ວາລະສານໄອຊີທີ
ຈໍານວນຜູ້ເຂົ້າຊົມເວັບໄຊ
  • ມື້ນີ້ 1,590
  • ມື້ວານ651
  • ອາທິດນີ້10,693
  • ອາທິດກ່ອນ5,790
  • ເດືອນນີ້12,602
  • ເດືອນກ່ອນ28,282
  • ທັງໝົດ356,974
Weather, 28 November
Vientiane Weather
+14

High: +27° Low: +14°

Humidity: 87%

Wind: ENE - 16 KPH

Luang Prabang Weather
+24

High: +24° Low: +21°

Humidity: 94%

Wind: WSW - 3 KPH

Savannakhet Weather
+26

High: +26° Low: +25°

Humidity: 96%

Wind: SSW - 14 KPH

Pakxe Weather
+19

High: +19° Low: +19°

Humidity: 95%

Wind: NE - 3 KPH

ທ່ານ ທັນສະໄໝ ກົມມະສິດ ຢ້ຽມຢາມເຮັດວຽກ ທີ່ ສສ. ຫວຽດນາມ

ໂດຍຕອບສະໜອງຕາມຄໍາເຊີນ ຂອງ ທ່ານ ປອ ເຈືອງ ມິ່ງ ຕວນ (Truong Minh Tuan), ລັດຖະມົນຕີ ກະຊວງ ຖະແຫຼງຂ່າວ ແລະ ການສື່ສານ ແຫ່ງ ສາທາລະນະລັດ ສັງຄົມນິຍົມ ຫວຽດນາມ, ທ່ານ ປອ ທັນສະໄໝ ກົມມະສິດ, ລັດຖະມົນຕີ ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ພ້ອມດ້ວຍຄະນະ ໄດ້ເດີນທາງໄປຢ້ຽມຢາມເຮັດວຽກ ກັບຄະນະຜູ້ແທນ ກະຊວງ ຖະແຫຼງຂ່າວ ແລະ ການສື່ສານ, ສສ. ຫວຽດນາມ ຢ່າງເປັນທາງການ ໃນລະຫວ່າງວັນທີ 20-23 ມິຖຸນາ 2017, ຊຶ່ງເປັນປີແຫ່ງການສະເຫຼີມສະຫຼອງ ສອງ ວັນປະຫວັດສາດ ລາວ-ຫວຽດນາມ ກໍ່ຄື ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 55 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມືຄົບຮອບ 40 ປີ ອັນເປັນນິມິດໝາຍໃຫ້ແກ່ການເພີ່ມທະວີສາຍພົວພັນມິດຕະພາບ ແລະ ການຮ່ວມມື ທີ່ເປັນມູນເຊື້ອອັນດີງາມໃຫ້ ແໜ້ນແຟ້ນຍິ່ງຂຶ້ນ ເວົ້າລວມ, ເວົ້າສະເພາະ ໃນຂະແໜງການ ໄປສະນີ, ໂທລະຄົມມະນາຄົມ ແລະ ໄອຊີທີ ຂອງສອງຊາດ ລາວ-ຫວຽດນາມ ໃຫ້ນັບມື້ນັບແຕກດອກອອກຜົນ ໂດຍຜ່ານການປຶກສາຫາລື ແລະ ແລກປ່ຽນຂໍ້ມູນລະຫວ່າງກັນ ເພື່ອສ້າງເງື່ອນໄຂອັນດີ ໃນການພັດທະນາ ແລະ ຊຸກຍູ້ສົ່ງເສີມວຽກງານ ໄອຊີທີ ຂອງສອງປະເທດ.

ໃນການເດີນທາງໄປຢ້ຽມຢາມ ເຮັດວຽກຄັ້ງນີ້, ລັດຖະມົນຕີທັງສອງຝ່າຍ ໄດ້ຕີລາຄາສູງຕໍ່ສາຍພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືອັນດີງາມ ທີ່ມີມາແຕ່ຍາວນານ, ໃນກອງປະຊຸມ ທັງສອງຝ່າຍ ໄດ້ລາຍງານສະພາບການພັດທະນາວຽກງານ ໄປສະນີ, ໂທລະຄົມມະນາຄົມ ແລະ ໄອຊີທີ ຂອງຕົນ, ພ້ອມທັງໄດ້ທົບທວນຄືນ ຄວາມຄືບໜ້າວຽກງານຮ່ວມມືສອງຝ່າຍ ໃນໄລຍະທີ່ຜ່ານມາ. ໃນໂອກາດນີ້, ທ່ານ ປອ ທັນສະໄໝ ກົມມະສິດ ກໍ່ໄດ້ ສະແດງຄວາມຂອບໃຈຕໍ່ການຊ່ວຍເຫຼືອຂອງຝ່າຍ ຫວຽດນາມ ໂດຍສະເພາະ ໃນການກໍ່ສ້າງບຸກຄະລາກອນ ດ້ານໄອຊີທີ ທັງລະດັບປະລີນຍາຕີ ແລະ ປະລິນຍາໂທ, ຊ່ວຍວຽກງານການຄຸ້ມຄອງ ລະຫັດຊື່ອິນເຕີເນັດ .LA, ຊ່ວຍຝືກອົບຮົມ ແລະ ສົ່ງເສີມວີຊາການດ້ານຄວາມປອດໄພ, ຊຸກຍູ້ວຽກງານ ຄວາມຖີ່ ແລະ ຕໍາແໜ່ງວົງໂຄຈອນດາວທຽມລາວ, ພ້ອມນັ້ນ ກໍ່ໄດ້ລາຍງານຄວາມຄືບໜ້າໃນການຈັດຕັ້ງປະຕິບັດ ບົດບັນທຶກຊ່ວຍຈໍາທີ່ໄດ້ລົງນາມໃນປີທີ່ຜ່ານມາ ເປັນຕົ້ນ ວຽກງານການຮັບຮອງທາງເອເລັກໂຕຣນິກແຫ່ງຊາດ (CA), ວຽກງານລະບົບບໍລິຫານລັດດ້ວຍເອເລັກໂຕຣນິກ.

ທັງສອງຝ່າຍເຫັນດີຈະເພີ່ມທະວີການພົວພັນຮ່ວມມື ໃຫ້ແໜ້ນແຟ້ນຍິ່ງຂຶ້ນ, ຈະສືບຕໍ່ແລກປ່ຽນການຢ້ຽມຢາມ ຊຶ່ງກັນ ແລະ ກັນ ໃນທຸກລະດັບ ເພື່ອປຶກສາຫາລື, ຖອດຖອນບົດຮຽນ ແລະ ຊຸກຍູ້ການຮ່ວມມືສອງຝ່າຍທີ່ມີມາແລ້ວນັ້ນ ໃຫ້ມີປະສິດທິຜົນສູງສຸດ, ສືບຕໍ່ໃຫ້ການຊ່ວຍເຫຼືອກໍ່ສ້າງບຸກຄະລາກອນ, ຮ່ວມມືວຽກງານ ຄວາມປອດໄພຂອງອິນເຕີເນັດ, ແລກປ່ຽນຄວາມຮູ້ ດ້ານວຽກງານດັດສົມໂທລະຄົມມະນາຄົມ, ວຽກງານຄື້ນຄວາມຖີ່ ແລະ ການຮ່ວມມືໃນການກະກຽມ ການຮັບຮອງທາງເອເລັກໂຕຣນິກແຫ່ງຊາດ. ໃນຂະນະດຽວກັນ, ຝ່າຍຫວຽດນາມ ກໍ່ໄດ້ສະແດງຄວາມຍິນດີ ທີ່ຈະສືບຕໍ່ຊຸກຍູ້ໃຫ້ມີການຮ່ວມມືກັນໃນດ້ານໄອຊີທີ ໃຫ້ຫຼາຍຂຶ້ນ ແລະ ຈະສືບຕໍ່ໃຫ້ທຶນການສຶກສາແກ່ ພະນັກກງານ ກະຊວງ ປທສ ໃນການຍົກລະດັບການສືກສາປະລິນຍາໂທ ທີ່ສະຖາບັນ PTIT ຫວຽດນາມ.

ໃນການພົບປະສອງຝ່າຍຄັ້ງນີ້, ທັງສອງຝ່າຍໄດ້ມີການລົງນາມໃນບົດບັນທຶກ 2 ສະບັບຄື: ບົດບັນທຶກການຮ່ວມມືເພື່ອຜັນຂະຫຍາຍ ແລະ ຊຸກຍູ້ບັນດາສັນຍາຮ່ວມມືກັນ ໃຫ້ໄດ້ຮັບການຈັດຕັ້ງປະຕິບັດຢ່າງເປັນຮູບປະທຳ ແລະ ບົດບັນທຶກຊ່ວຍຈໍາ ໃນການຮ່ວມມື ວຽກງານຄວາມປອດໄພທາງໄຊເບີ. ພ້ອມກັນນີ້, ທ່ານ ປອ ເຈືອງ ມິ່ງ ຕວນ, ລັດຖະມົນຕີ ກະຊວງ ຖະແຫຼງຂ່າວ ແລະ ການສື່ສານ ສສ.ຫວຽດນາມ ກໍ່ໄດ້ມອບຫຼຽນກຽດຕິຍົດ ໃຫ້ ທ່ານ ປອ ທັນສະໄໝ ກົມມະສິດ ໃນການປະກອບສ່ວນ ແລະ ຮ່ວມມືພັດທະນາວຽກງານໄອຊີທີ ຂອງ ສສ.ຫວຽດນາມ ກໍ່ຄື ການພັດທະນາຂົງເຂດໄອຊີທີຂອງສອງປະເທດ. ພ້ອມດຽວກັນ, ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ ໄດ້ເປັນຕົວແທນລັດຖະບານລາວ ມອບຫຼຽນໄຊແຮງງານຊັ້ນ II ໃຫ້ ທ່ານ Doan Quang Hoan, ຫົວໜ້າ ກົມຄື້ນຄວາມຖີ່ວິທະຍຸສື່ສານ ສສ.ຫວຽດນາມ ທີ່ປະກອບສ່ວນ ໄດ້ຊ່ວຍ ປະສານງານ ແລະ ຂໍສິດນຳໃຊ້ຕຳແຫນ່ງວົງໂຄຈອນດາວທຽມ ນຳສະຫະພາບໂທລະຄົມມະນາຄົມສາກົນ ໃຫ້ແກ່ ສປປ ລາວ, ຊື່ງປັດຈຸບັນ ດາວທຽມລາວນີ້ ແມ່ນໄດ້ໃຫ້ບໍລິການສື່ສານ, ການກະຈາຍພາບ ແລະ ສຽງ ຊຶ່ງຄອບຄຸມທົ່ວປະເທດລາວ ແລະ ບັນດາປະເທດອາຊຽນ. ທ່ານ ປອ ທັນສະໄໝ ກົມມະສິດ ຍັງໄດ້ມອບຫຼຽນກາແຮງງານ ໃຫ້ວິຊາການ ຈາກສູນສະກັດກັ້ນ ແລະ ແກ້ໄຂເຫດສຸກເສີນຫວຽດນາມ ສອງສະຫາຍ ໃນການປະກອບສ່ວນ ສະໜັບສະໜູນ ວຽກງານ ຄວາມປອດໄພ ໃນການຮັບໃຊ້ກອງປະຊຸມສຸດຍອດອາຊຽນ ຄັ້ງທີ່ 28/29 ໃນປີ 2016 ທີ່ ຈົບລົງດ້ວຍຜົນສຳເລັດອັນສະຫງ່າງາມ.

ໃນໂອກາດຢ້ຽມຢາມທາງການຄັ້ງນີ້, ທ່ານ ປອ ທັນສະໄໝ ກົມມະສິດ ພ້ອມດ້ວຍຄະນະ ໄດ້ເຂົ້າຢ້ຽມຄຳນັບ ທ່ານ Trin Dinh Dung, ຮອງນາຍົກລັດຖະມົນຕີ ແຫ່ງ ສສ. ຫວຽດນາມ ຊື່ງທ່ານ ປອ ທັນສະໄໝ ກົມມະສິດ ໄດ້ລາຍງານຫຍໍ້ກ່ຽວກັບຈຸດປະສົງຂອງການມາຢ້ຽມຢາມໃນຄັ້ງນີ້ ແລະ ບັນດາຂໍ້ສະເໜີ ເພື່ອຮ່ວມມືໃນຕໍ່ໜ້າ. ນອກນັ້ນຍັງໄດ້ໄປຢ້ຽມຢາມ ສະຖາບັນ PTIT, ກົມຄື້ນຄວາມຖີ່ວິທະຍຸ, ສູນຮັບຮອງເອເລັກໂຕນິກແຫ່ງຊາດ ແລະ ບັນດາວິສາຫະກິດຜູ້ໃຫ້ບໍລິການ ໄປສະນີ ແລະ ໂທລະຄົມມະນາຄົມ ຂອງຫວຽດນາມ. ຜ່ານການຢ້ຽມຢາມເຮັດວຽກໃນຄັ້ງນີ້ ແມ່ນໄດ້ຮັບຜົນສຳເລັດຕາມຈຸດປະສົງ ລະດັບຄາດຫມາຍ ທຸກປະການ.

ໂດຍ: ວັນນະພາ ພົມມະທັນສີ, ກົມແຜນການ ແລະ ການຮ່ວມມື.