ທ່ານ ທັນສະໄໝ ກົມມະສິດ ເຂົ້າຮ່ວມກອງປະຊຸມວົງແຄບລັດະມົນຕີ ໄອຊີທີ ຊຸດພິເສດ

09/04/2019

ທ່ານ ທັນສະໄໝ ກົມມະສິດ ເຂົ້າຮ່ວມກອງປະຊຸມວົງແຄບລັດະມົນຕີ ໄອຊີທີ ຊຸດພິເສດ

        ໂດຍຕອບສະໜອງການເຊື້ອເຊີນຂອງ ທ່ານ ພິເຊດ ດຸລົງຄະເວໂຣດ ລັດຖະມົນຕີກະຊວງດິຈິຕອນ ເພື່ອເສດ ຖະກິດ ແລະ ສັງຄົມ, ປະເທດໄທ. ທ່ານ ປອ. ທັນສະໄໝ ກົມມະສິດ ລັດຖະ ມົນຕີກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ), ສປປ ລາວ ພ້ອມດ້ວຍຄະນະໄດ້ເດີນທາງເຂົ້າຮ່ວມກອງປະຊຸມວົງແຄບລັດຖະມົນຕີອາຊຽນໄອຊີທີຊຸດພິເສດ (ASEAN Digital Ministers Retreat) ພາຍໃຕ້ຄໍາຂັວນ: "ຄວາມຄ່ອງໂຕຂອງການຫັນເປັນດິຈິຕອນຂອງອາຊຽນ" (ASEAN Digital Agility), ໃນລະຫວ່າງວັນທີ 28-29 ມີນາ 2019, ທີ່ເມືອງພູເກັດ, ປະເທດໄທ.

          ການຈັດກອງປະຊຸມຄັ້ງນີ້, ແມ່ນເພື່ອສ້າງອາຊຽນໃຫ້ເຂັ້ມແຂງ ແລະ ທັນສະໄໝ ໃຫ້ອາຊຽນມີຄວາມສາມາດປັບຕົວ, ຮັບມືກັບສິ່ງທ້າທາຍຕ່າງໆໄດ້ຢ່າງທັນການ ໂດຍສະເພາະ ໃນຍຸກເສດຖະກິດດິຈິຕອນ ແລະ ການປະຕິວັດອຸດສາຫະກໍາ 4.0 ທີ່ເຕັກໂນໂລຊີເປັນຕົວຂັບເຄື່ອນການພັດທະນາ. ດັ່ງນັ້ນ, ໃນກອງປະຊຸມ ຈຶ່ງຍົກເອົາ 05 ຫົວຂໍ້ສໍາຄັນ ມາປຶກສາຫາລື ເຖິງວິທີທາງໃນການເຮັດວຽກຮ່ວມກັນ ເປັນຕົ້ນ: ວຽກງານຄວາມປອດໄພທາງໄຊເບີ (Cyber Security), ວຽກງານການເຊື່ອມຈອດ (Connectivity) ແລະ ການບໍລິການເຄື່ອນທີ່ (Mobility), ວຽກງານຕົວເມືອງທັນສະໄໝ (Smart Cities), ວຽກງານເສດຖະກິດດິຈິຕອນ (Digital Economy), ວຽກງານບຸກຄະລາກອນ ແລະ ສັງຄົມ (Manpower and Socitety)

          ໃນໂອກາດນີ້, ທ່ານລັດຖະມົນຕີກະຊວງ ປທສ ໄດ້ສະເໜີຕໍ່ກອງປະຊຸມວ່າ ບັນດາຫົວຂໍ້ທີ່ໄດ້ປຶກສາຫາລືກັນລ້ວນແລ້ວແຕ່ເປັນຫົວຂໍ້ທີ່ສໍາຄັນ ແລະ ເປັນປະໂຫຍດໃນການພັດທະນາອາຊຽນໃນຍຸກດິຈິຕອນ. ພ້ອມນີ້, ທ່ານຍັງໄດ້ສະເໜີໃຫ້ອາຊຽນສືບຕໍ່ຮ່ວມມື ແລະ ເຮັດວຽກຮ່ວມກັນ ໃນການພັດທະນາວຽກງານໃນທຸກດ້ານ ສາມາດສະໜັບສະໜູນເສດຖະກິດດິຈິຕອນ ແລະ ອຸດສາຫະກໍາ 4.0.  ສປປ ລາວ ໃນນາມຮອງປະທານ ກອງປະຊຸມລັດຖະມົນຕີອາຊຽນ ໄອຊີທີ ອາຊຽນ ຄັ້ງທີ 18 (TELMIN 18) ແລະ ກະກຽມເປັນເຈົ້າພາບ TELMIN 19 ກໍ່ໄດ້ມີການກະກຽມປະເມີນບົດສະຫຼຸບການຈັດຕັ້ງປະຕິບັດແຜນແມ່ບົດໄອຊີທີອາຊຽນ 2020  (AIM 2020). ໂດຍສະເພາະປະເມີນຜົນຂອງກິດຈະກໍາຂອງອາຊຽນພາຍໃຕ້ 08 ຍຸດທະສາດຄື: ການພັດທະນາ ແລະ ຫັນປ່ຽນດ້ານເສດຖະກິດ, ການເຊື່ອມໂຍງ ແລະ ການສ້າງຄວາມເຂັ້ມແຂງ ໃຫ້ແກ່ປະຊາຊົນໂດຍຜ່ານ ໄອຊີທີ, ການສ້າງນະວັດຕະກໍາໃໝ່, ການພັດທະນາພື້ນຖານໂຄງລ່າງ ໄອຊີທີ, ການພັດທະນາຊັບພະຍາກອນມະນຸດ, ໄອຊີທີໃນຕະຫຼາດໜຶ່ງດຽວອາຊຽນ, ສື່ ແລະ ເນື້ອຫາແບບໃໝ່ ແລະ ຮັບປະກັນຄວາມປອດໄພດ້ານຂໍ້ມູນຂ່າວສານ ເພື່ອຂັບເຄື່ອນວຽກງານໄອຊີທີ ຂອງອາຊຽນໃຫ້ເປັນຍຸກແຫ່ງເສດຖະກິດ ແລະ ສັງຄົມ ໃນການສ້າງພື້ນຖານ ໃຫ້ອາຊຽນໃນການກະກຽມ ສ້າງແຜນແມ່ບົດອາຊຽນ ໄອຊີທີ ສະບັບຕໍ່ໄປ.

          ໃນຕອນທ້າຍ, ທ່ານ ທັນສະໄໝ ກົມມະສິດ ໃນນາມເປັນເຈົ້າພາບກອງປະຊຸມ TELMIN 19 ຍັງໄດ້ເຊື້ອເຊີນບັນດາລົດຖະມົນຕີ ອາຊຽນ ແລະ ທ່ານເລຂາທິການໃຫ້ອາຊຽນ ເຂົ້າຮ່ວມກອງປະຊຸມດັ່ງກ່າວ, ໂດຍຈະຈັດຂຶ້ນໃນລະຫວ່າງວັນທີ 21-25 ຕຸລາ 2019 ນີ້, ທີ່ນະຄອນຫຼວງວຽງຈັນ, ສປປ ລາວ.

          ຂ່າວ: ກົມແຜນການ ແລະ ການຮ່ວມມື, ປທສ.

 

ວາ​ລະ​ສານ ໄອ​ຊີ​ທີ
ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ລະ​ບົບ​ຂື້ນ​ທະ​ບຽນ​ປະ​ຊຸມ