອມນັ້ນ, ໜ່ວຍພັກຍັງໄດ້ວາງຄາດໝາຍ ສູ້ຊົນໃຫ້ ສືບຕໍ່ຮັກສາມູນເຊື້ອ ເປັນໜ່ວຍພັກປອດໃສ ເຂັ້ມແຂງ ໜັກແໜ້ນ, ສູ້ຊົ້ນ ຂະຫຍາຍສະມາຊິກພັກໃຫ້ໄດ້ ສອງ ສະຫາຍ ຕໍ່ປີ.​

ໃນໂອກາດນີ້, ສະຫາຍ ບຸນສະເຫຼີມໄຊ ເຄນນາວົງ ໄດ້ໃຫ້ກຽດໂອ້ລົມ ແລະ ໃຫ້ທິດຊີ້ນຳ ຕໍ່ກອງປະຊຸມ ຊຶ່ງໄດ້ເນັ້ນ​ໜັກ ໃຫ້ເອົາໃຈໃສ່ ບາງບັນຫາສໍາຄັນທີ່ ໜ່ວຍພັກຈະຕ້ອງໄດ້ສືບຕໍ່ປັບປຸງແກ້ໄຂໃຫ້ດີຂື້ນໄປເລື້ອຍໆ, ໂດຍສະເພາະໃນຄວາມເປັນເຈົ້າການ, ຄວາມຮັບຜິດຊອບສູງ ແລະ ຄວາມກະຕືລືລົ້ນໃນການພັດທະນາຕົນເອງຂອງບັນດາສະມາຊິກພັກ ໃຫ້ເປັນແບບຢ່າງທີ່ດີໃຫ້ກັບມະຫາຊົນ, ອຸ່ນອ່ຽງທຸ່ນທ່ຽງ ເຊື່ອໝັ້ນຕໍ່ການຊີ້ນຳນຳພາຂອງພັັກ–ລັດ ແລະ ຄະນະນຳກະຊວງ ປທສ ທີ່ເປັນໜ້າທີ່ອັນສຳຄັນ ແລະ ມີກຽດອັນໜຶ່ງ ຂອງສະມາຊິກພັກແມ່ນກໍ່ສ້າງມະຫາຊົນ ໃຫ້ກາຍເປັນມະຫາຊົນກ້າວໜ້າ ແລະ ກາຍເປັນສະມາຊິກພັກໃນອະນາຄົດ ຕໍ່ໄປ ເພື່ອສ້າງກຳລັງແຮງໃຫ້ມາຊ່ວຍຊຸກຍູ້ ບັນດາພາລະກິດທີ່ທ້າທາຍຕ່າງໆ ທີ່ໄດ້ຮັບມອບໝາຍ ດ້ວຍຜົນສໍາເລັດອັນຈົບງາມ ແລະ ຮັກສາໄວ້ ມູນເຊື້ອ ໜ່ວຍພັກປອດໃສ ເຂັ້ມແຂງ, ໜັກແໜ້ນ ຕໍ່ໄປ.

ຂ່າວ: ກົມແຜນການ ແລະ ການຮ່ວມມື, ປທສ.

ພາບ: ຫ້ອງການກະຊວງ.

 

ວາ​ລະ​ສານ ໄອ​ຊີ​ທີ
ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2018
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ລະ​ບົບ​ຂື້ນ​ທະ​ບຽນ​ປະ​ຊຸມ