ກອງປະຊຸມປະສານງານຄື້ນຄວາມຖີ່ ລາວ-ກຳປູເຈຍ

06/02/2019

ກອງປະຊຸມປະສານງານຄື້ນຄວາມຖີ່ ລາວ-ກຳປູເຈຍ

       ກະ​ຊວງ​ ໄປ​ສະ​ນີ,ໂທ​ລະ​ຄົມ​ມະ​ນາ​ຄົມ ແລະ ກາ​ນສື່​ສານ (ປທສ) ໄດ້ເປັນເຈົ້າພາບຈັດ​ກອງ​ປະ​ຊຸມ ປະ​ສານ​ງານຄື້ນ​    ຄ​ວາມ​ຖີ່​ລຽບ​ຕາມ​ຊາຍ​ແດນ ລະ​ຫວ່າງ ລາວ - ກຳປູເຈຍ ຄັ້ງ​ທີ V (JTC-5) ຂື້ນ ໃນ​ລະ​ຫວ່າງວັນ​ທີ 23-25 ມັງກອນ ຜ່ານມານີ້, ທີ່​ເມືອງຫຼວງພະບາງ, ແຂວງ​ ຫຼວງພະບາງ, ສປປລາວ ​ຕາງ​ໜ້າຄະນະ​ຝ່າຍ​ລາວ ນຳໂດຍ ທ່ານ ຈະ​ເລີນ ສີ​ບຸນ​ເຮືອງ, ຮອງ​ຫົວ​ໜ້າ​ກົມ ​ຄື້ນ​ຄວາມ​ຖີ່, ກະ​ຊວງ ປທສ ຮ່ວມກັບ ຝ່າຍ​ກຳປູເຈຍ ນຳໂດຍ ທ່ານ H.E. Mr. Moa Chakrya, ປະທານ ອົງການໂທລະຄົມມະນາຄົມ ປະເທດກໍາປູເຈຍ (Telecommunication Regulator of Cambodia (TRC), ມີຄະນະຜູ້ແທນຂອງສອງຝ່າຍເຂົ້າຮ່ວມ.

     ​​ກອງປະຊຸມຄັ້ງນີ້ ແມ່ນເພື່ອສະຫຼຸບຕີລາຄາຜົນການຈັດຕັ້ງປະຕິບັດຂອງກອງປະຊຸມ JTC-4 ໃນການລາຍງານ ຄວາມຄືບຫນ້າ ແລະ ບັນຫາທີ່ຍັງຄົງຄ້າງ. ພ້ອມນີ້, ກໍ່ໄດ້ປຶກສາຫາລື ການນຳໃຊ້ຄື້ນຄວາມຖີ່ລຽບຕາມຊາຍແດນ ເພື່ອຫາວິທີທາງແກ້ໄຂບັນຫາ ຄື້ນຄວາມຖີ່ ລົບກວນລຽບຕາມຊາຍແດນ ຮ່ວມກັນລະຫວ່າງ ສປປ ລາວ - ກໍາປູເຈຍ ທີ່ລ່ວງລໍ້າຊາຍແດນເກີນໄລຍະທີ່ກຳນົດໃນຂໍ້ຕົກລົງ. ນອກນັ້ນ,  ຍັງໄດ້ມີການແລກປ່ຽນຂໍ້ມູນການຄຸ້ມຄອງ ແລະ ການນຳໃຊ້ຄື້ນຄວາມຖີ່ ຂອງແຕ່ລະປະເທດ ທີ່ຮັບໃຊ້ເຂົ້າໃນວຽກງານໂທລະສັບມືຖື ໃນຍ່ານ 850, 900, 1800, 2100, 2600 MHz, ຄື້ນຄວາມຖີ່ໃນວຽກງານວິທະຍຸກະຈາຍສຽງ ແລະ ໂທລະພາບ. ໃນໂອກາດດຽວກັນ,  ຍັງມີກອງປະຊຸມ ວາລະຄົບຄະນະ (Plenary session)  ແລະ ກອງປະຊຸມໜ່ວຍງານ (Working Groups) ວຽກງານ ໂທລະຄົມມະນາຄົມການສື່ສານ (WG 1) ແລະ ວິທະຍຸ-ໂທລະພາບ (WG 2).

       ຜ່ານການດໍາເນີນກອງປະຊຸມໃນຄັ້ງນີ້ ໄດ້ຮັບຜົນສຳເລັດຢ່າງຈົບງາມ, ທັງສອງຝ່າຍຈະສືບຕໍ່ຮ່ວມມືໃນການຄຸ້ມຄອງຄື້ນຄວາມຖີ່, ການນຳໃຊ້ລະບົບໂທລະຄົມເຄື່ອນທີ່ ແລະ ຄື້ນຄວາມຖີ່ນຳໃຊ້ສຳລັບວິທະຍຸ-ໂທລະພາບ ຕາມບົດບັນທຶກຂອງກອງປະຊຸມທີ່ລົງນາມທັງສອງຝ່າຍ. ກອງປະຊຸມຄັ້ງຕໍ່ໄປ ກໍ່ຄື ຄັ້ງທີ 6 ຝ່າຍກໍາປູເຈຍຈະເປັນເຈົ້າພາບຈັດໃນປີ 2020, ທີ່ປະເທດ ກໍາປູເຈຍ.

         ພາບ+ຂ່າວ: ກົມຄື້ນຄວາມຖີ່.

 

ວາ​ລະ​ສານ ໄອ​ຊີ​ທີ
ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ