ສະເຫຼີມສະຫຼອງການສ້າງຕັ້ງ ສຕສ ຄົບຮອບ 45 ປີ

10/04/2019

ສະເຫຼີມສະຫຼອງການສ້າງຕັ້ງ ສຕສ ຄົບຮອບ 45 ປີ

         ການສະເຫຼີມສະຫຼອງການສ້າງຕັ້ງສະຖາບັນເຕັກໂນໂນໂລຊີການສື່ສານຂໍ້ມູນຂ່າວສານ (ສຕສ) ຄົບຮອບ 45 ປີ (1973-2018) ໄດ້ຈັດຂຶ້ນເມື່ອບໍ່ດົນມານີ້. ໂດຍການເປັນປະທານເປີດຂອງ ທ່ານ ສາຍຝົນ ບຸດຈັນທະລາດ ຫົວໜ້າ ສຕສ, ຊຶ່ງມີ ທ່ານ ບຸນສະເຫຼີມໄຊ ເຄນນາວົງ ຮອງລັດຖະມົນຕີ ກະຊວງ ປທສ, ທ່ານ ຄໍາລວດ ສິດລາກອນ ອາດີດລັດຖະມົນຕີປະຈໍາສໍານັກງານນາຍົກລັດຖະມົນຕີ, ຫົວໜ້າອົງການໄປສະນີ ແລະ ໂທລະຄົມມະນາຄົມແຫ່ງຊາດ, ທ່ານ ສີທົງ ທອງແກ້ວ ອະດີດຮອງລັດຖະມົນຕີກະຊວງ ປທສ, ທ່ານ ປາລະມີ ພົມມະທັນສີ ອາດີດການນໍາ ສຕສ ແລະ ພະນັກງານຄູ-ອາຈານ ທັງອາດີດ-ປະຈຸບັນ ພ້ອມດ້ວຍແຂກທີ່ຖືກເຊີນເຂົ້າຮ່ວມ.

          ສຕສ ມີພາລະບົດບາດເປັນເສນາທິການ ໃຫ້ແກ່ຄະນະນຳ ກະຊວງ ປທສ ໂດຍມີໜ້າທີ່ໃນການຄົ້ນຄວ້າສ້າງ, ພັດທະນາຫຼັກສູດ ເຂົ້າໃນການຮຽນ - ການສອນ ລວມທັງສ້າງບຸກຄະລາກອນ ໃນຂະແໜງການ ວຽກງານໄປສະນີ, ໄອທີ ແລະ ການສື່ສານໃນຂອບວຸດທິການສຶກສາ ໃນລະດັບ: ຊັ້ນຕົ້ນ, ຊັ້ນກາງ, ຊັ້ນສູງ ແລະ ປະລິນຍາຕີ ເພື່ອຮັບໃຊ້ສັງຄົມ ລວມທັງວຽກງານ ປ້ອງກັນຊາດ - ປ້ອງກັນຄວາມສະຫງົບ ໃນໄລຍະໃໝ່. ປະຈຸບັນ ສຕສ ​ມີ​ພະນັກງານ -​ ຄູ​ອາຈານ ທັງໝົດ 64 ຄົນ, ນັກສຶກສາ 618 ຄົນ. ພ້ອມນັ້ນ, ຍັງ​ໄດ້ໄປຍົກລະດັບ​ວິຊາສະເພາະຕົນເອງ ທັງພາຍໃນ ແລະ ຕ່າງປະເທດ ເພື່ອມາຮັບໃຊ້ເຂົ້າໃນການສິດສອນວິຊາສະເພາະຂອງຕົນ. ນັບແຕ່ປີ 1973-2018 ມີນັກສຶກສາຈົບທັງໝົດ 4,748 ຄົນ; ໄດ້ແຈກຢາຍໄປຮອດ 18 ແຂວງ, 148 ເມືອງໃນຂອບເຂດທົ່ວປະເທດ. ສຕສ ໄດ້ຄົ້ນຄວ້າຊອກຫາ ປື້ມຕຳລາການຮຽນ - ການສອນ ເຕັກໂນໂລຊີກ້າວໜ້າ ແລະ ທັນສະໄໝ ຕາມການປ່ຽນແປງ ຂອງຍຸກໂລກາພິວັດ ມາສິດສອນໃຫ້ນັກສຶກສາໄດ້ຮັບຮູ້ເຂົ້າໃຈ ແລະ ສົ່ງເສີມການນຳໃຊ້ເທັກໂນໂລຊີ ທີ່ທັນສະໄໝເຂົ້າໃນໜ້າທີ່ວຽກງານ. ຕະຫລອດໄລຍະ 45 ປີຜ່ານມາ ສຕສ ຍັງໄດ້ກໍ່ສ້າງພື້ນຖານໂຄ່ງລາງເພີ່ມຂຶ້ນ ເປັນຕົ້ນ: ຕຶກອາຄານສະຖານທີ່ການຮຽນ-ການສອນ, ຫ້ອງທົດລອງ, ອຸປະກອນ ແລະ ຫຼັກສູດການຮຽນ - ການສອນຄົບຊຸດ ໂດຍການຊ່ວຍເຫຼືອຂອງອົງການໂທລະຄົມສາກົນ (ITU) ເພື່ອນຳເຂົ້າໃນວຽກງານການສິດສອນ, ກໍ່ສ້າງ, ຍົກລະດັບ ແລະ ບຳລຸງບຸກຄະລາກອນຢູ່ພາຍໃນ ແລະ ຕ່າງປະເທດ ມາຮັບໃຊ້ການສິດສອນ. ນອກນີ້, ຍັງໄດ້ເຊີນຄູອາຈານທີ່ຈົບມາຈາກຫຼາຍປະເທດມາສິດສອນ ໃຫ້ຫຼາຍສາຂາວິຊາ ທີ່ກ່ຽວພັນເຖິງວິຊາທາງດ້ານໂທລະຄົມ ແລະ ຍັງໄດ້ຮັບການສະໜັບສະໜູນ, ຊ່ວຍເຫຼືອຈາກອົງການຈັດຕັ້ງພາຍໃນ ແລະ ສາກົນ ເປັນຕົ້ນ: ຮ່ວມມືກັບກະຊວງສຶກສາທິການ ແລະ ກິລາ, ລັດວິສາຫະກິດໄປສະນີລາວ, ໂຄງການສື່ສານຮັບໃຊ້ການນຳ ແລະ ພາກລັດບໍລິຫານ, ບໍລິສັດລາວໂທລະຄົມມະນາຄົມມະຫາຊົນ, ບໍລິສັດ ETL ຈຳກັດ, ບໍລິສັດສະຕາໂທລະຄົມຈໍາກັດ, ມະຫາວິທະຍາໄລແຫ່ງຊາດ ແລະ ສະຖາບັນການສຶກສາອື່ນໆ ໃນການຝຶກອົບຮົມ, ການລົງຝຶກງານ, ການຊ່ວຍເຫຼືອທາງດ້ານອຸປະກອນ ແລະ ການຮ່ວມມືໃນການພັດທະນາຫຼັກສູດ. ຮ່ວມມືກັບພາຍນອກເຊັ່ນ: ສສ ຫວຽດນາມ, ITU ແລະ ສປ ຈີນ ໃຫ້ການຊ່ວຍເຫຼືອທາງດ້ານການຍົກລະດັບວິຊາສະເພາະທັງໄລຍະສັ້ນ ແລະ ໄລຍະຍາວ, ທຶນຊ່ວຍເຫຼືອທາງດ້ານອຸປະກອນຕ່າງໆ.

        ໃນປັດ​ຈຸ​ບັນເຕັກ​ໂນ​ໂລ​ຊີ​ການ​ສື່ສານ ​ແລະ ຂໍ້​ມູນ​ຂ່າວສານ​​ ແມ່ນ​ວຽກ​ງານໜຶ່ງທີ່​ມີບົດບາດ​ສຳຄັນ​ຕໍ່​ກັບ​ການ​ສ້າງສາ​ພັດທະ​ນາ​ປະ​ເທດ​ຊາດ; ເປັນ​ປັດ​ໄຈ​ທີ່​ຂາດ​ບໍ່​ໄດ້​​ໃນ​ການ​ປະຕິບັດໜ້າທີ່​ວຽກ​ງານຂອງ​ຄົນ​ໃນ​ສັງຄົມ​; ທັງ​ເປັນ​ພາຫະນະ​ທີ່​ສຳຄັນໃນ​ການ​ບໍລິຫານ - ຄຸ້ມ​ຄອງ, ຊ່ວຍ​ໃຫ້​ທຸກຂະ​ແໜງການທີ່ຢູ່ສູນກາງ ​ແລະ ທ້ອງ​ຖິ່ນ​ເຮັດ​ວຽກ​ຢ່າງມີ​ປະ​ສິດ​ທິ​ພາບ, ເປັນຂະ​ແໜງການ​ຫຼັກ​​ໃນ​ການ​ຂັບ​ເຄື່ອນ​ການພັດ​ທະ​ນາ​ເສ​ດຖະກິດ - ສັງຄົມ, ຊຸກຍູ້ການ​ຫັນ​ເປັນ​ອຸດ​ສາຫະກໍາ ​ແລະ ທັນ​ສະ​ໄໝ​​, ​ເປັນ​ຂະ​ແໜງການ​ແຖວ​ໜ້າ​ໃນ​ການ​ປະກອບ​ສ່ວນ​ສ້າງລາຍ​ຮັບ​ເຂົ້າງົບ​ປະມານ​ຂອງ​ຊາດ; ດັ່ງ​ນັ້ນ, ຈຶ່ງມີ​ຄວາ​ມຈຳ​ເປັນ​ຕ້ອງ​ໄດ້​ສືບຕໍ່​ພັດທະນາ​ພື້ນຖານ​ໂຄງ​ລ່າງ​ດ້ານ​ເຕັກ​ໂນ​ໂລ​ຊີ​ສື່ສານ ​ແລະ ຂໍ້​ມູນ​ຂ່າວສານ ​ໃຫ້​ກວມ​ທຸກ​ພື້ນ​ທີ່​ຍຸດ​ທະ​ສາດ.

      ການດຳເນີນການຮຽນ - ການສອນໃນ ປັດຈຸບັນມີລະດັບຊັ້ນສູງ ຫຼັກສູດສາຂາວິສະວະກຳເຕັກໂນໂລຊີການສື່ສານ ແລະ ສາຂາເຕັກໂນໂລຊີຂໍ້ມູນຂ່າວສານ ໂດຍໄດ້ຮັບການຊີ້ນຳຢ່າງໃກ້ຊິດຂອງຄະນະພັກ - ຄະນະນຳ ກະຊວງ ປທສ ໃນການປັບປຸງພື້ນຖານໂຄງລ່າງ, ຫ້ອງຮຽນ - ຫ້ອງສອນ, ຫ້ອງສະໝຸດ, ຫົນທາງ, ເດີ່ນກິລາ, ຫ້ອງທົດລອງ, ຫ້ອງຄອມພິວເຕີ ໃນການຕອບສະໜອງໃຫ້ແກ່ການຮຽນ - ການສອນ ແລະ ໃຫ້ສອດຄ່ອງ ກັບ 03 ລັກສະນະ 05 ຫຼັກມູນການສຶກສາ ທີ່ກະຊວງສຶກສາທິການ ແລະ ກິລາ ວາງອອກ.          ນອກຈາກການຮຽນ - ການສອນໄລຍະຍາວແລ້ວພວກເຮົາຍັງມີການ ຝຶກອົບຮົມໄລຍະສັ້ນ ແລະ ຈັດສຳມະນາ ໃຫ້ພະນັກງານ - ຄູອາຈານ ພາຍໃນສະຖາບັນ ແລະ ຊຸກຍູ້ - ສົ່ງເສີມໃຫ້ໄດ້ຍົກລະດັບຢູ່ພາຍໃນ ແລະ ຕ່າງປະເທດ, ເຮັດໃຫ້ພະນັກງານວິຊາການມີຄຸນວຸດທິສູງຂຶ້ນຈາກລະດັບຊັ້ນສູງຂຶ້ນໄປຮອດລະດັບປະລິນຍາເອກ.

        ໃນໂອກາດພິທີສະເຫຼີມສະຫຼອງການສ້າງຕັ້ງ ສຕສ ຄົບຮອບ 45 ປີ, ຍັງໄດ້ມີພິທີພົບປະສ້າງສັນ ລະຫວ່າງຄູ-ອາຈານ, ນັກສຶກສາ ທັງອາດີດ ແລະ ປັດຈຸບັນ, ງານສະເຫຼີມສະຫຼອງປີໃໝ່ລາວ ຄສ 2019, ກິດຈະກໍາການແຂ່ງຂັນກິລາບານແຕະ ແລະ ການແຂ່ງຂັນປະກວດ ສິນລະປະ-ວັນນະຄະດີ ດ້ວຍຂະບວນການຟົດຟື້ນອີກດ້ວຍ.

        ຂ່າວ: ສຕສ.

        ກວດແກ້+ພາບ: ຫ້ອງການກະຊວງ.

 

ວາ​ລະ​ສານ ໄອ​ຊີ​ທີ
ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ລະ​ບົບ​ຂື້ນ​ທະ​ບຽນ​ປະ​ຊຸມ