ປທສ ປາຖະກະຖາ ວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ.

11/01/2019

ປທສ ປາຖະກະຖາ ວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ.

         ກະ­ຊວງ​ໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້​ຈັດກອງປະຊຸມປາຖະກະຖາຫວນຄືນມູນເຊື້ອວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ (20/1/1949 - 20/1/2019) ຂຶ້ນໃນວັນທີ 11 ມັງກອນ ຜ່ານມານີ້ ເພື່ອເປັນ​ການສ້າງ​ບັນ­ຍາ­ກາດ​ຄຳ­ນັບ​ຮັບ​ຕ້ອນ ເນື່ອງໃນ​ໂອ­ກາດ​ວັນ​ສ້າງ­ຕັ້ງ​ກອງ­ທັບ​ປະ­ຊາ­ຊົນ​ລາວ ຄົບ­ຮອບ 70 ປີ ທີ່ຈະມາເຖິງນີ້ ໃຫ້​ມີ​ຄວາມ​ຄຶກ­ຄື້ນ​ທົ່ວ​ກອງ­ທັບ ແລະ ທົ່ວ​ປວງ​ຊົນ​ລາວ​ທັງ​ຊາດ. ໃຫ້ກຽດຂຶ້ນປາຖະກະຖາໂດຍ ສະຫາຍ ພົນຈັດຕະວາ ຄຳຫອມ ແສງບົວລົມ ຮອງເລຂາຄະນະພັກ, ຮອງປະທານສະຫະພັນນັກຮົບເກົ່າແຫ່ງຊາດ  ມີການເຂົ້າຮ່ວມຂອງສະຫາຍ ທອງໃສ ຊານໄຊຍະ ຮອງເລຂາຄະນະພັກ, ຮອງລັດຖະມົນຕີ ກະຊວງ ປທສ ພ້ອມດ້ວຍຄະນະພັກກະຊວງ, ຄະນະພັກຮາກຖານ, ຄະນະໜ່ວຍພັກບັນດາກົມ/ທຽບເທົ່າ ແລະ ພະນັກງານ-ສະມາຊິກພັກ ເຂົ້າຮ່ວມ.

         ສະຫາຍ ພົນຈັດຕະວາ ຄຳຫອມ ແສງບົວລົມ ໄດ້ຍົກໃຫ້ເຫັນເຖິງທາດແທ້ປະຫວັດສາດການກຳເນີດ, ຄວາມໝາຍຄວາມສຳຄັນຂອງການສ້າງຕັ້ງ ແລະ ໄລຍະການເຕີບໃຫຍ່ຂະຫຍາຍຕົວ ຂອງກອງທັບປະຊາຊົນລາວ​ວ່າ: ຂະບວນການປະຕິວັດຕໍ່ສູ້ ກູ້ຊາດຂອງປະຊາຊົນລາວບັນດາເຜົ່າຜູ້ທີ່ຮັກຊາດ ກໍ່ຄືກອງທັບປະຊາຊົນລາວ ໄດ້ຮັບການສ້າງຕັ້ງຂຶ້ນໃນວັນທີ 20 ມັງກອນ 1949 ທີ່ໄດ້ຜ່ານເສັ້ນທາງແຫ່ງການສ້າງຕັ້ງ, ການສູ້ຮົບ ແລະ ການເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງໃນດ້ານການຕໍ່ສູ້ ພາຍໃຕ້ການຊີ້ນຳ-ນຳພາ ອັນສະຫຼາດສ່ອງໃສຂອງພັກປະຊາຊົນປະຕິວັດລາວ ສາມາດເຮັດໃຫ້ກອງທັບປະຊາຊົນລາວ ໄດ້ກາຍເປັນກຳລັງຫຼັກແຫຼ່ງໃນສົງຄາມຕໍ່ສູ້ເພື່ອປົດປ່ອຍຊາດ ທີ່ມີຄວາມເດັດດຽວ ໜຽວແໜ້ນ ແລະ ພິລະອາດຫານ ເຕັມໄປດ້ວຍການເສຍສະຫຼະອັນໃຫຍ່ຫຼວງ ໃນພາລະກິດຕໍ່ສູ້ເພື່ອປົດປ່ອຍປະເທດຊາດຈົນສຳເລັດຕາມພາລະກິດປະຫວັດສາດ ທີ່ພັກ-ລັດ ແລະ ປະຊາຊົນມອບໝາຍໃຫ້ຢ່າງມີໄຊ ສາມາດຕີເອົາຊະນະພວກຈັກກະພັກລ່າເມືອງຂຶ້ນແບບເກົ່າ, ພວກຈັກກະພັດລ່າເມືອງຂຶ້ນແບບໃໝ່ ພ້ອມດ້ວຍລູກແຫຼ້ງຕີນມືຂອງພວກເຂົາ ຈົນສາມາດນຳເອົາປະເທດຊາດປົດປ່ອຍອອກຈາກແອກຄອບຄອງຂອງພວກຈັກກະພັດໄດ້ຢ່າງສົມບູນ ແລະ ສະຖາປະນາ ສປປ ລາວ ຂຶ້ນໃນວັນທີ 2 ທັນວາ 1975 ຢ່າງສະຫງ່າຜ່າເຜີຍ ເຮັດໃຫ້ ສປປ ລາວເຮົາ ມີອິດສະຫຼະພາບ, ອໍານາດອະທິປະໄຕຢ່າງຄົບຖ້ວນ ແລະ ເປັນທີ່ຍອມຮັບຂອງບັນດາປະເທດເພື່ອນມິດສາກົນໃນໂລກ. ມາຮອດປະຈຸບັນ ກອງທັບປະຊາຊົນລາວ ກໍ່ຍັງສືບຕໍ່ເປັນກຳລັງຫຼັກແຫຼ່ງໃນການປົກປັກຮັກສາໝາກຜົນຂອງການປະຕິວັດ ແລະ ຮັກສາລະບອບປະຊາທິປະໄຕໄວ້ໃຫ້ໝັ້ນຄົງຕະຫຼອດໄປ.

          ໃນຕອນທ້າຍ, ສະຫາຍຍັງໄດ້ເນັ້ນໜັກໃຫ້ຜູ້ເຂົ້າຮ່ວມ ຈົ່ງສືບຕໍ່ສຶກສາຮຽນຮູ້ປະຫວັດມູນເຊື້ອວິລະກຳ ໃນພາລະກິດຕໍ່ສູ້ປົດປ່ອຍປະເທດຊາດຂອງກອງທັບປະຊາຊົນລາວ ໃນແຕ່ລະຍຸກແຕ່ລະສະໄໝ ເພື່ອນຳໄປໝູນໃຊ້ເຂົ້າໃນຂົງເຂດວຽກງານທີ່ຕົນຮັບຜິດຊອບ ໃຫ້ເກີດຜົນສຳເລັດຢ່າງສົມບູນ.

          ຂ່າວ: ກົມຈັດຕັ້ງ-ພະນັກງານ.

           ພາບ: ຫ້ອງການກະຊວງ.

 

ວາ​ລະ​ສານ ໄອ​ຊີ​ທີ
ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ລະ​ບົບ​ຂື້ນ​ທະ​ບຽນ​ປະ​ຊຸມ