ປທສ ​ລະ​ນຶກ​ວັນ​ສາ​ກົນ​ຢຸດຕິ​ຄວາມ​ຮຸນ​ແຮງ​ຕໍ່​ແມ່​ຍິງ

20/12/2018

ປທສ ​ລະ​ນຶກ​ວັນ​ສາ​ກົນ​ຢຸດຕິ​ຄວາມ​ຮຸນ​ແຮງ​ຕໍ່​ແມ່​ຍິງ

           ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ ( ປທສ ) ໄດ້ຈັດພິທິ “​​ລະ​ນຶກ​ວັນ​ສາ​ກົນ​ຢຸດຕິຄວາມ​ຮຸນ​ແຮງ​ຕໍ່​ແມ່​ຍິງ ແລະ ເດັກຍິງ 25 ພະ​ຈິກ, ພາຍ​ໃຕ້​ຄຳ​ຂວັນ: “ ຮັບຟັງຂ້ອຍແດ່” ຂຶ້ນໃນວັນທີ 19 ທັນວາ ຜ່ານມານີ້,  ໂດຍການເປັນປະທານຂອງ ທ່ານ ວະລະໄຊ ດາລາລອຍ ຮັກສາການຫົວໜ້າຫ້ອງການ, ກະຊວງ ປທສ, ໃຫ້ກຽດຂຶ້ນບັນຍາຍເອກະສານ ໂດຍ ທ່ານ ນາງ ມະນີວອນ ຫຼວງສົມບັດ ຮອງຫົວໜ້າຫ້ອງການກອງເລຂາ, ຄະນະກຳມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ ມີບັນດາທ່ານຫົວໜ້າຄະນະກົມ/ທຽບເທົ່າ, ຄະນະຜູ້ອໍານວຍການບໍລິສັດ ແລະ ພະນັກງານລັດຖະກອນ ອ້ອມຂ້າງ ກະຊວງ ປທສ ເຂົ້າຮ່ວມ.

           ທ່ານ ວະລະໄຊ ດາລາລອຍ ໄດ້ກ່າວວ່າ: ການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ ໃນປະຈຸບັນ ທີ່ກໍາລັງແຜ່ລາມຫຼາຍຮູບແບບໃນທົ່ວໂລກ ທີ່ໄດ້ສົ່ງຜົນກະທົບທາງລົບຕໍ່ການພັດທະນາເສດຖະກິດ-ສັງຄົມ ເວົ້າລວມ ເວົ້າສະເພາະ ແມ່ນກະທົບຕໍ່ຈິດໃຈ, ຮ່າງກາຍ ຕະຫຼອດເຖິງຊັບສິນຂອງແມ່ຍິງ ແລະ ເດັກຍິງ ໂດຍສາເຫດຕົ້ນຕໍແມ່ນຍ້ອນຮີດຄອງປະເພນີທີ່ເກົ່າແກ່ຫຼ້າຫຼັງ, ການເຊື່ອຖືແບບງົມງາຍ, ຄວາມທຸກຍາກຂາດເຂີນ, ລະດັບການສຶກສາຕໍ່າ ແລະ ສິ່ງຫຍໍ້ທໍ້ອື່ນໆ ທີ່ມີຕໍ່ແມ່ຍິງໃນສັງຄົມ ຊຶ່ງປະກອບມີຫຼາຍຮູບແບບເຊັ່ນ: ການບັງຄັບການແຕ່ງງານແຕ່ອາຍຸຍັງນ້ອຍ, ການຄ້າມະນຸດ, ການບັງຄັບຮ່ວມເພດ ແລະ ການຂົ່ມຂື່ນທໍາຊໍາເລົາ ທີ່ສາມາດ ເກີດຂຶ້ນກັບ ແມ່ຍິງໃນທຸກເພດທຸກໄວ ບໍ່ວ່າຈະໃນຄອບຄົວ, ຊຸມຊົນພາຍໃນຕົວເມືອງ ແລະ ຊົນນະບົດ, ຊຶ່ງໄດ້ສ້າງຜົນກະທົບຕໍ່ແມ່ຍິງ ແລະ  ເດັກຍິງ ນັບແຕ່ມື້ເກີດເຫດຈົນເຖິງໄວແກ່ເຖົ້າສະລາ ບັນຫາດັ່ງກ່າວເປັນສິ່ງກີດກັ້ນຢ່າງໜັກໜ່ວງໃນການພັດທະນາຄວາມສາມາດຂອງຊັບພະຍາກອນມະນຸດ. ດັ່ງນັ້ນ, ເພື່ອເປັນການລະນຶກເຖິິງ ວັນສາກົນຢຸດຕິຄວາມຮຸນແຮງຕໍ່ແມ່ຍິງ ແລະ ເດັກຍິງ ກະຊວງ ປທສ ຈຶ່ງໄດ້ຈັດພິທີດັ່ງກ່າວນີ້ຂຶ້ນ ໃຫ້ຜູ້ເຂົ້າຮ່ວມໄດ້ຮັບຟັງການເຜີຍແຜ່ເອກະສານສຳຄັນຄື: ສານຂອງພະນະທ່ານ ນາຍົກລັດຖະມົນຕີ ແຫ່ງ ສປປ ລາວ ເນື່ອງໃນໂອກາດວັນ​ສາ​ກົນ​ຢຸດຕິຄວາມ​ຮຸນ​ແຮງ​ຕໍ່​ແມ່​ຍິງ ແລະ ເດັກຍິງ 25 ພະ​ຈິກ, ປະຫວັດຄວາມເປັນມາຂອງວັນ​ສາ​ກົນ​ຢຸດຕິຄວາມ​ຮຸນ​ແຮງ​ຕໍ່​ແມ່​ຍິງ ແລະ ເດັກຍິງ 25 ພະ​ຈິກ, ຜົນສຳຫຼວດລະດັບຊາດກ່ຽວກັບສຸຂະພາບ ແລະ ປະສົບການຊີວິດຂອງແມ່ຍິງໃນ ສປປ ລາວ ເພື່ອເປັນການປຸກລະດົມ ປູກຈິດສໍານຶກ ໃຫ້ແກ່ພະນັກງານ-ລັດຖະກອນ ອ້ອມຂ້າງ ກະຊວງ ປທສ ໄດ້ຮັບຮູ້ ແລະ ເຂົ້າໃຈ ເຖິງບັນຫາການໃຊ້ຄວາມຮຸນແຮງຕໍ່ແມ່ຍິງ ທີ່ເປັນການລະເມີດສິດທິມະນຸດຂອງແມ່ຍິງ ແລະ ຮັບປະກັນ ໃຫ້ມີການປະຕິບັດສິດສະເໝີພາບລະຫວ່າງ ຍິງ-ຊາຍ ບໍ່ວ່າຈະເປັນ ທາງດ້ານການເມືອງ, ເສດຖະກິດ,  ວັດທະນະທໍາ-ສັງຄົມ ກໍຄືຄອບຄົວ.

ພາບ+ຂ່າວ: ຫ້ອງການກະຊວງ, ປທສ.

 

ວາ​ລະ​ສານ ໄອ​ຊີ​ທີ
ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ລະ​ບົບ​ຂື້ນ​ທະ​ບຽນ​ປະ​ຊຸມ