ປທສ ສະເຫຼີມສະຫຼອງວັນເດັກນ້ອຍສາກົນ

ເມື່ອບໍ່ດົນມານີ້, ກະຊວງ ໄປສະນີ,ໂທລະຄົມມະນາຄົມ ແລະການສື່ສານ (ປທສ) ໄດ້ຈັດພິທີສະເຫຼີມສະຫຼອງວັນເດັກນ້ອຍສາກົນ ຂຶ້ນທີ່ສະຖາບັນເຕັກໂນໂລຊີສື່ສານຂໍ້ມູນຂ່າວສານ. ມີເດັກພ້ອມດ້ວຍຜູ້ປົກຄອງ ແລະ ພະນັກງານອ້ອມຂ້າງກະຊວງເຂົ້າຮ່ວມ.

ໃນພິທີສະເຫຼີມສະຫຼອງໃນຄັ້ງນີ້ ແມ່ນສະແດງໃຫ້ເຫັນຄວາມເອົາໃຈໃສ່ຂອງການນໍາແຕ່ລະຂັ້ນ ທີ່ມີຕໍ່ເດັກ ທັງເປັນການຊຸກຍູ້ສົ່ງເສີມໃຫ້ພໍ່ແມ່ຜູ້ປົກຄອງຂອງເດັກ ໃນການດູແລເອົາໃຈໃສ່ຕໍ່ການພັດທະນາ ແລະການມີສ່ວນຮ່ວມຂອງເດັກ ໃຫ້ມີໄວເດັກທີ່ສົດໃສ ເພື່ອກ້າວເປັນຜູ້ໃຫຍ່ທີ່ມີອານາຄົດ ແລະ ເປັນກໍາລັງຕົ້ນຕໍຂອງປະເທດຊາດ. ພ້ອມນີ້, ໃນພິທີໄດ້ມີການຈັດຫຼາຍກິດຈະກໍາ ເປັນຕົ້ນເຊັ່ນ: ກິດຈະກໍາຖາມ-ຕອບຄວາມຮູ້ຮອບຕົວ, ສິນລະປະ-ວັນນະຄະດີ, ຫຼີ້ນເກມ ແລະອຶ່ນໆ ເພື່ອຮັບເອົາລາງວັນ ແລະ ຂອງຂວັນ. ຊຶ່ງວ່າກິດຈະກຳແຕ່ລະລາຍການແມ່ນສາມາດດຶງດູດຄວາມສົນໃຈພ້ອມທັງສຽງເຊ່ຍ, ສຽງຕົບມືຈາກຜູ້ຊົມໄດ້ເປັນຢ່າງດີ ແຕ່ຕົ້ນຕະຫຼອດປາຍ ຈຶ່ງເຮັດໃຫ້ການສະເຫຼີມສະຫຼອງວັນດັ່ງກ່າວນີ້ ມີບັນຍາກາດ ຟົດຟື້ນ-ມ່ວນຊື່ນ ແລະ ເຕັມໄປດ້ວຍຄວາມໝາຍຄວາມສໍາຄັນ.

ໂດຍ: ພອຍໄພລິນ ປາບພານ.