ປທສ ເຜີຍແຜ່ ວັນຕ້ານການສໍ້ລາດບັງຫຼວງສາກົນ ຄົບຮອບ 15 ປີ

04/01/2019

ປທສ ເຜີຍແຜ່ ວັນຕ້ານການສໍ້ລາດບັງຫຼວງສາກົນ ຄົບຮອບ 15 ປີ

         ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ຈັດພິທີເຜີຍແຜ່ ເນື້ອໃນຈິດໃຈ ວັນຕ້ານການສໍ້ລາດບັງຫຼວງສາກົນ ຄົບຮອບ 15 ປີ (9 ທັນວາ 2003 – 9 ທັນວາ 2018) ຂຶ້ນ ໃນວັນທີ 4 ມັງກອນ ຜ່ານມານີ້, ທີ່ຫ້ອງປະຊຸມໃຫຍ່ ຕຶກສູນຝຶກອົບຮົມ ຄື້ນຄວາມຖີ່   (ສຕສ) ໃນທ່າມກາງບັນຍາກາດທົ່ວພັກ ທົ່ວປວງຊົນລາວທັງຊາດ ພ້ອມກັນສືບຕໍ່ຜັນຂະຫຍາຍຈັດຕັ້ງປະຕິບັດ ມະຕິກອງປະຊຸມໃຫຍ່ຄັ້ງທີ່ X ຂອງພັກ, ແຜນພັດທະນາເສດຖະກິດ-ສັງຄົມ 5 ປີ ຄັ້ງ VIII ຂອງລັດ ເວົ້າລວມ, ເວົ້າສະເພາະ ກໍຄືການຈັດຕັ້ງປະຕິບັດແຜນພັດທະນາ 05 ປີ ຄັ້ງທີ II ຂອງຂະແໜງການ ປທສ. ໃຫ້ກຽດເປັນປະທານເຜີຍແຜ່ເອກະສານໂດຍ ທ່ານ ທອງໃສ ຊານໄຊຍະ ປະທານຄະນະກວດກາພັກ, ຮອງລັດຖະມົນຕີກະຊວງ ປທສ ມີບັນດາຄະນະພັກ, ເລຂາໜ່ວຍພັກ, ບັນດາກົມ/ທຽບເທົ່າ ແລະ ເລຂາຄະນະພັກຮາກຖານ ບໍລິສັດ ລັດວິສາຫະກິດ ພ້ອມດ້ວຍພະນັກງານອ້ອມຂ້າງ ກະຊວງ ເຂົ້້າຮ່ວມ.

     ທ່ານ ທອງໃສ ຊານໄຊຍະ ໄດ້ກ່າວວ່າ: ເພື່ອເປັນການຈັດຕັ້ງປະຕິບັດຕາມແຈ້ງການ ຂອງອົງການກວດກາລັດຖະບານ ສະບັບເລກທີ 1292/ຫກ ລົງວັນທີ 10 ທັນວາ 2018 ເປັນເອກະພາບໃນຂອບເຂດທົ່ວປະເທດ ໃນການເພິ່ມທະວີຄວາມຮັບຜິດຊອບຂອງຄະນະພັກ-ຄະນະນຳແຕ່ລະຂັ້ນ ທີ່ຕິດພັນກັບວຽກງານການກວດກາສະກັດກັ້ນ ແລະ ຕ້ານການສໍ້ລາດບັງຫຼວງ ຢູ່ໃນຂະແໜງການ ປທສ. ພ້ອມນີ້, ກໍ່ເພື່ອເປັນການທົບທວນຄືນ ວັນຕ້ານການສໍ້ລາດບັງຫຼວງສາກົນ ທີ່ໄດ້ໝູນວຽນມາບັນຈົບ ຄົບຮອບ 15 ປີ ຊຶ່ງວຽກງານດັ່ງກ່າວນີ້ ໄດ້ກາຍເປັນໜ້າທີ່ ຄວາມຮັບຜິດຊອບ ຂອງພະນັກງານ-ລັດຖະກອນ ໃນແຕ່ລະຂັ້ນ. ຊຶ່ງການສໍ້ລາດບັງຫຼວງນີ້ ໄດ້ເປັນໄພອັນຕະລາຍຮ້າຍແຮງ ສົ່ງຜົນກະທົບ ແລະ ກົດໜ່ວງຖ່ວງດືງເຖິງການພັດທະນາເສດຖະກິດ-ສັງຄົມ, ເປັນໄພຂົ່ມຂູ່ເຖີງຄວາມມີສະຖຽນລະພາບ ຂອງການຈັດຕັ້ງທັງພາກລັດ ແລະ ເອກະຊົນ, ສ້າງໃຫ້ເກີດມີຄວາມບໍ່ສະຫງົບ, ຄວາມບໍ່ຍຸຕິທຳ, ທັງເປັນການບັນທອນກໍາລັງແຮງກໍ່ຄືຄວາມເຊື່ອໝັ້ນ, ຄ່ານິຍົມຂອງສັງຄົມຕໍ່ສະຖາບັນການປົກຄອງ ແລະ ການຈັດຕັ້ງຕ່າງໆ. ນອກນີ້, ຍັງເປັນການຕັດຮອນເອົາລາຍໄດ້ຂອງຊາດ, ຂອງລັດ, ລວມໝູ່ ກໍ່ຄືຂອງພົນລະເມືອງລາວທຸກຄົນ ດ້ວຍຫຼາຍຮູບແບບ, ຫຼາຍວິທີ ທີ່ໄດ້ສ້າງຄວາມເສຍຫາຍໃຫ້ແກ່ຊັບສິນຂອງລັດ, ລວມໝູ່ ແລະ ປະຊາຊົນເປັນຈຳນວນມະຫາສານ. ໃນໂອກາດດຽວກັນນີ້, ຍັງໄດ້ເຜີຍແຜ່ ຄຳແນະນຳການຈັດຕັ້ງປະຕິບັດກົດໝາຍ ວ່າດ້ວຍການກວດກາລັດ (ສະບັບປັບປຸງ) ສະບັບເລກທີ 419/ອກລ, ລົງວັນທີ 04 ທັນວາ 2018 ເພື່ອຜັນຂະຫຍາຍເນື້ອໃນ ບາງມາດຕາທີ່ປັບປຸງ ແລະ ສ້າງໃໝ່ຂອງກົດໝາຍດັ່ງກ່າວ ໃຫ້ມີຄວາມເຂົ້າໃຈເປັນເອກະພາບ ແລະ ແນ່ໃສ່ເຮັດໃຫ້ການເຄື່ອນໄຫວວຽກງານກວດກາລັດ ມີຄວາມລະອຽດ, ຖືກຕ້ອງຮັດກຸມ, ເຂັ້ມງວດ ມີຜົນສັກສິດຕາມກົດໝາຍ.

       ໃນຕອນທ້າຍ, ທ່ານຍັງໄດ້ເນັ້ນໜັກໃຫ້ຄະນະພັກ-ຄະນະນຳແຕ່ລະຂັ້ນ ນຳເອົາບັນດາມະຕິ, ຄຳສັ່ງ, ກົດໝາຍ ວ່າດ້ວຍການຕ້ານການສໍ້ລາດບັງຫຼວງ, ຍຸດທະສາດ ການຕ້ານການສໍ້ລາດບັງຫຼວງແຕ່ນີ້ ຮອດປີ 2020 ໄປຜັນຂະຫຍາຍຈັດຕັ້ງປະຕິບັດຕົວຈິງ, ສືບຕໍ່ບຸກທະລຸທາງດ້ານຈິນຕະນາການຄວາມຮັບຮູ້, ຄວາມເຂົ້າໃຈ ຕໍ່ຜົນຮ້າຍ, ໄພອັນຕະລາຍຂອງການສໍ້ລາດບັງຫຼວງ, ນອກຈາກການສະກັດກັ້ນແລ້ວ ຕ້ອງໄດ້ຖືເອົາການຕ້ານ ແລະ ການແກ້ໄຂ ບັນດາປະກົດການຫຍໍ້ທໍ້ຢ່າງເດັດຂາດ ແລະ ເຂັ້ມງວດ, ເພີ່ມປະສິດສິດທິພາບຂອງການຄຸ້ມຄອງລັດດ້ວຍກົດໝາຍ, ເປັນເຈົ້າການໃນການຕິດຕາມ, ກວດກາ ແລະ ແກ້ໄຂບັນດາກໍລະນີທີ່ມີພຶດຕິກໍາຢູ່ຂົງເຂດທີ່ມີຄວາມສ່ຽງໃນການສໍ້ລາດບັງຫຼວງ, ຕ້ອງຍົກສູງຄວາມສາມາດຂອງພະນັກງານທີ່ເຮັດວຽກງານສະກັດກັ້ນ ແລະ ຕ້ານການສ້ໍ້ລາດບັງຫຼວງ ກໍຄືວຽກງານກວດກາໃຫ້ມີຄວາມໜັກແໜ້ນເຂັ້ມແຂງ ແລະ ເຄື່ອນໄຫວຈັດຕັ້ງຕ້ານການສໍ້ລາດບັງຫຼວງຢ່າງເປັນເຈົ້າການ.

          ​ຂ່າວ: ກົມກວດກາ.

          ພາບ: ຫ້ອງການກະຊວງ.

 

ວາ​ລະ​ສານ ໄອ​ຊີ​ທີ
ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ